Makatulongtayo Amin iti Pannakairingpas ti Trabaho
1 Rumbeng a matarusan ti tunggal adalan ni Jesu-Kristo a napateg unay ti panangikagumaanna a mangsuporta ken makipaset iti trabaho a panangikasaba iti Pagarian. Ammo ni Jesus a nagduduma ti kaadu ti bunga ti Pagarian a patauden dagiti adalanna. (Mat. 13:23) Nupay dakkel ti maar-aramidan dagiti nagaget a payunir iti trabaho a panangasaba, makomendaran amin dagiti agtultuloy a sigagagar a mangipadayag iti Dios babaen ti panagbungada iti adu.—Juan 15:8.
2 Adu ti Maaramidan ti Sangsangkamaysa a Panagregget: Impadto ni Jesus a dakdakkel ti maaramidan ti sangsangkamaysa a panagregget dagiti amin nga adalanna ngem iti naaramidanna. (Juan 14:12) Limitado man ti maaramidantayo gapu kadagiti personal a sirkumstansiatayo wenno adu ti tiempotayo a mangikasaba iti Pagarian, makatulongtayo amin iti pannakairingpas ti trabaho. Maitunos dayta iti kinuna ni Pablo: “Amin ti bagi, gapu iti natunos a pannakasangal ken pannakaaramid nga agtitinnulong babaen ti tunggal nagsuopan a mangipaay iti kasapulan, maitunos iti panagtignay ti tunggal sinaggaysa a kameng iti maitutop a rukod, agaramid a maipaay iti idadakkel ti bagi.”—Efe. 4:16.
3 Nalabit ipagarup ti dadduma a saan unay a napateg ti panagreggetda. Nupay kasta, iti imatang ni Jehova, ti napateg ket agserbitayo iti amin-kararua. Napateg ken maapresiar amin a maaramidantayo maipaay kenkuana.—Idiligyo ti Lucas 21:1-4.
4 Itultuloyyo a Suportaran ti Trabaho: Addaantay amin iti pribilehio a tumulong iti namaterialan iti sangalubongan a trabaho. Makatulong met dagiti dadduma iti pisikal a trabaho a mainaig iti panangsuporta iti trabaho ti Pagarian. Mabalin nga ikagumaan ti tunggal maysa ti mangipaay kadagiti nasayaat pannakaisaganana a komento kadagiti gimong ken makipaset iti Teokratiko nga Eskuelaan ti Panagministro. Babaen ti pananggundaway kadagiti oportunidad a mangparegta kadagiti sabsabali, adda napateg a maitulongtayo iti espiritualidad ti kongregasion, ket daytoy ti mangparayray iti abilidad ti kongregasion a mangiringpas iti naitalek a trabaho.
5 Wen, makatulongtayo amin iti pannakairingpas ti trabaho. Ditay koma ipagarup a saantay unay a napateg. Ti sangsangkamaysa a panagreggettayo, dakkel man ken bassit, iti panagserbi ken Jehova isu ti mangipabigbig kadatayo kas dagiti kakaisuna a pudno a managdaydayaw ti Dios. (Mal. 3:18) Tunggal maysa kadatayo mabalintay ti maaddaan iti napateg a paset iti panangidayaw ken Jehova ken panangtulong kadagiti sabsabali a mangammo ken agserbi kenkuana.