“Pagreggetanyo a Sipipigsa”

“Pagreggetanyo a sipipigsa ti sumrek iti ruangan a nailet, ta kunak kadakayo, nga adu, dagiti agsapulto no kasano ti iseserrekda ket didanto mabalin.”​—LUCAS 13:24.

1. Aniat’ tartarigagayan ti kaaduan a tattao?

SALUDSODANYO ti innem ti tawenna a ni Robbie no apay a pagay-ayatna ti Kingdom Hall, ket isut’ sumungbat: “Maad-adalko ti maipapan ken Jehova ken ti Paraiso a mabalinkonto a pagnaedan iti nakabaybayag a tiempo a kadua dagiti nasasayaat nga an-animal.” Ti tallo ti tawenna a kasinsinna, a ni Dustin, nawadwad met bassiten ti maaw-awatanna maipapan iti inaldaw-aldaw a panagbiag dagiti dadakkelna ta ammona nga eksakto no kaano a kunaenna: “Kayatko ti mapan idiay Kingdom Hall!” Ti iyeb-ebkas ni Robbie, ken ti maad-adal metten nga iyebkas ni Dustin, ti makaay-ayo iti kaaduan a tattao​—ti biag, ti biag nga agnanayon. Kayat dagiti tattao ti “maisalakan.” Ngem kasano? Babaen laeng kadi ti itatabuno kadagiti narelihiusuan a panaggigimong?

2. (a) Apay a ti pannakaisalakan ket saan a mateggedan? (a) Kasano nga ipakita dagiti sasao ni Jesus idiay Lucas 13:24 no aniat’ kasapulan a maipaay iti pannakaisalakan?

² Saan a mateggedan ti pannakaisalakan babaen iti itatabuno kadagiti panaggigimong wenno iti dadduma pay a sabali a pamay-an. Daytat’ awan bayadna, maysa a sagut a naggapu iti Dios. Kaskasdi, addada sumagmamano a kalikaguman ni Jehova a Dios a panagregget iti biangtayo no kayattayo ti umawat iti sagut ti biag nga agnanayon. (Roma 6:23) Ania dagita? Ti maysa, isu ti sipipigsa a panagregget iti serbisiona! Dagitoy nga ar-aramid ti masapul a tignayen ti pudpudno a panangipateg. Ni Jesu-Kristo, nga Anak ti Dios iti naminsan adda maysa a lalaki a nagsaludsod kenkuana: “Apo, bassit aya dagiti maisalakan?” Ti sungbat ni Jesus ti nangsaklaw saan laeng a ti agsalsaludsod no di ket amin pay dagiti dadduma nga interesado iti pannakaisalakan, agraman kadatayo. Simmungbat: “Pagreggetanyo a sipipigsa ti sumrek iti ruangan a nailet, ta kunak kadakayo, nga adu dagiti agsapulto no kasano ti iseserrekda ket didanto mabalin.”​—Lucas 13:23, 24.

3. (a) Apay a ti saludsod daydiay tao ti naisangsangayan? (b) Kasano nga inramannatay ni Jesus iti sungbatna?

³ Ti saludsod daydiay di nanaganan a lalaki ti karkarna. Insaludsodna: “Bassit aya dagiti maisalakan?” saan a “Maysaakto aya kadagidiay bassit a maisalakan?” wenno, “Kasanoakto a maisalakan?” Nalabit ti pilosopia a Judio a limitado laeng ti bilang dagiti tattao a maikkan iti pannakaisalakan ti nangtignay iti daytoy nauneg pannakapanunotna a saludsod.a Aniaman ti gubuayan daytoy a panagusiusona, dagus nga innala ni Jesus ti saludsod manipud ti paset ti narikut a teoria nga inturong ti praktikal nga aplikasion​—ti personal nga aplikasion. Pinilitna ti agim-imtuod nga agpanunot no ania ti kasapulan nga aramidenna nga agpaay iti pannakaisalakan. Ngem nangnangruna pay ngem iti dayta, yantangay dagiti sasao ni Jesus a, “pagreggetanyo a sipipigsa,” ket adda iti plural a langana, daytat’ rebbeng a mangtignay met kadatayo nga agpanunot a naimbag maipapan iti wagas ti panagdaydayawtayo.

