Usarenyo Dagiti Makaisuro a Visual Aid
1. Kasano nga inusar ni Jehova dagiti visual aid tapno maisurona dagiti nagkauna nga adipenna, ken ania ti epektona?
1 No dadduma, agusar ni Jehova kadagiti sirmata ken tagtagainep tapno mayallatiwna ti napateg nga impormasion kadagiti nagkauna nga adipenna. Utobem ti sirmata ni Ezequiel maipapan iti nailangitan a karuahe ni Jehova. (Ezeq. 1:1-28) Panunotem ti rikna ni Daniel idi naawatna ti naimpadtuan a tagtagainep maipapan iti panagmartsa dagiti pannakabalin ti lubong. (Dan. 7:1-15, 28) Ti ngay makapagagar a paltiing maipapan kadagiti banag a mapasamak bayat ti “aldaw ti Apo,” a naipakita ken ni apostol Juan “babaen kadagiti pagilasinan”? (Apoc. 1:1, 10) Sinuruan ida ni Jehova babaen ti panangusarna kadagiti kasta a nabiag ken makapikapik a sirmata ken tagtagainep tapno narigatda a malipatan.
2. Ania dagiti visual aid a mabalintayo nga usaren iti panangisuro kadagiti sabsabali maipapan kadagiti kinapudno iti Biblia?
2 No kayattayo nga iyallatiw dagiti kinapudno iti Biblia kadagiti sabsabali iti pamay-an a narigatda a malipatan, mabalintayo met nga usaren dagiti video iti panangisurotayo. Adu a topiko ti saklawen dagiti video-tayo ken patanorenna ti panagtalek iti Biblia, iti organisasion ni Jehova, ken kadagiti prinsipio a mamagbalin kadatayo a nasaysayaat a Kristiano. Usigentayo ti sumagmamano a pamay-an no kasano a mausartayo dagiti video iti panangisurotayo. Dagiti sumaganad ket dadduma kadagiti video a mabalintayo nga usaren.
3. Ania ti mabalinyo nga usaren tapno maiturongyo iti organisasion ti maysa nga iyad-adalan iti Biblia?
3 Iti Ministerio: Naisarsaritayo kadin iti maysa nga iyad-adalan iti Biblia ti maipapan iti sangalubongan a panagkakabsattayo kas Kristiano? Ipakitayo dayta kenkuana babaen ti video nga Our Whole Association of Brothers. Mabalin nga ipabulodyo dayta kenkuana tapno buyaenna sakbay ti sumaganad a panagadal wenno buyaenyo a dua iti sumaganad a panagadalyo. Kalpasanna, pagsaritaanyo dagiti pangrepaso a saludsod a masarakan iti Hunio 2002 a Ti Ministeriotayo iti Pagarian.
4. Ania dagiti katulongan iti panangisuro a mabalin nga usaren ti maysa nga agtutubo a Saksi idiay eskuelaan?
4 Dakayo nga agtutubo, mabalinyo a kiddawen iti mannursuroyo nga ipabuyayo iti klaseyo dagiti video a Jehovah’s Witnesses Stand Firm Against Nazi Assault wenno ti Faithful Under Trials—Jehovah’s Witnesses in the Soviet Union. Dawatenyo ti pammalubosna a mangisaganakayo kadagiti saludsod. Kalpasanna, kitaenyo dagiti saludsod iti Hunio 2001 wenno iti Pebrero 2003 a Ti Ministeriotayo iti Pagarian sa ibagayyo dagita iti panagsasarita ti klaseyo.
5. Ania ti mabalin nga usaren dagiti nagannak iti panagadalda kas pamilia?
5 Iti Pamilia ken Gagayyem: Dakayo a nagannak, kaano ti naudi a pannakabuya dagiti annakyo iti video a Young People Ask—How Can I Make Real Friends? Apay a diyo buyaen manen dayta iti sumaruno a panagadalyo kas pamilia? Naglaon ti Abril 2002 a Ti Ministeriotayo iti Pagarian kadagiti saludsod para iti nabiag ken direkta a saritaan.
6. Kasanokayo a maaddaan iti makapabileg a panaglalangen a kadua dagiti gagayyemyo?
6 Adda kadi gagayyemyo iti kongregasion a kayatyo nga awisen iti pagtaenganyo? Ti panangbuyayo a sangsangkamaysa iti video a Respect Jehovah’s Authority pagbalinenna a makapabileg ti panaglalangenyo, nangnangruna no kalpasan ti panagbuya ket repasuenyo dagiti adal a nasursuroyo, nga usarenyo dagiti saludsod iti Setiembre 2004 a Ti Ministeriotayo iti Pagarian.
7. Ania dagiti gundaway a mabalinyo a pangusaran kadagiti video-tayo?
7 Dadduma Pay a Gundaway: Kadagiti ania pay a pamay-an a mabalinyo nga usaren a sieepektibo ti 20 a dadduma pay a video-tayo? Makatulong kadi iti siasinoman a regular a sarsarungkaranyo no ipabuyayo ti maysa wenno dua kadagita a video tapno rumang-ay iti naespirituan? Mabalinyo kadi a kiddawen nga ipabuyayo dagiti video iti pagaywanan kadagiti nataengan ken masaksakit iti lugaryo wenno iti maysa a pasilidad a mangipapaay kadagiti aktibidad para kadagiti nataengan? Makatulong kadi dagiti video tapno magun-odyo ti panagraem dagiti saan a Saksi a kabagian, kaarruba, ken katrabahuanyo? Makatukay, makaisuro, ken epektibo a visual aid dagiti video-tayo. Usarenyo ida a mangisuro.