Nagunggonaantayo Kadagiti “Dalan ti Dios iti Biag” a Kombension
1 Kadagiti laeng kallabes a bulan, agpalplanotayo idi a tumabuno kadagiti “Dalan ti Dios iti Biag” a Kombension Distrito. Ita nagbalindan a nakallalagip a pasamak iti teokratiko a pakasaritaan ti organisasion. Tinagiragsaktayo a naan-anay dagiti nabaknang a naespirituan a taraon nga inawattayo kadagidiay a naisangsangayan a taripnong.
2 Pudno a makaparagsak ti internasional nga aspeto dagiti kombension. Adda man wenno awan misionero ken dadduma pay a delegado manipud iti sabali a pagilian kadagiti timmabunuantayo, nakangngegtayo amin kadagiti nagsasayaat a kapadasan iti malem ti Biernes iti paset a napauluan “Serbisio iti Tay-ak ti Panagmisionero.” Makaparegta unay dagiti inaldaw a “Report iti Irarang-ay ti Trabaho a Panagani” iti intero a lubong.
3 Naisangsangayan a Publikasion a Nairuar: Ti naudi a palawag iti Biernes sinungbatanna ti saludsod ti adu a tattao a di makaammo iti kinapudno: “Adda Kadi Biag Kalpasan ti Ipapatay?” Nagngudo dayta a makapainteres unay a palawag babaen ti pannakairuar ti baro a broshur, Ania ti Mapasamak Kadatayo No Mataytayo? Bayat nga adalentayo dayta kadagiti Panagadal iti Libro ti Kongregasion ita a bulan ken inton Marso makitatayto ti kinapateg daytoy a broshur iti panangtulong kadagiti tattao a mangtarus iti kinapudno maipapan iti kasasaad dagiti natay. Liwliwaenna met dagiti natayan babaen ti namnama a panagungar.
4 Nagngudo ti programa iti malem ti Sabado babaen ti palawag a “Ti Namarsua—Ti Personalidad ken Daldalanna.” Inturongnatayo iti lohikal a konklusion a talaga nga adda Namarsua. Tapno maiwanwantayo a tumulong kadagiti sabsabali a mangapresiar iti daytoy a kinapudno, nairuar ti libro nga Is There a Creator Who Cares About You? Nupay mangparayray dayta iti mismo a pammatitayo ken Jehova ken ti apresasiontayo iti personalidad ken daldalanna, nangnangruna a nadisenio dayta a libro para kadagidiay nalabit di mamati iti Dios, nupay de adalda.
5 Naimpusuan a Resolusion: Ti naudi a palawag iti kombension impaganetgetna a datayo amin masapul nga ‘Itultuloytayo ti Magna iti Dalan ni Jehova.’ Babaen iti resolusion, anian a mayanatup ti panangipaduyakyaktay iti indibidual a determinasiontayo a kanayon a mangsurot, mangitandudo, ken mangitan-ok iti kinasuperior ti dalan ti Dios iti biag! (Isa. 30:21) Ita, masapul a determinadotayo a mangannurot kadagitoy. Anian a nagsayaat a naespirituan a pammabileg ti inawattayo babaen ti itatabuno iti “Dalan ti Dios iti Biag” a Kombension!