Saludsod
◼ Siasino ti rumbeng a mangsurat kadagiti kupon ken kadagiti kiddaw iti Internet?
Dagiti publikasiontayo ket masansan nga addaan kadagiti kupon a mabalin a suratan sa ipatulod iti sanga nga opisina dagiti mayat nga agkiddaw iti literatura wenno mayat a masarungkaran dagiti Saksi ni Jehova. Malaksid iti dayta, mabalin met ti agkiddaw iti panangyadal iti Biblia iti Web site-tayo a www.watchtower.org. Daytoy a probision ket adu ti matultulonganna a mangammo iti kinapudno. Nupay kasta, adda timmaud a problema idi inusar dagitoy dagiti agibumbunannag tapno adda mangitulod iti literatura ken mangsarungkar kadagiti kakabagianda.
Adda dagiti napatulodan iti literatura uray saanda met a nagkiddaw iti sanga nga opisina. Nagreklamo dagitoy ta iti panagriknada ket gunggundawayan ida ti organisasiontayo gapu ta inramantayo ida iti listaan dagiti regular a mapatulodan iti literatura wenno adbertismen. Dagiti agibumbunannag a nakaawat iti notice a mangsarungkar iti maysa a saan met a nagkiddaw a masarungkaran ket mabainan no masuron ti indibidual. Gapuna, dagiti kiddaw iti Web site-tayo wenno babaen kadagiti kupon ket masapul nga aggapu a mismo kadagiti interesado saan ket a kadagiti agibumbunannag. Saan nga asikasuen ti sanga nga opisina dagiti kiddaw no maammuanda a dagiti agibumbunannag ti naggapuan dayta.
Kasanotayo ngarud a matulongan iti naespirituan dagiti kabagian wenno am-ammotayo? No kayatyo a maaddaanda kadagiti literatura, apay a saan a dakayo laengen ti mangted? No ibagada a kayatda ti agpasarungkar kadagiti Saksi ngem saanyo nga ammo no kasano a kontaken dagiti panglakayen iti lokal a kongregasion, suratanyo ti porma a Please Follow Up (S-43) sa itedyo iti sekretario ti kongregasionyo. Repasuen dayta ti sekretario sa ipatulodna iti sanga nga opisina. Ngem no ti interesado ket adda iti pagbaludan, rehabilitation center, wenno ospital, saan a rumbeng a kontakenyo ti sanga nga opisina agpaay iti dayta a tao. Imbes ketdi, iparegtayo kenkuana a makisarita kadagiti kakabsat a sumarsarungkar iti pasilidad nga ayanna wenno agsurat a mismo iti sanga nga opisina.