Agimtuod Dagiti Agtutubo . . .

Apay nga Agsaokayo Maipapan iti Dios?

“Tunggal maysa adda bukodna a relihion. Rumbeng a dimo piliten ti dadduma a tattao a mamati iti bukodmo a panangmatmat iti Dios.”​—14-ti-tawenna a ni Racish, Guyana.

“Agkedkedak nga agsao maipapan iti Dios gapu ta kabainko ti pananguyawdanto kaniak.”​—17-ti-tawenna a ni Rohan, Guyana.

“Rumbeng nga agsaotayo maipapan iti Dios gapu ta isu ti Namarsuatayo ken utangtayo ti biagtayo kenkuana.”​—13-ti-tawenna a ni Marco, Alemania.

DENGGENYO a naimbag ti saritaan ti maysa a grupo dagiti agtutubo ket nalabit a kastoyto ti nakalkaldaang a konklusionyo: Talaga a ti Dios ti saan a kangrunaan a mapagsasaritaan iti kaaduan nga agtutubo. Ngem dakamatenyo ti isports, kawkawes, dagiti kabaruan a sine, wenno ti kasungani a sekso ket masansan a mairugiyonto ti naganaygay a saritaan. Ngem, padasenyo a dakamaten ti Dios, ket kellaat a rumsuanto ti makapabain a kinaulimek a kas ti yaabungot ti napuskol nga angep.

Talaga a ti Dios ket di patien ti dadduma nga agtutubo. Mabalin nga irasonda a tangay dida makita, ngarud, isut’ awan​—kasla sayang la ti tiempo nga agsao maipapan kenkuana. Nupay kasta, talaga a sumagmamano laeng dagiti ateista kadagiti agtutubo. Sigun iti maysa a surbey ti Gallup, patien ti ag-95 porsiento kadagiti agtutubo idiay E.U. ti Dios. Kinapudnona, kastoy ti konklusion ni Gallup: “Iti adu nga agtutubo, ti panangmatmatda iti Dios ket saan a kasla narigat a matarusan a prinsipio, no di ket maysa a personal a Dios a mangpalpaliiw iti tigtignayda ken manggunggona wenno mangdusa iti tunggal maysa kadakuada.” Apay ngarud, nga agkedked ti adu nga agtutubo nga agsao maipapan iti patpatienda?

No Apay nga Agkedked ti Dadduma

Adu ti talaga a mangipagarup a dakes ti mangiranud kadagiti bambanag maipapan iti pammati ken rumbeng a mapagtalinaed a kumpidensial dagiti narelihiusuan a bambanag. Kasla kabain ti dadduma nga agtutubo ti kapanunotan a panagsao maipapan iti Dios. Irasonda a ‘di anamongan dayta ti dadduma nga agtutubo.’

Aniaman ti panangmatmat dagiti kapatadanyo, aniat’ takderyo iti daytoy nga isyu? Maikanatad unay a saludsod daytoy no napadakkelkayo kas maysa a Saksi ni Jehova. Apay? Agsipud ta ti panangasaba, ti panangisarita kadagiti dadduma maipapan iti Dios, ti kapatgan unay iti pammati [dagiti Saksi ni Jehova]!​—Isaias 43:9, 10; Mateo 24:14.

Nupay kasta, gapu ta maupayda iti ibubusor a masansan a masarangetda, agkedked ti dadduma nga agtutubo a Saksi a makiraman iti trabaho a panangasaba iti publiko​—wenno makipasetda laeng gapu iti panangidagadag dagiti nagannakda. Daddumat’ makiraman iti dayta a trabaho ngem iti un-unegda, kalkalikagumanda a dagiti gagayyemda idiay eskuelaan dida koma ida makita a mangar-aramid iti dayta. Idiay eskuelaan, ikagkagumaan ti dadduma nga ilimed dagiti narelihiusuan a patpatienda. Masansan a daytoy ket gapu ta kaamakda ti pananguyaw dagiti kaeskuelaanda. “Kaamakko idi ti agsao maipapan iti Dios,” bigbigen ni agtutubo a Ryan, “gapu ta birngasandak dagiti kaduak ken awan idi ti turedko a mangitultuloy iti saritaan.”

Sa adda pay dagidiay agkedked gapu ta madanaganda a dida mayaplikar a naan-anay dagiti pagalagadan ti Biblia. Tangay mariknada ti pananggargari “dagiti tarigagay a naikasigudan iti kina-agtutubo,” ikalinteganda a nasaysayaat no saanda a yam-ammo ti bagbagida kas Kristiano no bilang makaaramidda iti dakes.​—2 Timoteo 2:22.

