Maawatan Dagiti Agdengdengngeg

NO AGSAOKA, saan a basta mangtedka laeng iti impormasion. Ikagumaam nga ipaawat ti ibagbagam kadagiti agim-imdeng. Makatulong daytoy kenka a makikomunikar a sieepektibo, palpalawagam man ti kongregasion wenno makisarsaritaka kadagiti saan a Saksi.

Adu dagiti aspeto ti nalaka a maawatan a panagsao. Nasalaysay ti dadduma kadagita iti Adalen 26, “Lohikal a Pannakabukel ti Material,” ken iti Adalen 30, “Panangipakita iti Interes Kadagiti Sabsabali.” Iti daytoy nga adalen, masalaysay ti sumagmamano a kanayonan a punto.

Simple a Sasao, Simple nga Estilo. Makatulong unay iti komunikasion dagiti simple a sasao ken ababa a sentensia. Ti Sermon ni Jesus iti Bantay ket nagsayaat nga ehemplo ti palawag a maawatan ti uray siasino a tattao wenno sadino man ti pagnanaedanda. Mabalin a kabarbaro a kapanunotan kadakuada dagita. Ngem maawatanda dagiti imbaga ni Jesus agsipud ta dagitoy ket maipapan kadagiti banag a pakaseknantay amin: no kasano ti agbalin a naragsak, no kasano a pasayaaten ti relasiontayo kadagiti sabsabali, no kasano a sanguen dagiti pakaringgoran, ken no kasano a maaddaan iti kaipapanan ti biagtayo. Maysa pay, inyebkasna dagiti kapanunotanna iti sasao a nalaka a maawatan. (Mat., kap. 5-7) Siempre, adu ti linaon ti Biblia nga ehemplo dagiti sentensia a nagduduma ti kaatiddog ken pannakabukelda. Ti koma panggepmo isu ti panangyebkas kadagiti kapanunotan iti wagas a nalawag ken nalaka a maawatan.

Uray no narigat a matarusan ti material nga ipalawagmo, nalaklaka a maawatan no simple ti estilom. Kasano a maaramidmo a simple? Saanmo a gabsuonan dagiti agdengdengngeg kadagiti di nasken a detalye. Organisarem ti materialmo tapno suportaranna dagiti kangrunaan a puntom. Piliem a siaannad dagiti kangrunaan a teksto nga usarem. Imbes nga umallatiwka a dagus kadagiti sabali a teksto, basaem ken salaysayem dagitoy. Saanmo a gaburan ti nasayaat nga ideya iti adu a sasao.

No mangyadalka iti Biblia iti pagtaengan, iyaplikarmo dagita a prinsipio. Saanmo nga ilawlawag amin a detalye. Tulongam ti iyad-adalam a mangtarus a silalawag kadagiti kangrunaan nga ideya. Inton agangay, iti personal a panagadal ken kadagiti gimong ti kongregasion, masursuronanto dagiti detalye.

Tapno simple ti pannakaidatag ti material, nasken ti nasayaat a panagsagana. Masapul a matarusam a naimbag ti topikom tapno maipaawatmo dayta kadagiti dadduma. No talaga a maawatam ti maysa a banag, mailawlawagmo dayta. Mayebkasmo met dayta iti bukodmo a sasao.

Ilawlawagmo Dagiti Termino a Saan a Pamiliar. No dadduma, ti panangipaawat iti bambanag kalikagumanna nga ilawlawagmo ti kaipapanan dagiti termino a saan a pamiliar kadagiti agdengdengngeg. Dimo lablabsen ti panangrukodmo iti pannakaammo dagiti agdengdengngeg kenka, ngem dimo met tagtagibassiten ti pannakaawatda. Gapu iti panagad-adalmo iti Biblia, mabalin a makausarka kadagiti termino a karkarna kadagiti dadduma. No dimo ilawlawag, dagidiay saan a naitimpuyog kadagiti Saksi ni Jehova saanda a maawatan a ti “natda,” “matalek ken masirib nga adipen,” “sabsabali a karnero,” ken “dakkel a bunggoy” ket agaplikar kadagiti espesipiko a grupo dagiti tattao. (Roma 11:5; Mat. 24:45; Juan 10:16; Apoc. 7:9) Kasta met, malaksid no adun ti ammo ti maysa a tao maipapan iti organisasion dagiti Saksi ni Jehova, mabalin a dina maawatan ti kaipapanan dagiti termino a kas iti “agibumbunannag,” “payunir,” “manangaywan iti sirkito,” ken “Memorial.”

Mabalin a masapul a mailawlawag dagiti dadduma a sasao iti Biblia a kanayon nga us-usaren uray dagiti saan a Saksi. Kadagiti adu a tattao, nuklear a pannakaikisap ti kaipapanan ti “Armagedon.” Mabalin nga inaigda ti “Pagarian ti Dios” iti kasasaad nga adda iti puso ti maysa a tao wenno iti langit ngem saan nga iti gobierno. No madakamat ti maipapan iti “kararua,” mabalin a sumiplot iti panunotda ti makunkuna nga espiritu ti tao nga agtultuloy nga agbiag no matay ti bagi. Sigun iti naisuro kadagiti minilion a tattao, ti “espiritu santo” ket maysa a persona, a paset ti Trinidad. Yantangay nagadu dagiti di mangikankano iti moral a pagalagadan ti Biblia, mabalin a kasapulanda pay ketdi ti tulong tapno maawatanda no ania ti kayat a sawen ti Biblia no kunana: “Adaywanyo ti pannakiabig.”​—1 Cor. 6:18.

