“Naan-anay a Nakabalan Maipaay iti Tunggal Naimbag nga Aramid”
1 Naparaburan ti ili ni Jehova itatta iti naruay a nababaknang a naespirituan a taraon. (Isa. 25:6) Nakaad-adu ti matagiragsak a Nainkasuratan a material babaen ti personal ken sangapamiliaan a panagadal ken kadagiti gimong ti kongregasion, asamblea, ken kombension. Ngem gunggundawayantay kadi a naan-anay amin daytoy tapno agbalintayo a “naan-anay koma a makabael, naan-anay a nakabalan maipaay iti tunggal naimbag nga aramid”?—2 Tim. 3:17.
2 Panunotenyo laengen dagiti naisagana a naespirituan a taraon para iti tawen 1998, a malmalpasen ti kaguduana! Babaen kadagiti linawas a gimong ti kongregasion, masaklawtay ti dadduma a tampok dagiti 23 a libro ti Kristiano a Griego a Kasuratan, repasuentayo ti impormasion a masarakan iti Insight on the Scriptures maipapan iti kabibiag dagiti 49 a karakter iti Biblia, ken usigentay ti 138 a panid iti libro a Manangiwaragawag. Repasuentay met ti apagkatlo ti libro a Pannakaammo, gistay masaklaw amin ti libro a Kinaragsak iti Pamilia, ken ti intero a libro a Saot’ Dios. Mainayon pay, matartaraonantayo iti 12 a ruar Ti Ministeriotayo iti Pagarian, 52 nga artikulo a maadal iti Pagwanawanan, ken gistay kasta met laeng ti kaaduna a palawag publiko iti nadumaduma a tema a naibatay iti Biblia. Mainayon amin iti daytoy dagiti nabaknang a programa iti kombension ken asamblea. Anian a naruay a nasasayaat a naespirituan a bambanag ti naisagana kadatayo!
3 Apresiaren Dagiti Probision ni Jehova: Tapno naan-anay a magunggonaan, masapul a matarusantayo no apay nga ipapaay ni Jehova ti kasta nga aglaplapusanan a naespirituan a probision. Ti pannangan kadagitoy a nasasayaat a bambanag pabilgenna ti pammatitayo ken patibkerenna ti relasiontayo kenkuana. (1 Tim. 4:6) Nupay kasta, saan a naisagana ti naespirituan a taraon nga agpaay laeng a pakasursuruantayo. Tignayennatayo a mangiranud iti kinapudno kadagiti sabsabali ken pagbalinennatayo nga epektibo a mangaramid iti dayta kas ministro ti naimbag a damag.—2 Tim. 4:5.
4 Ditay koma liwayan dagiti naespirituan a kasapulantayo, no di ket kanayon koma a patanorentay ti panagtarigagay kadagiti nabaknang ken makapnek a naespirituan a probision manipud iti lamisaan ni Jehova. (Mat. 5:3; 1 Ped. 2:2) Tapno naan-anay a magunggonaan masapul a mangilasin iti umdas a tiempo para kadagiti napapateg a banag a kas ti regular a panagadal iti Biblia a personal ken sangapamiliaan ken pannakigimong. (Efe. 5:15, 16) Dagiti makaparagsak a gunggona iti panangaramid iti kasta ket maitunos iti naipaltiing a pammaregta nga insurat ni Pablo kadagiti matalek a Kristiano a Hebreo, kas nailanad iti Hebreo 13:20, 21.