Ti Report ni Jessica
NATUDINGAN ni Jessica, 13 ti tawenna a balasitang a taga Estados Unidos, agraman dagiti kaklasena nga agbitla maipapan iti tema a “Dios, Bandera, ken Pagilian.” Tangay ammona a kayat a maammuan dagiti padana nga estudiante no apay a di agsaludo iti bandera kas maysa a Saksi ni Jehova, situtured a ginundawayan ni Jessica daytoy a mangilawlawag iti pammatina. Ti sumaganad isut’ napili a paset ti reportna.
“Kada agsapa a panangrugi ti panageskuela, makiddaw kadagiti estudiante nga ibalikasda ti sapata ti kinasungdo, ngem maigapu iti pammati ken relihionko, diak aramiden dayta. Adu a tattao ti masdaaw no apay. Ibagak itan kadakayo.
“Ti umuna a sasao iti saludo ti bandera ket: ‘Isapatak ti kinasungdok iti bandera.’ Bueno ania ti kinasungdo? Daytat’ obligasion ti panangsuporta, kinamatalek, ken debosion. Tangay insapatakon ti kinasungdok iti Dios, saanen a mabalin ken diakton isapata ti kinasungdok iti bandera. Ngem ti diak panagdayaw wenno panangisapata iti kinasungdok iti bandera dina kaipapanan a diak pagraeman dayta.
“Ti Dios ti kapatgan iti biagko. Ar-aramidek ti amin a kabaelak a mangtungpal kadagiti bilinna a nailanad iti Biblia. Inaldaw nga agkararagak kenkuana, ket agkararagak met no kasapulak ti kanayonan a tulong wenno pammaregta. Kanayon nga awatek dayta a tulong ken pammaregta iti umiso a tiempo. Napaneknekakon a no ipangpangrunak ti Dios ken no aramidek ti bambanag nga imbilinna nga aramidentayo, naragragsakak.
“Isu a nupay diak agsaludo iti bandera, pagraemak dayta ken diak ibabain dayta iti aniaman a pamay-an. Ngem para iti Dios ti kinasungdok, ket maiparbeng la a kasta, agsipud ta pinarsuanak ken utangko dayta a kinasungdok kenkuana.”
Nakiddaw dagiti estudiante iti klase ni Jessica nga utobenda dagiti report a nangngeganda. Anian a ragsak ni Jessica ta kas resulta ti panagreggetna, imbaga dagiti kaklasena nga ad-adda a naawatandan ti pammatina. Napatpateg pay, dagiti agtutubo a situtured nga agsao maipapan kadagiti prinsipio ti Biblia ti mangparagsak iti puso ni Jehova a Dios!—Proverbio 27:11.