Aw-awisennaka ti Dios nga Agbalin a Gayyemna

Kayat ti Dios ti makigayyem kenka. Napanunotmo kadin a mabalinmo a gayyemen ti katan-okan a Persona iti uniberso? Ni Abraham, a nagbiag idi nabayagen a tiempo, naawagan a gayyem ti Dios. (Santiago 2:23) Dadduma a nadakamat iti Biblia tinagiragsakda met ti pannakipagayam ti Dios ket nabendisionanda unay. Itatta, nagbalinen a gagayyem ti Dios dagiti tattao manipud iti amin a paset ti daga. Mabalinmo met ti makigayyem iti Dios.

Nasaysayaat ti makigayyem iti Dios ngem ti makigayyem iti siasinoman a tao. Pulos a di paayen ti Dios dagiti nasungdo a gagayyemna. (Salmo 18:25) Nasaysayaat a gayyemnaka ti Dios ngem ti maaddaan iti kinabaknang. No matay ti tao a baknang, mabati ti kuartana iti sabsabali. Nupay kasta, adda gupit dagidiay mangtagtagiragsak iti pannakipagayam iti Dios a saan a maala ti siasinoman.​—Mateo 6:19.

Nalabit padasendaka a lapdan ti dadduma a tattao a mangam-ammo iti Dios. Nalabit uray ti dadduma a gagayyemmo ken ti pamiliam aramidenda daytoy. (Mateo 10:36, 37) No katawaandaka wenno butbutngendaka dagiti sabsabali, saludsodam ta bagim, ‘Siasino ti kayatko nga ay-ayuen​—dagiti tattao wenno ti Dios?’ Panunotem daytoy: No adda nangibaga kenka a saanka a mangmanganen, tungpalem kadi? Saan la ketdi! Manganka tapno agbiagka. Ngem ti Dios mapagbiagnaka nga agnanayon! Isu a dika ipalubos a lapdannaka ti siasinoman a mangammo no kasano a magayyemmo ti Dios.​—Juan 17:3.