Daddumat’ di agsao maipapan iti Dios gapu ta talaga a mariknada a dida kabaelan. Kastoy ti panangilawlawag ti 19-ti-tawenna a ni Wilton: “Marigatanak idi nga agsao maipapan iti Dios kadagiti katrabahuak gapu ta nariknak a diak maikari a mangikalintegan kadagiti bambanag nga ibagak maipapan kenkuana. Nariknak a no karitenda dagiti patpatiek, dinto makapnek ti sungbatko.”

Maysa a Nakristianuan nga Obligasion

Mabalin ngata nga agkedkedkayo nga agsao maipapan iti Dios gapu kadagiti umasping a rason? No kasta, saan la a dakayo ti kasta. Sinaranget met ti dadduma nga agtutubo dagita a rikrikna. Nupay kasta, adu ti nakaamiris nga, agpapan pay kadagiti amin a bambanag a mabalin a mangupay iti maysa a mangaramid iti dayta, adda dagiti makatignay a rason nga agsao ti maysa kadagiti dadduma maipapan iti Dios. Aniat’ dadduma kadagitoy?

Nagsayaat ti panangilawlawag ni agtutubo a Marco, ti nadakamat itay, iti panagkunana a ti Dios ti “Namarsuatayo ken utangtayo ti biagtayo kenkuana.” (Apocalipsis 4:11) Wen, ti biag ket maysa a napateg a sagut. Kinuna ti salmista maipapan iti Dios: “Adda kenka ti ubbog ti biag.” (Salmo 36:9) Tangay inawatyon daytoy a sagut, di aya rumbeng laeng nga ipakitayo ti panagyamanyo iti dayta?

Maysa a pamay-an ti panangipakita iti panagyaman isu ti panangidayaw ken Jehova a Dios iti saklang dagiti sabsabali. Isu ti Namunganayan ti init, ti bulan, ti tudo, ti angin nga ang-angsentayo, ken ti taraon a kankanentayo. (Aramid 14:15-17) “Tunggal naimbag a sagut ken tunggal naan-anay a rangkap aggapu iti ngato,” kinuna ni adalan a Santiago. (Santiago 1:17) Agyamyamankay met laeng aya iti Dios kadagitoy a sagut? (Colosas 3:15) Ania pay ti nasaysayaat a pamay-an a mayebkasyo ti panagyamanyo no di ti panagsaoyo maipapan iti Dios?​—Lucas 6:45.

Ngem, kinapudnona, bilbilinennatay ti Dios nga agsao maipapan kenkuana. Imbilin ti Anakna a ni Jesu-Kristo kadagiti Kristiano: “Inkayo ngarud ket mangaramidkayo kadagiti adalan a tattao iti isuamin a nasnasion.” (Mateo 28:19, 20) Nairaman dagiti agtutubo iti annongen a makiraman iti daytoy a trabaho. Ibilin ti salmista: “Idaydayawyo ni Jehova . . . dakayo a babbaro ken kasta met dakayo a babbalasang, dakayo a lallakay agraman dagiti ubbing. Idaydayawda koma ti nagan ni Jehova, ta ti naganna laeng ti maitan-ok. Ti dayagna naringringbaw ngem ti daga ken langit.” (Salmo 148:7, 12, 13) Ngem di rumbeng a matmatanyo daytoy a trabaho kas maysa a dadagsen. Kinapudnona, daytat’ maysa a pribilehio​—aktual a makapagbalinkayo a maysa kadagiti “katrabahuan ti Dios.”​—1 Corinto 3:9.

Kasano ngay no talaga a mariknayo a dikay maikari? Kasta met laeng ti rikrikna ni mammadto Jeremias idi panawen ti Biblia: “Ay, O Soberano nga Apo Jehova!” kinunana. “Adtoy talaga a saanko nga ammo no kasano ti agsao, ta ubingak laeng.” Ti sungbat ni Jehova? “Saanmo a sawen, ‘Ubingak laeng.’ Ta amin kadagiti pangibaonakto kenka, inkanto; ket saritaemto amin nga ibilinkonto kenka.” (Jeremias 1:6, 7) Babaen iti tulong ni Jehova, naaramidan nga agpayso ni Jeremias dayta iti 40 a tawen!