4. Aniat’ masapul nga aramidentayo tapno magun-odantayo ti biag nga agnanayon?

⁴ Ngarud, ti biag nga agnanayon, ket saan a nalaka a magun-odan kas ti panangipato ti sumagmamano a tattao. Impaganetget ni Jesus ti nagaget a panagtrabaho, agtultuloy a panagregget, kas ti “panagagawa a sumrek iti ruangan a nailet.” Daytoy di agkapuy a panagregget ti pappapigsaen ti naandor a pammati, ti pammati a naibangon iti panagtulnog kadagiti sursuro ni Kristo. Gapuna tapno magun-odan ti pannakaisalakan, masapul nga ad-adu ti aramidentayo ngem ti basta ‘panagdengngeg iti saona’; masapul a pagreggetantayo ti ‘panagaramid kadakuada.’​—Lucas 6:46-49; Santiago 1:22-25.

Masapul a “Makisarangetka” Itan

5. (a) Ania ti impasimudaag dagiti sasao ni Jesus a “pagreggetanyo a sipipigsa”? (b) Kasano a nayonan dagidiay a sasao ti ad-adu a kaipapanan ti panangmatmatyo iti sagrado a serbisio?

⁵ Aniat’ kaipapanan ti “pagreggetanyo a sipipigsa”? Iti orihinal a Griego, ti balikas nga a·go·niʹze·sthe, ti naadaw manipud sao nga (a·gonʹ) a kayatna a sawen “lugar a pagsasalipan.” “Makisarangetka,” kastat’ panangisao ti The Kingdom Interlinear Translation. Makapainteres, ta manipud iti daytoy isu met laeng a berbo a Griego inadawtayo ti Ingles a sao nga “agonize” wenno agrigrigat. Gapuna arapaapenyo ti maysa a kadaanan nga stadium ken iladawanyo ti atleta nga ita agrigrigat, wenno pagregreggetanna a sipipigsa a buyogen ti isuamin a pannakabalinna, a mangabak iti premio wenno gunggona. Gapuna, numan pay ti berbo a Griego a nairaman ditoy ket mabalin a maysa a teknikal a termino a maipaay iti pannakisalip kadagiti pagay-ayaman a Griego, ipagpaganetgetna ti pammagbaga ni Jesus iti panangala iti amin-kararua a panagtignay. Ti kagkaguduat’ puso a panagregget ket saan nga agbalin.​—Lucas 10:27; idiligyo ti 1 Corinto 9:26, 27.

6. Apay a masapul a pagreggetantayo a sipipigsa itan?

⁶ Kaano ken kasano kabayag ti “pannakisaranget a sumrek iti ruangan a nailet”? (Lucas 13:24 The New English Bible) Mingminganyo a naimbag dagiti sasao ni Jesus idiay Lucas 13:24, ket kitaenyo no kasano a pinaggiddiatna ti agdama, a “pagreggetanyo a sipipigsa,” iti masanguanan, a “sapulenyonto.” Gapuna, ita a mismo ti panawen a pannakisaranget. Kaawatan, dagidiay malappedan a sumrek sapsapulenda ti makastrek iti panawen a kumbiniente laeng kadakuada. Ngem daytanto ti naladaw unayen; ti ruangan ti gundaway ti naserraanen ken nakandaduanen. Intuloy a kinuna ni Jesus idiay Lucas 13:25 nga apaman a ti bumalay ket sinerraannan ti ruangan, mangruginton nga agtuktok ken agpakpakaasi dagiti tattao: “‘Apo, ilukatannakami.’ Ngem sumungbatto ket kunaennanto kadakayo, ‘Saankayo nga am-ammo ken no tagaanokayo.’” Anian a nakalkaldaang a pasamak ti agur-uray kadagidiay dida pinagbalin ti panagdayaw ken ni Jehova a kangrunaan a panggep iti panagbiagda itan!​—Mateo 6:33.

7. Kasano nga ipamatmat ti Filipos 3:12-14 ti agtultuloy a panagregget ken apay a nasken?

⁷ Ti pannakisarangettayo ket maysa nga agtultuloy a banag. Awan pay kadatayo ti nakastrek a naan-anay “iti ruangan a nailet.” Nabigbig ni Pablo daytoy. Ti pannakilumbana a maipaay iti biag ket maysa a narikut nga inaldaw-aldaw a panagregget. Insuratna: “Saan a nagun-odakon daytoy, wenno nagbalinakon a naan-anay, no di ket agtultuloyak tapno magun-odak daydiay nagun-odan ni Kristo Jesus nga agpaay kaniak. Kakabsat, diak pagarupen a nagun-odakon dayta. Ngem adda maysa a banag nga aramidek: Lipatek ti nalikudan ken pagreggetak ti adda iti masanguanan, agtultuloyak nga agturong iti kalat a mangabak iti gunggona a nangawisan ti Dios kaniak idiay langit a kadua ni Kristo Jesus.” (Kuami dagiti italiko.)​—Filipos 3:12-14, New International Version.

