Panangasaba iti “Amin a Kita ti Tattao”
1 No makasaotayo dagiti tattao a nagduduma ti kultura wenno relihionda, laglagipentayo a pagayatan ni Jehova a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Mainayon pay iti adu a naisangsangayan ti pannakaisaganana a bokleta ken broshur, adda dua a nagsayaat a publikasiontayo a mabalin nga usaren iti aniaman a tiempo a pangtulong kadagiti tattao nga addaan iti relihion ngem saanna nga insuro kadakuada ti kinapudno maipapan iti Dios ken ni Kristo.
2 Ti libro a Ti Panangbiruk ti Sangatauan iti Dios mangipaay iti nauneg a pannakaawat maipapan iti punganay dagiti kangrunaan a relihion ti lubong ket babaen iti dayta matulonganna dagiti tattao iti sadinoman tapno mapagdiligda ti pammatida ken ti isursuro ti Biblia maipapan iti kakaisuna a pudno a Dios. Iti sabali a bangir, babaen ti panangitampokna iti biag ni Jesu-Kristo, Ti Katan-okan a Tao a Nagbiag Pay Laeng matulonganna ti maysa a tao tapno ad-adda a maam-ammona ti Anak ti Dios ket maguyugoy kenkuana, kas iti adu a tattao idi umuna a siglo. (Juan 12:32) No maitutop, mabalinyo a padasen dagiti sumaganad a singasing no iyam-ammoyo dagitoy a libro.
3 No pagarupenyo a maitutop nga itukon ti libro a “Katan-okan a Tao,” mabalinyo nga isaludsod:
◼ “Aniat’ umapay iti isipyo no mapanunotyo ni Jesu-Kristo? [Palubosanyo a sumungbat.] Adu a historiador ti mangbigbig ken Jesus kas ti katan-okan a tao a nagbiag. [Mangadaw iti pagarigan manipud iti introduksion ti libro a Katan-okan a Tao.] Ipakita ti Biblia a ti biag ni Jesus ket modelo a tuladentayo.” Basaenyo ti 1 Pedro 2:21 ken ti umuna a parapo iti maudi a panid ti introduksion iti libro a Katan-okan a Tao. No interesado ti bumalay a mangammo iti maipapan ken Jesus, itukonyo ti libro. Sakbay a pumanawkayo, basaenyo ti Juan 17:3 sa isaludsodyo, “Kasanotay a magun-od daytoy a pannakaammo a mangiturong iti biag nga agnanayon?” Mangaramid kadagiti masnup nga urnos a panagsubli a mangipaay iti sungbat.
4 Inton agsublikayo a mangilawlawag no kasano a gun-oden ti makaited-biag a pannakaammo, mabalinyo a kunaen:
◼ “Inkarik nga agsubliak tapno ipakitak kadakayo no kasanotay a gun-oden ti pannakaammo a mangiturong iti biag nga agnanayon.” Ipakitayo ti libro a Pannakaammo, ken usarenyo ti umuna a kapitulo a pangidemostra iti panagadal.
5 No kayatyo nga itukon ti libro a “Ti Panangbiruk ti Sangatauan iti Dios,” mabalinyo nga isaludsod:
◼ “Gapu iti kinaadu ti relihion itatta, pinampanunotyo kadin no kasanotay a maammuan no ania kadagita ti anamongan ti Dios?” Kalpasan a sumungbat, luktanyo ti libro a Ti Panangbiruk ti Sangatauan iti Dios iti panid 377. Itampokyo ti punto numero 7, ket isaludsodyo no umanamong ti bumalay a ti pudno a relihion rumbeng a pagkaykaysaenna amin a puli ti sangatauan. Kitaenyo ti maysa kadagiti naisitar a kasuratan, ket no ipalubos ti oras, pagsaritaanyo ti dadduma kadagiti sabali pay a punto iti listaan. No pudno nga interesado, itukonyo ti libro. Inton pumanawkayo, isaludsodyo, “Kasanot’ rumbeng a panangapektar ti pudno a relihion iti kababalin ti maysa a tao?” Iyurnosyo ti panagsarungkar tapno sungbatanyo ti saludsod.
6 Inton agsublikayo a mangilawlawag no kasano nga apektaran ti pudno a relihion ti biag ti maysa a tao, mabalinyo nga isaludsod:
◼ “Panagkunayo kasanot’ rumbeng a panangapektar ti relihion iti kababalin dagiti tattao? [Palubosanyo a sumungbat.] Inikkannatayo ni Kristo iti estandarte a rumbeng a pakairukodan ti relihion.” Basaenyo ti Mateo 7:17-20 a direkta manipud iti panid 12 ti libro a Ti Panangbiruk ti Sangatauan iti Dios. Kalpasanna awisenyo ti bumalay a basaenna ti parapo 20 iti panid 13-14. No ipalubos ti oras, pagsaritaanyo ti parapo 25-9 iti panid 16-18. Mabalin a mangiturong daytoy iti panagadal iti broshur a Kalikaguman wenno libro a Pannakaammo.
7 Dagiti Pangirugi iti Saritaan: Adu ti katulongan iti panangisuro a masarakan iti libro a Ti Panangbiruk ti Sangatauan iti Dios, a mabalin nga usaren kas pangirugi iti saritaan iti damo nga ibibisita wenno iti panagsarungkar. Mairugiyo ti saritaan babaen laeng ti panangyimtuodyo iti maitutop a saludsod. Kas pagarigan, kitaenyo dagitoy a saludsod ken topiko ken dagiti panid a nakaisalaysayanda:
“Salsaludsod a Masapul a Sungbatan”—17-18.
“Maysa Kadi a Mitolohia ni Jesus?”—237.
“Asinot’ Nangisurat iti Biblia?”—241.
“Ti Qur’ān ken ti Biblia”—285.
“Ebidensiat’ Kinahusto ti Biblia”—340-1.
“Ti Patien dagiti Saksi ni Jehova”—356-7.
“No Kasano a Mailasin ti Pudno a Relihion”—377.
8 Mabalinyo nga usaren (dagi)ti napili a panid iti libro a Ti Panangbiruk ti Sangatauan iti Dios ket ilawlawagyo ti punto a naisalaysay. Kalpasanna iyurnosyo ti panagsarungkar babaen ti panangyimtuod iti mainaig a saludsod a mabalin a masungbatan iti broshur a Kalikaguman wenno iti libro a Pannakaammo. Siguraduenyo nga awisen ti bumalay iti Miting Publiko, ken mangibatikay iti handbill.
9 Amin a kita dagiti nasingpet-panagpuspusona a tattao agbirbirokda iti kinapudno maipapan iti Dios ken ni Kristo. Matulongantay ida iti trabahotayo a panangasaba. No kasta ngarud, itultuloytay ti ‘agtrabaho a sipipinget ken umagawa, agsipud ta insadagtayo ti namnamatayo iti sibibiag a Dios, a Manangisalakan iti amin a kita ti tattao.’—1 Tim. 4:10.