Baro a Programa ti Asamblea Sirkito
Ania dagiti praktikal a magunggonayo itan iti pannakipagnayo ken Jehova? Kasanoyo a masarkedan ti sulisog a panangitulok kadagiti di nateokratikuan nga aramid a mangsinga iti panangipangpangrunayo kadagiti interes ti Pagarian iti biagyo? (Mat. 6:33) Marigatankayo kadi a mangilasin iti naimbag ken dakes iti daytoy lubong a pagparangenna a naimbag ti dakes? (Heb. 5:14) Dagitoy ti mailawlawagto iti asamblea sirkito a “Magunggonaankayo Itan Babaen ti Pannagna iti Daldalan ti Dios,” a mangrugi inton Pebrero 2000.—Sal. 128:1.
Iti Sabado daytoy nga asamblea sirkito, baro a banag ti pannakaiparangto ti modelo a Gimong ti Serbisio. Pakaammuanto ti manangaywan ti sirkitoyo dagiti kongregasion no ania ti naiplano tapno makaumay ti isuamin a sisasagana a mangtagiragsak a naan-anay iti programa.
Ti paset a napauluan iti “Dakayo a Payunir—Itultuloyyo nga Aluadan a Siiinget ti Pannagnayo” ipakitana kadatayo no kasanotay nga usaren ti sirib ken kinanainkalintegan tapno gatangentayo ti nainggundawayan a tiempo a mausar iti panagpayunir. (Efe. 5:15-17) Ti tema nga “Agannadkayo Kadagiti Dalan a Kasla Agparang nga Umiso” isuronatayo a mangsigurado no ania ti makaay-ayo iti Dios iti tunggal aspeto ti biag. Ti palawag a “No Kasano nga Apektarannatayo ti Natungpalen a Padto” tumulong a mangpunno iti panunot ken pusotayo iti panagayat iti Sao ti Dios. Ti palawag publiko a “Ti Daldalan ti Dios—Anian a Makagunggona!” ipaganetgetna dagiti praktikal a magunggona itan babaen ti panangannurot kadagiti nalinteg a pagalagadan ni Jehova.
Tarigagayanyo kadi nga iparangarang iti publiko babaen ti bautismo iti danum a kayatyo ti magna iti daldalan ti Dios kas maysa kadagiti dedikado nga adipenna? No kasta makisaritakayo iti mamangulo a manangaywan tapno maaramid dagiti nasken nga urnos.
Determinadokayo koma a diyo langanan daytoy naintiempuan nga asamblea sirkito. Tabunuanyo ti intero a dua nga aldaw a programa, ta “bendito ti tunggal maysa nga agbuteng ken Jehova, a magna kadagiti daldalanna.”—Sal. 128:1.