8. (a) Ania ti manglapped ti “adu” manipud biag nga agnanayon? (b) Ania a pakdaar ti iwaragawag daytoy kadatayo?

⁸ Asinoda dagiti “adu,” ket apay a saanda a makastrek? Dagiti “adu” ket nailasinda a kadua ti Kakristianuan, nangnangruna dagiti klase klero. Pagparparangenda a pagaammoda a sisisinged ni Jesus, kas paset ti sangakabbalayanna, babaen ti panagkunada a ‘nakipangan ken nakiinumda kenkuana.’ Ngem agsipud ta kayatda ti pannakaisalakan kadagiti kabukbukodanda a termino, a saan ket nga iti Dios, direkta nga ilibak ni Jesus ti panangammona kadakuada ket matmatmatanna ida kas “dagiti managaramid ti kinadakes.” (Lucas 13:26, 27) Dagiti tattao a naserraan manipud iti iseserrekda iti biag nga agnanayon ket mabalin nga iramanna pay dagidiay kimmapuy iti sagrado a serbisioda ken ni Jehova ket itan addaandan ti agpalpallailang nga iyaadani iti pudno a panagdayaw. Ti regtada a maipaay kadagiti intereses ti Pagarian ket apag-anem-em laengen. (Apocalipsis 3:15, 16) Pudno, mabalin nga addaanda pay met laeng ti ‘langa ti nadiosan a debosion’​—ti sangkabassit a serbisioda iti tay-ak ken ti itatabuno kadagiti panaggigimong​—ngem agkurang ti pammaneknek iti kita ti pammati nga isu ti pudpudno a makaiduron a puersa a maipaay iti nadalus a panagdayaw. (Idiligyo iti 2 Timoteo 3:5.) Saanda a nailasin a ti basta panagsapsapul a makastrek iti “ruangan a nailet” ket saan nga umdas. Ti maysa masapul a makisaranget tapno isut’ makastrek.

Apay a Lumasat iti “Ruangan a Nailet”

9. Apay a ti iseserrek iti ruangan a nailet kasapulanna ti panagregget a sipipigsa?

⁹ Ti ruangan a nailet nga agturong iti pannakaisalakan ti silulukat kadagiti isuamin. Ngem dagiti “adu” dida kayat ti makisaranget tapno makastrekda. Ania dagiti sumagmamano a bambanag maipapan iti iseserrek iti ruangan a nailet a makasapul iti napigsa a panagregget? Ti maysa a tao masapul nga umuna a magun-odanna ti umiso a pannakaammo iti Biblia, ken ammuenna da Jehova a Dios ken ni Kristo Jesus. (Juan 17:3) Daytoy kaipapananna ti panangiwaksi kadagiti tradision ken ar-aramid dagiti nailubongan a relrelihion, agraman dagidiay adda iti Kakristianuan. Kasapulan dayta ti panagaramid iti pagayatan ti Dios, kas ti inaramid ni Jesus bayat nga adda ditoy daga. (1 Pedro 2:21) Kas maysa a dedikado, bautisado a Kristiano, masapul a liklikan ti maysa ti materialismo, ti imoralidad, ken ti kinarugit ti lubong. (1 Juan 2:15-17; Efeso 5:3-5) Ket dagitoy masapul a maussobda ken masukatan kadagiti kas ken Kristo a kualidad.​—Colosas 3:9, 10, 12.

10. Aniat’ relasion ti panagteppel iti intay pananggun-od ti biag nga agnanayon?

¹⁰ Dagiti “bassit” ammoda ti pateg ti kinaregta iti ministerio, a napakuyogan iti panangipamatmat kadagiti bunga iti espiritu, agraman ti panagteppel. (Galacia 5:23) Babaen iti tulong ti nasantuan nga espiritu ni Jehova, pagreggetanda a matengngel ti bagida ken iturong dayta iti kalat ti biag nga agnanayon.​—1 Corinto 9:24-27.

Aniat’ Kaipapanan dagiti Sasao ni Jesus Kadakayo?

11. (a) Kadagiti ania a paspaset ti panagbiag a kasapulan dagiti dadduma ti inda panagregget a sipipigsa, ken apay? (b) Iti ania a trabaho ti mabalin a pakapagreggetan a sipipigsa ti isuamin?

