Kualipikadoak Kadi a Mangasaba?

1. Apay a ditay pagduaduaan a kualipikadotayo a mangasaba?

¹ No pagduaduaam no kualipikadoka a mangasaba, dika agdanag! Saan a ti pormal nga edukasion wenno naisangsangayan nga abilidad ti kualipikasiontayo kas ministro. Nadeskribir ti dadduma kadagiti nagkauna nga adalan kas ‘awanan adal ken gagangay.’ Kaskasdi, epektiboda iti panangikasaba iti naimbag a damag gapu ta determinadoda a mangsurot iti ulidan nga impasdek ni Jesus.—Ara. 4:13; 1 Ped. 2:21.

2. Ania ti dadduma a pamay-an ti panangisuro ni Jesus?

² No Kasano a Nangisuro ni Jesus: Simple, praktikal, ken nalaka a maawatan ti panangisurona. Dagiti saludsod, ilustrasion, ken simple nga introduksionna ket makaguyugoy kadagiti dumdumngeg kenkuana. (Mat. 6:26) Nangipakita iti napasnek a pannakaseknan kadagiti tattao. (Mat. 14:14) Malaksid iti dayta, nagsao ni Jesus buyogen ti kompiansa ken autoridad gapu ta ammona a ni Jehova ti nangibaon ken mangpabpabileg kenkuana a mangitungpal iti annongenna.—Luc. 4:18.

3. Kadagiti ania a pamay-an a tultulongannatayo ni Jehova a mangitungpal iti ministeriotayo?

³ Tulongannatayo ni Jehova: Babaen ti Sao ken organisasionna, sansanayennatayo ti Naindaklan nga Instruktortayo tapno sibaballigi a maikasabatayo ti naimbag a damag. (Isa. 54:13) Yantangay intalimeng ni Jehova ti rekord maipapan iti panangisuro ni Jesus, kabaelantayo nga adalen ken tuladen dagiti pamay-anna. Ipapaay ni Jehova ti nasantuan nga espirituna ken sansanayennatayo babaen kadagiti gimong ti kongregasion. (Juan 14:26) Malaksid iti dayta, nangipaay ni Jehova kadagiti aduan kapadasan nga agibumbunannag a tumulong kadatayo nga agbalin a mas epektibo.

4. Apay a patientayo a kualipikadotayo a mangikasaba iti naimbag a damag?

⁴ Addaantay iti rason a mamati a kualipikadotayo a mangasaba yantangay ‘ti panagbalintayo a kualipikado agtaud iti Dios.’ (2 Cor. 3:5) Bayat nga agpannuraytayo ken Jehova ken simamatalek nga aprobetsarentayo dagiti naayat a probisionna, agbalintayo a “naan-anay koma a makabael, naan-anay a nakabalan maipaay iti tunggal naimbag nga aramid.”—2 Tim. 3:17.