Pabaknangennatayo ti Bendision ni Jehova
1 Masansan a marukod ti balligi ti maysa a tao babaen ti kadakkel ti sueldona. Dayta ti gapuna a matmatan ti adu a tattao dagidiay nabaknang nga isuda ti kararagsakan ken mapmapnek unay. Ngem nakalkaldaang ta nagbiddut dagiti tattao a mangipagarup a magatang ti kuarta ti kinaragsak. (Ecl. 5:12) Awan manayon a rag-o dagidiay “determinado a bumaknang” iti material. (1 Tim. 6:9) Maisupadi iti dayta, pudno a narag-o dagiti adipen ni Jehova ken isuda ti kababaknangan a tattao ditoy lubong. (Prov. 10:22; Apoc. 2:9) Kasano a kasta?
2 Ebidensia a Nabaknangtayo: Addaantayo ti aglaplapusanan a naespirituan a pannakaawat ken pannakatarus iti Sao ti Dios, ti Biblia. Babaen ti naindagaan nga organisasion ni Jehova, naynay nga isursuronatayo maipapan kenkuana ken iti Anakna, para iti manayon a pagimbagantayo. No addaantay iti umiso a pannakaawat makaadanitayo ken Jehova ken matagiragsaktay ti nasinged a pannakirelasion kenkuana. (Sant. 4:8) No mailasintayo ti naimbag ken dakes ket surotentay dagiti linteg ti Dios masalaknibannatayo iti nadumaduma a sakit ken peggad. Agtalektayo nga ipaay ni Jehova dagiti kasapulantayo, a mangibunga iti nadiosan a pannakapnek ken talna ti panunot.—Mat. 6:33.
3 Tagtagiragsakentay ti talna ken panagkaykaysa kas agkakabsat iti naespirituan agsipud ta iparparangarangtayo dagiti bunga ti espiritu ti Dios. Gapu ta pinagkaykaysanatayo ti nabileg a singgalut ti ayat, ditay koma pulos panunoten a baybay-annatayo ti Dios wenno dagiti kakabsattayo no sumangbay kadatayo ti didigra.—Gal. 6:10.
4 Adda pudpudno a kaipapanan ken panggep ti biagtayo. Ibilangtay a nakaskasdaaw a pribilehio ti makiraman iti sangalubongan a panangikasaba iti naimbag a damag. Mangyeg daytoy iti manayon a rag-o bayat a tulongantayo dagiti sabsabali a maaddaan iti nasayaat a relasion iti Dios ken agserbi a kaduatayo iti nasin-aw a panagdayaw. Ti nagpateg a gamengtayo iti ministerio idayawna ni Jehova ken ipaayannatayo ti pannakapnek gapu ta makatulongtayo iti pannakasantipikar ti naganna. Mataginayontayo ti positibo a panagpampanunot, yantangay ammotayo a dandanin matungpal ti namnamatayo iti masanguanan.
5 Panangipakita iti Apresasiontayo: Sapay koma ta apresiarentayo a kanayon dagiti bendision ni Jehova, a mamagbalin kadatayo a pudno a kababaknangan a tattao ditoy daga. (Prov. 22:4) No inaldaw a pampanunotentay dagiti adda kadatayo, matignaytay nga agyaman ken Jehova gapu iti nabuslon nga ayatna ket agtultuloy nga ipaaytay kenkuana ti naipamaysa a debosiontayo.