No Kasano nga Agtitinnulong Dagiti Miembro ti Pamilia Tapno Makiramanda a Naan-anay—Iti Panagadal iti Biblia
1 Ti kinapudno mangnayon iti napaypayso a kaipapanan ken panggep iti biag ti pamilia, ngem saan nga automatiko ti balligi iti panagserbi ken Jehova. Kasapulan ti tiempo ken panagregget tapno makaibangon iti sangakabbalayan a nabileg iti naespirituan. Nasken unay ti nasinged a panagtitinnulong dagiti miembro ti pamilia tapno maragpatda dayta. Daytoy umuna nga artikulo ti nagkatlo a paset a serye ipamaysana no kasano nga agtitinnulong dagiti pamilia a mangpatanor iti nasayaat nga ugali iti panagadal.
2 Babaen ti Inaldaw a Panagbasa iti Biblia: Kuna ti Proverbio 24:5 a “ti tao a mannakaammo degdeganna ti bilegna.” Ti pannakaammo a magun-od iti regular a panagbasa iti Sao ti Dios pabilgenna ti pakinakem ti maysa a tao tapno masarkedanna ti panangraut ni Satanas iti espiritualidadna. (Sal. 1:1, 2) Basbasaenyo kadi a sangapamiliaan ti Biblia nga inaldaw? Ti Eskediul iti Teokratiko nga Eskuelaan ti Panagministro nangibalabala iti “Kanayonan nga Eskediul ti Panagbasa iti Biblia” kada lawas iti makatawen. Tapno masurot dayta, sangapulo la a minuto ti busbosen ti pamilia iti kada aldaw. Mangpili iti kombeniente a tiempo a panagbasa iti Biblia ken panangusig iti inaldaw a teksto manipud iti Panangsukimat Kadagiti Kasuratan. Maaramid dayta sakbay ti pamigat, kalpasan ti panangrabii, wenno sakbay ti pannaturog. Pagbalinenyo daytoy a paset ti inaldaw a rutina ti pamiliayo.
3 Babaen ti Sangsangkamaysa a Panagadal iti Kada Lawas: Ti sangapamiliaan a panagadal iti Biblia isu koma ti kapatgan iti linawas nga aktibidad ti pamilia. Nasken a suportaran dayta ti tunggal miembro babaen ti sigagagar a pannakiramanda iti panagadal. Tarigagayan ti ulo ti pamilia nga usigen dagiti kasapulan ti pamilia kabayatan ti panagpilina iti adalen a material ken ti aldaw, oras, ken kaatiddog ti panagadal. Ipangpangrunayo ti panagadal ti pamilia iti linawas nga eskediul. Diyo ipalubos a mangsinga dagiti saan unay a napateg a bambanag.—Fil. 1:10, 11.
4 Ti maysa nga ama idiskonektarna ti telepono kabayatan ti panagadal ti pamilia tangay masansan nga adu ti umawag iti pagtaenganna mainaig iti negosio. No danonen dagiti kliente iti pagtaengan, maawisda a makipagadal wenno agurayda agingga a malpas. Determinado ti ama nga awan aniaman a mangsinga iti panagadal ti pamilia. Nagsayaat ti epektona daytoy kadagiti annakna. Rimmang-ay met ti negosiona.
5 Anian a makaparagsak no makitinnulong dagiti miembro ti pamilia kadagiti naespirituan nga aktibidad. Ti matalek a panagreggettayo a makiraman a naan-anay iti sangapamiliaan a panagadal iti Biblia ket mangyeg iti pamendision ni Jehova.—Sal. 1:3.