Ti Teokratiko nga Eskuelaan ti Panagministro Para iti 2001
1 Adu ti Nainkasuratan a rason no apay a rumbeng a naan-anay a makipasettayo amin aginggat’ mabalin iti Teokratiko nga Eskuelaan ti Panagministro.—Pro. 15:23; Mat. 28:19, 20; Ara. 15:32; 1 Tim. 4:12, 13; 2 Tim. 2:2; 1 Ped. 3:15.
2 Nabayagen a paset ti programa ti eskuelaan ti linawas a panagbasa iti Biblia. Agarup maysa a panid ti Biblia ti basaen iti kada aldaw. Mangrugi iti daytoy a tawen, addanto met panagbasa iti Biblia iti kada lawas ti naisurat a repaso (written review). Nalpasen ti kanayonan a panagbasa iti Biblia, a nayeskediul iti kallabes a tallo a tawen. Ngem no kayatyo nga ituloy ti agbasa iti Biblia uray nalpasen ti nayeskediul, mabalinyo ti agaramid iti bukodyo nga eskediul iti panagbasa.
3 Sanayen ti Paset Num. 2 dagiti kabsat a lallaki nga ‘agbasa [iti Sao ti Dios] iti publiko.’ (1 Tim. 4:13) No adda pasetyo nga agbasa, ulit-ulitenyo nga ensayuen dayta iti napigsa. Mabalinyo a denggen dagiti naibatay iti Biblia nga audiocassette ti Sosiedad tapno maparang-ayyo ti panagibalikas, panagbaliwbaliw ti boses, ken dadduma pay nga aspeto ti nasayaat a panagbasa.
4 Naibatay ti Paset Num. 3 ken Num. 4 iti libro a Panakirinnason, a nadisenio a maaramat iti panangasaba. No diyo masaklaw ti intero a naited a material iti naituding nga oras, pilienyo laeng ti kapraktikalan a punto a bumagay iti teritoria ti kongregasionyo. Mabalinyo nga usaren ti aniaman a kasasaad a mayannatup iti teritoriayo.
5 Ikabilyo amin a kabaelanyo a mangitungpal kadagiti pasetyo iti eskuelaan. Iwayaanyo ti agsagana a naimbag, ken nabiag koma ti panagsaoyo. Mapabilegyo ti kongregasion ken personal a magunggonaankayo no naimpusuan a makipaset iti Teokratiko nga Eskuelaan ti Panagministro iti tawen 2001.