¹¹ Kabarbaro man a nabautisarankayo wenno aktibotayon iti organisasion ni Jehova iti pinulpullo a tawen, awan koma ti panagkapuy iti panagreggetayo a mangay-ayo wenno mangparagsak kenkuana. Kas silalawag nga ipamatmat ti sasao ni Jesus, masapul nga amin-kararuatayo iti debosiontayo ken Jehova, a situtuloktayo a sumrek iti ruangan a nailet aniaman ti mapasamak. Numan pay saan laeng a salsalaysayen ni Jesus ti panangparang-ay ken panangpasayaat ti serbisiotayo iti Dios, para kadagiti dadduma kadatayo, kasapulan ti panagregget a sipipigsa tapno maparang-aytayo ti kababalintayo wenno maparmektayo dagiti dakes nga ug-ugalitayo tapno ‘ditay makaipaay iti aniaman a pakaitibkolan.’ (2 Corinto 6:1-4) Ti dadduma kadatayo kasapulan koma ti panangtedtayo ti agtultuloy nga atension iti naan-anay a programa ti personal a panagadal tapno ti ‘ayattayo umadu koma la nga umadu a buyogen ti umiso a pannakaammo ken naan-anay a pannakaawat.’ (Filipos 1:9-11) Kaskasdi dagiti dadduma kasapulanda met a pagreggetan pay ti inda itatabuno ken pannakipaset a regular kadagiti panaggigimong ti kongregasion, agraman ti Panagadal ti Libro iti Kongregasion, tapno ti ‘namnamada di maisin.’ (Hebreo 10:23-25) Ngem amintayo mabalintay ti kumita kadagiti mismo a personal a ministeriotayo iti tay-ak tapno makita no pudpudno met laeng a pagregreggetantayo a sipipigsa ti intay panangitungtungpal “ti aramid ti maysa a managebanghelio.”​—2 Timoteo 4:5.

12. Tapno masuot ti rukod ti naespirituan a panagreggettayo, ania a salsaludsod ti mabalin a maiyimtuod?

¹² Iti umad-adu a bilang, ti irarang-ayda iti panagreggetda a sipipigsa a mangay-ayo ken Jehova ti nangkualipikar kadakuada nga agbalin nga auxiliary a payunir, regular a payunir, wenno iti serbisio idiay Bethel. Ngem kadakayo ngay? No maysakay nga agibumbunannag ti Pagarian, mabalinyo kadi ti makiraman iti serbisio kas auxiliary a payunir iti mamin-adu a daras iti makatawen wenno uray agbalin pay a regular a payunir? No maysakayon nga auxiliary a payunir, pagregreggetanyo aya a maragpat ti serbisio kas regular a payunir? No saan, apay a dikay usigen ti panangaramid iti dayta? Iti daytoy a pamay-an mabendisionankayto iti panangsukay iti nasingsinged pay a pannakirelasion ken Jehova a Dios ken ni Jesu-Kristo.​—Salmo 25:14.

Makapagreggetkayo Pay Aya Tapno Makapagpayunir?

13. (a) No kayatyo ti agpayunir, ania a dua a bambanag ti nasken? (b) Tapno makapagpayunir, iti ania a paset ti panagbiag ti kasapulan a maaramid ti panagbalbaliw?

¹³ No makapagregular a payunirkayo ngem saankayo met a kasta, mabalinyo kadi ti “makisaranget” tapno makapagaramid iti panagbalbaliw iti panagbiagyo tapno makapagpayunirkayo? Dua a bambanag ti nasken. Umuna, masapul nga addaankayo ti tarigagay. Maikadua, masapul nga addaankayo met kadagiti umiso a kasasaad. No agkurangkay ti tarigagay, ikararagyo koma dayta. Makisaokayo kadagiti payunir. Parang-ayenyo dagiti agdama nga ar-aramidyo kas maysa nga agibumbunannag ti kongregasion. Makiramankayo iti serbisio kas auxiliary a payunir kaanoman a posible dayta. No di ipalubos dagiti kasasaadyo ti kasta a panagserbi ita, kitaenyo no mabalin ti makapagaramid iti panagbalbaliw. Ti maysa nga agtartrabaho nga asawa a babai mabalin a di kasapulan ti panagtrabahona. Ti maysa a nakalabesen iti edad iti panagretiro mabalin a di kasapulan ti panagtultuloyna nga agtrabaho. Ti nangato nga estandarte iti panagbiag, dagiti nagastos a panagbakasion, dagiti kabaruan a kotse, ken umas-asping kadagita, ket saanda a nasken iti panagbiag.​—Lucas 12:15; 1 Juan 2:15-17.