Kasta met laeng kadagiti Kristiano itatta, ‘ti panagbalin[tayo] a naan-anayen a kualipikado agtaud iti Dios.’ (2 Corinto 3:5) Nupay nainkasigudan a managbabainkayo, managkedked, matulongannakay ti Dios a tumured nga agsao. Adda dagiti probision iti uneg ti kongregasion Kristiano a makatulong kadakayo nga agbalin nga ad-adda a ‘naan-anayen a kualipikado’ kas mannursuro iti Sao ti Dios. No mariknayo a kasapulanyo ti dadduma a personal a tulong, apay a dikay makisarita iti maysa kadagiti manangaywan ti kongregasion? Mabalin a daytat’ panangpatanor laeng iti maysa a programa ti personal a panagadal iti Biblia wenno pannakikadua iti maysa nga aduanen iti kapadasan.

No Aniat’ Maaramidanyo

Ti panagsaoyo maipapan iti Dios ti mangiparikna kadakayo a ti aramidyo adda pudno a pategna. Maysa a gapu ket adu kadagiti kapatadanyo ti mangsapsapul iti solusion kadagiti problema ti biag, nga agkasapulanda unay iti tulong. Kurang ti direksionda ken awan nalawag a panangmatmatda iti masakbayan. Pampanunotenda, ‘Apay nga addatayo ditoy? Sadinot’ pagtungpalantayo? Apay a napnot’ kinariribuk ti lubong?’ Kas maysa a Kristiano, adda kadakayo dagiti sungbat, ken addakayo iti kasayaatan a kasasaad a mangiranud iti kasta a pannakaammo kadagiti kapatadanyo. Adda bambanag a pagtutunosanyo ket nalabit kaykayatda ti makisarita iti kataebda ngem iti maysa a natengan.

Pudno, pasaray makasarangetkayto iti pannakailaksid. Ngem mabalin a makasarakkayto met kadagiti tattao a dumngeg iti mensahe ti Biblia. Maysa nga agtutubo a Saksi a situtugaw iti maysa a bus ti nangbasa iti bukodna a kopia ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo.a Nakipagbasa met ti maysa a barito a katugawna. “Nagsayaat a libro daytoy!” naikuna ti barito. “Adut’ salsalaysayen daytoy a libro maipapan iti Dios. Saan nga interesado ti kaaduan a tattao iti relihion.” Inusar ti agtutubo a Saksi daytoy a gundaway tapno mailawlawagna a naimbag ti nagan ti Dios.

Talaga a no yam-ammoyo ti bagiyo kas maysa a Kristiano, rumbeng nga agtignaykayo kas maysa a Kristiano. (1 Pedro 2:12) Ngem ti nasayaat a Nakristianuan a kababalin ti ad-addanto laeng a mangpasingked iti kinapudno ti mensaheyo. Usigenyo ti kapadasan ti maysa nga agtutubo nga agnagan Eric. Naallukoy iti nagsayaat a kababalin dagiti agtutubo a Saksi idiay eskuelaanda. Daytoy ti nanggutugot iti interesna a mangammo iti ad-adu pay maipapan iti Dios. Nairugi ti maysa a panagadal iti Biblia kenkuana, ket ita, isut’ maysan a bautisado a Kristiano nga agserserbi idiay sangalubongan a hedkuarter dagiti Saksi ni Jehova sadi Nueva York.

Makatulong met kadakayo ti panagsaoyo maipapan iti Dios! Agserbi dayta kas salaknib. No ammo dagiti kakaduayo a maysakayo a Saksi ni Jehova, adut’ mangraemto kadakayo. Mabalin a saandakayto unay a piliten a mangaramid iti dakes no maamirisda a nangato ti pagalagadanyo iti moral ken ammoda a nalabit makasabaanyo pay ida no ikagumaandakayo a piliten.

Siempre, di kaipapanan daytoy a masapul a naadaw manipud kasuratan ti tunggal sawenyo. Paginteresanyonto pay met laeng ti isports, kawes, wenno musika ket pasaray kayatyonto ti agsao maipapan kadagita a banag. Ngem laglagipenyo: “Ti naruay iti puso sawen ti ngiwat.” (Mateo 12:34) No ti panagayat iti Dios ti sipupudno nga adda iti pusoyo, natural a kayatyonto ti agsao maipapan kenkuana. Iti sumaganad a ruar, isalaysayminto ti dadduma a pamay-an a maaramidyo dayta a siiepektibo.

[Dagiti Footnote]

[Ladawan iti panid 15]

Kabainyo aya a makitadakayo dagiti kaeskuelaanyo no mangaskasabakayo iti publiko?