Mangasaba a Situtured iti Lugar ti Negosio
1. Apay a saantayo a maupay no maamaktayo a mangasaba iti lugar ti negosio?
1 Maamakka kadi a mangasaba iti lugar ti negosio? No wen, saanka a maupay ta uray ni Pablo, a natured a ministro ket masapul nga ‘agurnong iti kinatured’ tapno makakasaba. (1 Tes. 2:2) Nailanad iti baba ti sumagmamano kadagiti gagangay a karit ken dagiti mabalintayo nga aramiden tapno mapagballigiantayo dagita.
2. Apay a saantayo a madanagan nga amangan no masuron dagiti trabahador?
2 Masuron Kadi Dagiti Trabahador no Makisaritaak Kadakuada? Iti adu a negosio, karaman iti trabaho dagiti empleado ti agserbi iti publiko isu nga isuda ti agpasangbay. Masansan a nadayawda yantangay mabalin nga ibilangdakayo a kostumer. Nasaysayaat ti panangtratoda kadakayo no natakneng ti kawesyo ken nainggayyemankayo.
3. Ania ti aramidentayo tapno saan a marurod dagiti kostumer?
3 Mangasabaak Kadi No Kaadu ti Kostumer? No posible, mangasabakayo iti lugar ti negosio iti oras a saanda unay nga okupado, kas koma no kaluklukatda. Asitganyo laeng ti manedyer wenno ti klerk no agmaymaysan. Ababa laeng ti presentasionyo.
4. Ania ti mabalintayo nga ibaga no mangasabatayo kadagiti lugar ti negosio?
4 Ania ti Ibagak? No adu ti trabahador, kasaritayo ti manedyerda. Mabalinyo nga ibaga: “Simmarungkarkami ditoy puestoyo gapu ta adu nga agtartrabaho ti saanmi a madandanon kadagiti pagtaenganda. Ammomi nga okupadokayo isu a saankami nga agbayag.” Tapno saanda nga ibaga nga aglaklakotayo, nasaysayaat no saantayo a dakamaten ti maipapan iti donasion malaksid no saludsodenda no paggapgapuan ti pondo ti trabahotayo. Depende iti klase ti negosio, mabalinyo nga ipakada iti manedyer no mabalinyo a kasarita iti apagbiit dagiti trabahadorna. Ulitenyo kadakuada ti presentasionyo. No okupado ti trabahador, paababaenyo ti presentasionyo sa mangibatikayo iti tract. No saanyo a mabalin a kasarita dagiti trabahador, mabalin a mangibatikayo lattan iti literatura.
5. Ania dagiti panggapuantayo a mangasaba a situtured kadagiti lugar ti negosio?
5 Situtured a kinasabaan ni Jesus ken ni Pablo dagiti tattao iti lugar ti negosioda. Kabaelanyo met nga aramiden dayta. (Mat. 4:18-21; 9:9; Ara. 17:17) Kiddawenyo ken Jehova a tulongannakayo nga agbalin a kalmado ken natured. (Ara. 4:29) Kanayon nga adda madanonyo kadagiti lugar ti negosio, isu nga apay a diyo padasen daytoy epektibo a pamay-an ti panangasaba?