Paset 9—Panangikondukta Kadagiti Progresibo a Panagadal iti Biblia
Panangisagana Kadagiti Estudiante a Mangasaba iti Di Pormal
1 Idi nabigbig da Andres ken Felipe a ni Jesus ti naikari a Mesias, saanda a bimdeng a nangisarsarita iti dayta a makaparagsak a damag kadagiti sabsabali. (Juan 1:40-45) Kasta met ita, no dagiti iyad-adalantayo iti Biblia ket mamatida iti masursuroda, matignayda a mangisarsarita iti dayta. (2 Cor. 4:13) Kasanotayo a maparegta ida a mangasaba iti di pormal ken kasanotayo nga isagana ida a mangaramid iti dayta a sieepektibo?
2 Mabalinyo a damagen laeng iti estudiante no naisarsaritanan kadagiti sabsabali dagiti nasursurona iti Biblia. Nalabit nga adda dagiti gagayyem ken kameng ti pamiliana a maawisna a makiraman iti panagadal. Damagenyo kenkuana no adda katrabahuan, kaeskuelaan, wenno dadduma pay nga am-ammona nga interesado iti naimbag a damag. Mairuginan ti mangasaba iti daytoy a pamay-an. Tulonganyo a mangtarus iti kinapateg ti panangipakat iti pannakaawat ken ti panagbalin a nadayaw ken naanus no isarsaritana kadagiti sabsabali ti maipapan ken ni Jehova a Dios ken kadagiti panggepna.—Col. 4:6; 2 Tim. 2:24, 25.
3 Panangiranud Kadagiti Patpatienda: Nakapatpateg ti panangsanay kadagiti iyad-adalan iti Biblia a mangusar iti Sao ti Dios no iranudda dagiti patpatienda. Kadagiti napili a punto bayat ti panagadal, isaludsodyo iti iyad-adalanyo: “Kasanom nga usaren ti Biblia a mangilawlawag iti daytoy a kinapudno iti pamiliam?” wenno “Ania a teksto iti Biblia ti usarem tapno maipaneknekmo daytoy iti gayyemmo?” Siputanyo no ania ti isungbatna, ken ipakitayo kenkuana no kasanona nga ibasar iti Kasuratan ti isurona. (2 Tim. 2:15) No aramidenyo dayta, isagsaganayo ti estudiante a mangasaba agpadpada iti di pormal ken, no kualipikado, iti organisado a trabaho a panangasaba a kadua ti kongregasion.
4 Nainsiriban nga isagana dagiti mayad-adalan iti Biblia a sumango iti ibubusor. (Mat. 10:36; Luc. 8:13; 2 Tim. 3:12) No agsaludsod wenno agkomento dagiti sabsabali maipapan kadagiti Saksi ni Jehova, mabalin a mangted dayta iti gundaway kadagiti estudiante a mangasaba. Ti broshur a Dagiti Saksi ni Jehova—Siasinoda? Ania ti Patpatienda? ket makatulong kadakuada nga agbalin a “sisasagana nga agikalintegan.” (1 Ped. 3:15) Naglaon daytoy iti umiso nga impormasion a mausar dagiti estudiante a tumulong kadagiti maseknan a gagayyem ken kameng ti pamiliana a mangtarus kadagiti naibatay iti Biblia a patpatien ken aktibidadtayo.