Malaksid no regular nga agbasbasa dagiti tattao iti Biblia, mabalin a saanda a maawatan no kunam laeng, “Insurat ni Pablo . . .” wenno “Kuna ni Lucas . . .” Nalabit adda gayyem wenno kaarrubada a kasta ti naganda. Mabalin a masapul a nayonam iti sasao a mangilawlawag a maysa a Kristiano nga apostol wenno mannurat iti Biblia ti tuktukoyem.

Dagiti tattao kadagitoy a tiempo masansan a kasapulanda ti tulong tapno matarusanda dagiti teksto a naglaon kadagiti rukod wenno kustombre kadagiti nagkauna a tiempo. Kas pagarigan, mabalin a bassit ti kaipapananna kadakuada no ibagam a ti daong ni Noe ket 300 a kasiko ti kaatiddogna, 50 a kasiko ti kalawana, ken 30 a kasiko ti kangatona. (Gen. 6:15) Ngem no deskribirem dagita met laeng a rukod babaen ti panangipadam kadagiti lokal a patakder a pamiliar kadakuada, mailadawan a dagus dagiti agdengdengngeg ti kadakkel ti daong.

Ilawlawagmo No Kasapulan. Tapno nalawag ti maysa a banag kadagiti agdengdengngeg, mabalin a saan laeng a ti umiso a depinasion dagiti termino ti kasapulan. Idiay Jerusalem idi tiempo ni Esdras, ti pannakaibasa ti Linteg ket napakuyogan iti panangilawlawag. Tapno maala dagiti umili ti kababagasna, impaawat dagiti Levita ti Linteg ken inyaplikarda kadagiti kasasaad dagiti umili iti daydi a tiempo. (Neh. 8:8, 12) Iti umasping a pamay-an, ilawlawag ken iyaplikarmo dagiti teksto nga ibasam.

Kalpasan ti ipapatay ken panagungar ni Jesus, inlawlawagna kadagiti adalanna a ti banag a kapaspasamak ket kaitungpalan ti Kasuratan. Impaganetgetna met ti responsabilidadda a kas saksi kadagita a banag. (Luc. 24:44-48) No tulongam dagiti tattao a mangamiris no kasano a ti naadalda ket rumbeng nga impluensianna ti mismo a biagda, nalaklakada a maawatan ti talaga a kaipapananna.

No Kasano a Nainaig ti Puso. Siempre, uray no nabatad ti panangilawlawagmo, adda dagiti dadduma a makagapu no matarusan wenno saan ti maysa a tao ti sasawem. No natangken ti panagpuspusona, saanna a maawatan ti ibagbagam. (Mat. 13:13-15) Kadagidiay saan a naespirituan ti panangmatmatda kadagiti bambanag, minamaag kadakuada dagiti naespirituan a banag. (1 Cor. 2:14) No kasta ti kababalin ti maysa a tao, nainsiriban a gupden laengen ti saritaan​—uray iti dayta laeng a gundaway.

Ngem iti dadduma a kasasaad, saan a matignay ti puso gapu kadagiti narigat a sirkumstansia iti biag. No maipaayan iti umdas a panawen a dumngeg iti kinapudno a linaon ti Biblia, mabalin a lumukneng ti puso ti kasta a tao. Idi imbaga ni Jesus kadagiti apostolna nga isu ket masapsaplit ken mapapatayto, dida idi maawatan. Apay? Saan a dayta ti ninamnamada ken sigurado a saan a dayta ti kayatda a mapasamak! (Luc. 18:31-34) Nupay kasta, idi agangay, 11 kadagita nga apostol ti nakatarus, ket imparangarangda dayta babaen ti panagtignayda a maitunos kadagiti insuro kadakuada ni Jesus.

Epekto ti Nasayaat nga Ulidan. Matulongan dagiti tattao a mangtarus, saan laeng a babaen dagiti sawentayo no di pay ket babaen dagiti aramidtayo. No maipapan iti damo nga iyaayda iti Kingdom Hall, adu dagidiay mangibaga a ti malaglagipda isu ti ayat a naimatanganda, saan a dagiti nangngegda. Kasta met, gapu iti kinaragsak nga iparparangarangtayo, adu a bumalay ti natulongan a mangawat iti kinapudno a linaon ti Biblia. Gapu ta naimatanganda ti naayat a kinamanangngaasi nga ipakpakita dagiti tattao ni Jehova iti maysa ken maysa ken ti naasi a konsiderasionda kadagiti sabsabali iti sidong dagiti narigat a kasasaad, nakombinsir dagiti dadduma a pudno ti relihion dagiti Saksi. Isu a bayat nga ikagumaam a tulongan dagiti tattao a mangtarus iti kinapudno a linaon ti Biblia, utobem ti pamay-am a mangilawlawag iti dayta ken ti ulidanmo.