Saludsod

◼ Rumbeng kadi nga usaren dagiti agibumbunannag ti Internet tapno kasabaan wenno iyadalan dagiti estranghero nga agnanaed iti sabali a pagilian?

Adda dagiti agibumbunannag a nangusar iti Internet tapno maaddaanda iti iyad-adalan iti Biblia kadagiti pagilian a maiparit ti trabahotayo wenno manmano ti agibumbunannag. Nupay nasayaat ti resulta iti dadduma a kaso, adda dagiti peggad no dagiti agibumbunannag ket makikomunikar kadagiti estranghero babaen ti e-mail wenno chat room. (Kitaenyo ti Hulio 2007 a Ti Ministeriotayo iti Pagarian, p. 3.) Nupay ti panggep ket maidanon ti mensahe ti Pagarian kadagiti nasingpet a tattao, ti kasta a pannakikomunikar mabalin nga iturongna ti maysa a kabsat a makilangen kadagiti dakes a tattao, agraman kadagiti apostata. (1 Cor. 1:19-25; Col. 2:8) Kanayonanna, kadagiti pagilian a maiparit ti trabaho ti Pagarian, dagiti kasta a pannakikomunikar ket mabalin a monmonitoren dagiti autoridad ken pagpeggadenna dagiti kakabsat kadagita a lugar. Gapuna, saan a rumbeng nga usaren dagiti agibumbunannag ti internet a pangbirokan kadagiti tattao iti sabali a pagilian tapno mairanudda ti naimbag a damag.

No adda estranghero a bumisbisita manipud iti sabali a pagilian a makasabaantayo iti di pormal, saantay koma a padasen a parayrayen ti interesna apaman a makaawid, malaksid no adda instruksion kadatayo ti sanga nga opisina iti lugartayo. Imbes ketdi, ipakitatayo kenkuana no kasanona nga usaren ti jw.org a mangala iti kanayonan nga impormasion wenno no kasanona a makontak ti sanga nga opisina iti pagilianna. Mabalin met a paregtaentayo a mapan iti Kingdom Hall nga asideg iti pagtaenganna. Siempre, awan ti Kingdom Hall iti dadduma a pagilian. No kayatna nga adda Saksi a bumisita kenkuana, masapul a punnuantayo ti Please Follow Up (S-43) form sa ited iti sekretario, ket isu ti mangipatulod iti dayta babaen ti jw.org. Ti sanga nga opisina a mangiwanwanwan iti trabaho iti pagilian a pagnanaedan ti interesado ket pamiliar kadagiti nagpaiduma a kasasaad sadiay. Dayta met la a sangay ti kasayaatan a makaipaay iti naespirituan a tulong.—Kitaenyo Ti Ministeriotayo iti Pagarian, Hunio 2014, p. 7, ken Nobiembre 2011, p. 2.

No ti madama a sarsarungkarantayo ket umakar iti sabali a pagilian wenno no adda madama nga iyad-adalantayo iti sabali a pagilian a naam-ammotayo laeng babaen ti Internet, masapul a surotentayo ti instruksion a nadakamat iti ngato. Nupay kasta, mabalin nga itultuloytayo a parayrayen ti interesna agingga nga adda mangituloy nga agibumbunannag a kalugaranna. Ngem no ti indibidual ket agnanaed iti pagilian a maiparit ti trabahotayo, agannadtayo koma a naimbag no dagiti topiko ti Biblia ti madakamat iti pannakikomunikar babaen ti surat, telepono, wenno aniaman nga elektroniko nga alikamen.—Mat. 10:16.