Saan Aya a Nangngegtay Dayta Idin?
1 Wen nangngegtay daytan! Adu ti ulit-uliten ni Jehova iti Saona a pakagunggonaan ti ilina. Masansan nga inulit-ulit ni Jesus dagiti pannursurona maipapan iti nadumaduma nga aspeto ti Pagarian. Naynay nga inrepaso dagiti apostolna ti naespirituan a bambanag kadagidiay natibker ti pannakaipasdekda iti kinapudno.—Roma 15:15; 2 Ped. 1:12, 13; 3:1, 2.
2 Iti kaaldawantayo, inyurnos ti organisasion ni Jehova ti maulit-ulit a pannakairepaso dagiti napapateg a bambanag kadagiti gimong ti kongregasion. Addada publikasion a maulit-ulit a mapagadalan. Wen, napateg a mangngegan dagiti bambanag a nangngegtay idin!
3 Dakkel ti Maitulong ti Panangulit-ulit: Dagiti pammalagip ni Jehova paunegenna ti pannakaawattayo, palawaenna ti panangmatmattayo, ken pabilgenna ti determinasiontayo nga agtalinaed iti dana a naespirituan. (Sal. 119:129) Ti panangrepaso kadagiti estandarte ken prinsipio ti Dios ket umasping iti panagsarming. Tulongannatayo a mangsukimat iti bagbagitayo ken mangsumra iti pagannayasan nga agbalin “a mananglipat a managdengngeg.”—Sant. 1:22-25.
4 No isardengtayo a palagipan ti bagbagitayo iti kinapudno, dagiti sabsabali a banag ti mangimpluensia iti pusotayo. Dagiti pammalagip ti Dios pabilgennatayo a mangsarked kadagiti dakes nga impluensia ti lubong ni Satanas. (Sal. 119:2, 3, 99, 133; Fil. 3:1) Dagiti maawattayo a regular a pammalagip maipapan iti kaitungpalan dagiti panggep ti Dios tignayennatayo nga “agtultuloy nga agbantay.” (Mar. 13:32-37) Ti pannakaulit-ulit dagiti Nainkasuratan a kinapudno tulongannatayo nga agtalinaed iti dalan nga agturong iti biag nga agnanayon.—Sal. 119:144.
5 No Kasanotayo a Magunggonaan a Personal: Masapul a ‘pagannayasentay ti pusotayo kadagiti pammalagip ti Dios.’ (Sal. 119:36, NW) No mausig iti gimong ti kongregasion dagiti pamiliar a tema, agsaganatayo koma a nasakbay, kitaentayo dagiti naisitar a kasuratan, ken utobentayo no kasanotay a mayaplikar ti impormasion. Ditay koma libtawan ti agsagana para iti naisurat a repaso iti Teokratiko nga Eskuelaan ti Panagministro, a kunaentayo a saanen a nasken dayta. (Luc. 8:18) Ditay pulos kayat ti agbalin nga aleng-aleng gapu laeng ta masansan a maulit-ulit kadagiti gimongtayo dagiti pamunganayan a kinapudno.—Heb. 5:11.
6 Sapay koma ta tuladentayo ti kababalin ti salmista: “Iti dalan dagiti pammalagipmo nagrag-oak unay, kas iti amin a sabsabali a napateg a bambanag.” (Sal. 119:14, NW) Wen, nangngegtay idin dagitoy a napateg a bambanag, ken nalabit mangngegtayto manen dagita. Apay? Agsipud ta ammo ni Jehova a masapul a mangngegtayo dagita!