Saludsod
◼ Ania ti nasken a pagannadantayo no mangaskasaba kadagiti balud?
Iti sangalubongan, nasurok a walo a milion dagiti balud. Interesado ti dadduma kadakuada iti naimbag a damag. (1 Tim. 2:4) Agarup 1,400 a surat kada bulan ti maaw-awat ti maysa a sanga nga opisina manipud kadagiti balud ken kameng ti pamiliada nga agkidkiddaw iti literatura wenno personal nga isasarungkar. Nupay napudno ti interes dagiti adu a balud, ipakita ti kapadasan nga adda dagidiay agpammarang laeng nga interesado, a kayatda a gundawayan dagiti adipen ti Dios nga agpaay iti agimbubukodan a panggep. Nasken ngarud nga agannadtayo amin no mangaskasaba kadagiti balud.
Iti adu a kasasaad, makasabaan dagiti balud babaen kadagiti surat. Siiinget a maibalakad kadagiti kakabsat a babbai a saanda a suratan dagiti balud a lallaki, uray no panggepda ti tumulong iti naespirituan a pamay-an. Dagiti laeng kualipikado a kakabsat a lallaki ti rumbeng a mangibaklay iti dayta a responsabilidad. Mabalin a matudingan dagiti kualipikado a kakabsat a babbai a makisinnurat kadagiti balud a babbai a talaga nga interesado iti kinapudno a masarakan iti Biblia. Di rumbeng a patulodan dagiti balud iti kuarta wenno kadagiti personal a regalo, uray no makiddaw dagita.
No interesado ti maysa a balud, maited koma ti nagan ken address-na iti kongregasion nga adda iti lugar nga ayan ti pagbaludan. Kaaduanna, ammo dagiti kualipikado a kakabsat a lallaki sadiay no kasano a tamingen ti nadumaduma a kasasaad a mabalin a tumaud. No saan nga ammo no ania a kongregasion ti adda sadiay, maipatulod koma ti impormasion iti sanga nga opisina.
Dagiti natudingan a kakabsat a lallaki mabalinda ti mangangay kadagiti gimong para kadagiti balud tapno adu ti makapagadal nga aggigiddan. Nupay kasta, di rumbeng a maangay kadagiti pagbaludan dagiti naisangsangayan nga okasion a nawaya a makapulapol dagiti agibumbunannag dagiti balud. Maysa pay, di rumbeng a basta sumarungkar lattan dagiti agibumbunannag iti pagbaludan ken makilangen kadagiti balud.
‘Naannadtayo koma a kas kadagiti serpiente ket kaskasdi a nasingpet a kas kadagiti kalapati’ bayat nga iranudtayo ti naimbag a damag kadagiti balud.—Mat. 10:16.