Nakairugikayo Kadin iti Panangyadal iti Biblia iti Damo a Pannakisaritayo?
No maitukon ti panagadal iti Biblia, kuna ti dadduma a bumalay a saanda nga interesado wenno agad-adalda kano met iti Biblia iti simbaanda. Yantangay dida ammo a naiduma ti panagadaltayo iti Biblia no idilig kadagiti dadduma a relihion, saanda nga ammo nga adu ti masursuroda ken nagsayaat dayta a kapadasan. Gapuna, imbes nga itukonyo laeng ti panagadal iti Biblia, nasaysayaat no idemostrayo dayta iti sumagmamano a minuto iti damo a pannakisaritayo. Kas panangyilustrar: Saan laeng a basta ibagam a nalaingka nga agluto sa agsublikanto tapno mangtedka iti makan; imbes ketdi iparamanmo a dagus ti linutom! Adtoy ti maysa a singasing a naibatay iti Enero 2006 a Ti Ministeriotayo iti Pagarian, panid 6 no kasanoyo nga aramiden dayta iti sumagmamano laeng a minuto:
“Iti panagkunayo, dumtengto kadi ti panawen a matungpal dagitoy a sasao? [Basaenyo ti Isaias 33:24 sa palubosanyo a sumungbat.] Adda kayatko nga ipakita kadakayo mainaig iti daytoy.” Ikkanyo ti bumalay iti libro nga Isursuro ti Biblia sa ipakitayo ti parapo 22 iti panid 36. Basaenyo ti saludsod iti baba ti panid, ken ibagayo iti bumalay a siputanna ti sungbat bayat a basbasaenyo ti parapo. Kalpasanna, ulitenyo ti saludsod sa imdenganyo ti sungbatna. Basaenyo a dua ti dadduma pay a teksto iti parapo. Mangibatikayo iti saludsod a masungbatanto iti sumaganad a panagsarungkaryo, ken makitulagkayo no kaanokayo nga agsubli. Babaen ti kasta a pamay-an, nakairugikayon iti panagadal iti Biblia!