Aprobetsarenyo ti Panageskuelayo
1 Nasuroken a dua a bulan nga adda iti eskuela dagiti ubbingtayo. Nupay nalabit adda sumagmamano a karit ken pakaringgoran ti panagseserrek iti eskuelaan, adu met ti pagimbagan a magun-od dagiti agtutubo a mangigaed a mangaprobetsar iti panagadalda.
2 Ti nasayaat a pamunganayan nga edukasion makatulong iti naespirituan nga irarang-ay ti asinoman. Ti ar-aramiden ti maysa a tao kabayatan ti kinaagtutubona dakkel ti pakainaiganna iti maaramidannanto inton nataenganen. Uray iti panageskuela, “aniaman nga imulmula ti maysa a tao, daytoyto met ti apitenna.” (Gal. 6:7) Dagiti agtutubo a naanep nga agadal kadagiti leksionda iti eskuelaan makagun-odda kadagiti paglaingan a mamagbalin kadakuada nga ad-adda a napateg iti imatang ni Jehova.
3 Masapul ti naannad a panangusig tapno makapagpili kadagiti umiso a kurso iti eskuelaan. Rumbeng a tulongan ti nagannak dagiti annakda a mangpili kadagiti praktikal a kurso nga ad-adda a mangsanay kadakuada tapno maragpatda dagiti naespirituan a kalat iti biag. Babaen ti panangparang-ay kadagiti paglainganda, pagimbaganto dayta dagiti agtutubo tapno masuportaranda ti bagbagida iti trabaho a kinapayunir. Ti naragpatda nga adal rumbeng a tumulong kadakuada a mangidayaw ken Jehova uray sadino ti pagserbianda.
4 Agtutubo, ikagumaanyo nga aprobetsaren dagiti tawen a panageskuelayo. Iti kasta, maipamaysayo ti nabagas ken makapnek a panagbiag iti sagrado a serbisio, imbes a panangragpat iti nailubongan a karera. Ikagumaanyo nga usaren ti biagyo nga agaramid iti pagayatan ni Jehova. Iti kasta, rumang-aykayto, a pakaidayawan ni Jehova.—Sal. 1:3.