14. (a) Apay nga adda idi pagassawaan a saanda a kontento nga agtalinaed kas agibumbunannag iti kongregasion? (b) Ania a kalat ti inkeddengda iti sanguanan dagiti annakda?

¹⁴ Maysa nga ama nga addaan tallo nga annak a lallaki, a dua ti adda iti edad a masakbayan ti panagtin-edyerda, ti nangrugi a nagpayunir innem a tawen ti napalabasen. Apay? “Kayatko ti makapagaramid ti ad-adu pay,” inlawlawagna. “No makapagregular a payunirak ket saanak met a regular payunir, saanak nga agbibiag a maitunos iti dedikasionko.” Ni baketna nangrugi met nga agregular a payunir. Apay? “Kanayonak a nagauxiliary a payunir iti uppat a tawenen ket kamaudiananna nabigbigko a dayta gayam ket nalaka,” kunana. “Kayatko ti maaddaan iti naan-anay a pannakiraman iti daytoy a trabaho a nikaanoman dinto mauliten ken makaipakita iti umiso nga ulidan para kadagiti annakmi a lallaki.” Agpadpada a naammuan ti asawa a lalaki ken babai ti kinapudno kalpasan ti panagadalda iti unibersidad. “Dagiti dadakkelmi imbaondakami iti kolehio iti uppat a tawen,” kuna ti ama. “Ipakpakaammok kadagiti annako a lallaki a kaykayatmi ida nga agpayunir ken mangbusbos iti uray uppat la a tawenda idiay Bethel.”

15. (a) Agpaay kadagiti ania a rason a nagregget dagiti dadduma nga agserbi kas regular a payunir? (b) Agpaay iti ania a rason a tarigagayanyo ti maadda iti amin-tiempo a serbisio?

¹⁵ Dagiti sumaganad isuda dagiti rason no apay a dagiti dadduma naikeddengda ti panagbalinda a regular a payunir:

“Awan pulos panagrangrang-ayko iti naespirituan, nga isut’ makariribuk kaniak.” (Robert H.)

“Diak pulos kontento kas maysa a regular nga agibumbunannag.” (Rhea H.)

“Ti panagpayunir ti mangmangted ti direksion ken panggep ti panagbiagko.” (Hans K.)

“Kayatko ti makapagserbi a naan-anay ken ni Jehova, ket ti panagpayunir isut’ wagas a pannakapagaramidko iti dayta.” (Charanjit K.)

“Pagbabbabawyakto dayta no diak inusar ti pigsak, gagetko ken ti kinaagtutubok a makiraman iti daytoy naindaklan a trabaho.” (Gregory T.)

“Ni laeng Jehova ti mangbendision iti panagregget. Kasapulak ti panangted kenkuana iti banag a bendisionanna.” (Graceann T.)

“Ti panagpayunir tultulongannak a mangiyebkas no kasano ti panagriknak maipapan ken Jehova.” (Marco P.)

“Ti panagtartrabahok a kas mangmangged iti amin a tiempo ti di nangyeg iti ragsak kaniak nga isut’ mapalpaliiwko kadagiti payunir.” (Nancy P.)

Ania pay dagiti rason a mabalinyo a maipunno iti daytoy a listaan?

Ar-aramidenyo Kadi Amin a Kabaelanyo?

16. Dagiti kadi payunir laeng ti agregregget a sipipigsa? Ilawlawagyo.

¹⁶ Sumagmamano kadagiti Saksi ni Jehova ti sipupudno ken sikakararag a sinuksukimatda dagiti personal a kasasaadda ket naduktalanda nga ar-aramidenda amin a kabaelanda iti sidong dagiti agdama a kasasaadda. Nalabit maysakayo kadakuada. No kasta, maparegtakay koma. Ni Jehova ken ti Anakna maseknanda kadakayo ket pudpudno nga apresiarenda ti amin-kararua a serbisio. (Idiligyo iti Lucas 21:1-4.) Kas pangarigan, gapu kadagiti di nasayaat a napolitikaan wenno kasasaad iti panagbiag, iti sumagmamano a pagilian dagiti kakabsattayo agtartrabahoda iti siam nga oras iti kada aldaw, lima wenno innem nga aldaw iti kada lawas, tapno magun-odan laeng dagiti kasapulan iti panagbiag. Iti maysa a pagilian a sadiay ti trabaho dagiti Saksi ni Jehova ket adda panangiparit ti gobierno, dagidiay a makapagpayunir​—ket kadagitoy a pagilian addaanda ti rumangrang-ay a bilang dagiti payunir​—masansan isuda dagidiay retiradon, dagiti agtutubo nga addaan iti trabaho iti rabii, ken dagiti inna (nga addaan iti annak) a pawilan ti Estado manipud iti pannanggedda.

