Addakayto Kadi Sadiay?
1 Naminsan, adda nabayagen a Saksi a nagkuna: “No malanganam ti umuna nga aldaw ti kombension, anian a nagdakkel ti nakaikapisam!” Apay a kasta ti panangmatmatna? Ngamin, ti umuna nga aldaw ket pangrugian ti nabaknang a naespirituan a padaya nga insagana ti organisasion ni Jehova para kadatayo. (Isa. 25:6) Ipamatmat ti kaaddatayo sadiay manipud iti damo nga aldaw nga umannugottayo iti karirikna ti salmista: “Naragsakanak idi kinunada kaniak, intayon idiay balay ni Jehova.”—Sal. 122:1.
2 Ngem iti dadduma kadagiti “Naimpadtuan a Sao ti Dios” a Kombension Distrito itay napan a tawen, basbassit ti timmabuno iti Biernes ngem iti Sabado ken Domingo. Kaawatan nga adu a kakabsattayo ti naikapis kadagiti paset ti kombension a nangilawlawag iti napateg nga impormasion maipapan iti naimpadtuan a sao. Saanda pay a natagiragsak ti pannakilangen kadagiti kapammatianda.
3 Diyo Ipalubos a Lapdannakayo ti Panggedanyo: Nalabit saan a timmabuno ti dadduma iti Biernes gapu iti amakda a mapukawan iti panggedan. Nupay kasta, natakuatan ti adu a Saksi a palubosan ida dagiti amoda no nasapsapa nga agkiddawda iti bakasion. Natignay ti maysa nga amo gapu iti natibker a determinasion ti maysa a kabsat a babai a payunir a tumabuno iti amin a gimong ti kongregasion ken asamblea, nga uray la a nagmalmalem a timmabuno iti kombension.
4 Dikay koma ipato a dinto patgan ti amoyo ti panagbakasionyo wenno awan balena a malanganan ti maysa nga aldaw ti kombension. Agsaganakay a buyogen ti naimpusuan a pammati tapno mailawlawagyo a nainsiriban iti amoyo babaen ti Kasuratan no apay a ti itatabuno iti kombension ket napateg a paset ti panagdayawyo. (Heb. 10:24, 25) Kalpasanna, agtalekkay a naan-anay kadagiti kari ni Jehova, a siinanama nga awatenyo ti aniaman a banag a kiddawenyo no ipangpangrunayo dagiti naespirituan a kasapulanyo iti biag.—Mat. 6:33; Heb. 13:5, 6.
5 Ti kangrunaan a makatulong isu ti panangapresiar kadagiti “napatpateg a bambanag.” (Fil. 1:10, 11; Sal. 27:4) Tignayennatayo daytoy nga agplano tapno naan-anay a mabenepisiaran iti daytoy nasken a probision ni Jehova. Agplanokayo itan, ket ikeddengyo nga addakayto sadiay kabayatan ti tallo nga aldaw!