17. Kasano a ti kaso ni Epafrodito ipakitana a ni Jehova dina rukoden ti panagreggettayo babaen laeng ti kaadu ti trabaho a maaramidantayo iti serbisiona?

¹⁷ Kaskasdi mabalin a maikunayo, ‘addaanak la koma ti ad-adu pay a pigsa. No maysak pay la koma nga agtutubo manen!’ Ngem dikay koma maup-upay. Ti panagreggettayo ket saan nga istrikto a marukrukod babaen iti kaadu ti trabaho nga ar-aramidentayo iti sagrado a serbisio ti Dios. Malagipyo kadi ni Epafrodito? Idi isut’ masakit, ti kaadu ti napigsa a panagtrabaho a kabaelanna iti “aramid ti Apo” ti di koma maidilig iti naaramidanna idi isut’ naimbagen. Kaskasdi isut’ kinomendaran ni Pablo gaput’ panagreggetna. Kinapudnona, kas ipamatmat ni Pablo, rebbengna a ‘patgentayo a naimbag dagitoy a kita dagiti lallaki ken babbai.’​—Filipos 2:25-30.

18. (a) Kasano nga uray dagidiay adda iti limitado a kasasaad makaipaayda ti pammaregta iti amin-tiempo a serbisio idiay kongregasion? (b) Aniat’ maaramidanyo a mangparegta iti espiritu ti panagpayunir iti kongregasionyo?

¹⁸ Nupay kasta, adda banag a maaramidanyo tapno maparang-ay ti amin-tiempo a serbisio iti kongregasion. Ania dayta? Pagreggetanyo a sipipigsa ti panangiparangarang iti espiritu ti panagpayunir. Kas pangarigan, no dikayo kabaelan nga agdama ti agbalin a payunir gapu kadagiti obligasion ti pamilia, mabalin kadi a mawayawayaanyo dagiti dadduma iti pamiliayo​—ti asawayo, annakyo, kabsatyo a lalaki, wenno kabsatyo a babai​—tapno makapagpayunir? Dagidiay a nakapuy ti salun-atda wenno nalabit addaanda ti an-anayen mabalinda ti maaddaan iti interes kadagidiay a makapagpayunir, a makikuykuyogda kadakuada iti tay-ak ti serbisio no ipalubos dagiti adda a kasasaad. (Idiligyo iti 1 Corinto 12:19-26.) Iti daytoy a pamay-an amin nga adda iti kongregasion ket makapagreggetda iti panangipagpaganetget iti amin-tiempo a serbisio. Dagiti resultana agbalinto a makaparegta kadagiti isuamin!

19. Aniat’ rebbeng koma a determinasiontayo?

¹⁹ Aniat’ kaipapanan ti panagregget a sipipigsa kadakayo? Kaipapanan dayta kadi ti irarang-ayyo nga agturong iti bautismo? Wenno panangparmek iti sumagmamano a dakes nga ugali? Ti panangpapigsa iti pannakirelasionyo ken ni Jehova? Kaipapananna kadi dayta ti panagbalinyo nga auxiliary a payunir? Panagbalin a regular a payunir? Panagserbi idiay Bethel? Aniaman ti kalikaguman dayta kadakayo tapno makapagaramidkayo iti naespirituan nga irarang-ay, daytat’ maikari iti panagreggetyo itan. Gapuna, itultuloytay koma amin ti pannakisarangettayo a sumrek iti ruangan a nailet nga agturong iti biag nga agnanayon!

[Dagiti Footnote]

Dagiti Punto nga Usigen

◻ Ania ti kayat a sawen ni Jesus idi namalakad, “Pagreggetanyo a sipipigsa”?

◻ Kaano ken kasano nga agaplikar ti sasao ni Jesus kadakayo?

◻ Apay a dagiti “adu” didanto makastrek iti ruangan a nailet?

◻ Kasano a dagidiay adda kadagiti limitado a kasasaad makapagreggetda met?

◻ Iti kasano kabayag a masapul a makisarangettayo tapno makastrek iti nailet a ruangan?