TULONG PARA ITI PAMILIA | PANAGASAWA
No Kasano nga Ibati ti Trabaho “iti Pagtrabahuan”
Gapu iti teknolohia, mabalin a panunoten ti boss-mo, dagiti katrabahuam, wenno klientem a mabalindaka a kontaken aniaman nga oras wenno aldaw. Gapu iti dayta, marigatanka a mangbalanse iti panawenmo iti trabaho, iti asawam, ken iti dadduma pay a napapateg nga aspeto ti biagmo.
Ti masapul a maammuam
Gapu iti teknolohia, mabalin nga agawen ti trabaho ti panawenmo iti asawam. Kas resultana, ti tunggal tawag, e-mail, wenno teks a maaw-awatmo maipapan iti trabaho ket masapul nga asikasuem a dagus.
“Kasla imposible itan a makaduam ti pamiliam no makaawidka kalpasan ti trabaho. Ngamin, makaawatka iti e-mail ken tawag maipapan iti trabaho isu a maagaw met laeng ti panawenmo iti asawam.”—Jeanette.
Tapno mabalanse ti atensionmo iti trabaho ken iti pamiliam, masapul nga adda aramidem. No saanka nga agplano, mabalin nga agawen ti trabaho ti panawenmo a para iti asawam.
“Masansan a ti panawenmo iti asawam ti umun-una a maisakripisio gapu ta pampanunotem, ‘Maawatannak. Mapakawannak. Asikasuekto inton madamdama.’”—Holly.
Dagiti mabalinmo nga aramiden
Iyun-unam ti asawam. Ti kuna ti Biblia: “Saan a pagsinaen ti tao ti pinagtipon ti Dios.” (Mateo 19:6, Ti Baro a Naimbag a Damag Biblia) No saanmo nga ipalubos nga adda tao a ‘mamagsina’ kadakayo nga agassawa, apay nga ipalubosmo a pagsinaennakayo ti trabahom?
“Pampanunoten ti dadduma a kliente a gapu ta baybayadandaka, mabalindaka a tawagan kaanoman a kasapulandaka. Ngem gapu ta ti asawak ti prioridadko, ibagbagak kadakuada a saanak a mabalin no day off-ko. Ngem tawagak ida no nawayaakon.”—Mark.
Isaludsodmo iti bagim, ‘Ipakita kadi ti ar-aramidek a napatpateg ti asawak ngem ti trabahok?’
Saanmo nga awaten ti trabaho no kasapulan. Kuna ti Biblia: “Ti sirib adda kadagidiay naemma.” (Proverbio 11:2) No naemmaka, mabigbigmo a nasaysayaat no saanmo nga awaten ti maysa a trabaho wenno itedmo laengen dayta iti sabali.
“Maysaak a tubero. No adda agkasapulan iti serbisiok, ma-stress no saanak a makapan a dagus isu a mangirekomendaak lattan iti sabali a tubero.”—Christopher.
Isaludsodmo iti bagim: ‘Sidadaanak kadi a saan a mangawat iti ekstra a trabaho tapno saanko a mabaybay-an ti asawak? Patien kadi dayta ti asawak?’
Mangiwayakayo iti tiempo nga agkadua. Kuna ti Biblia: “Adda tiempo ti tunggal banag.” (Eclesiastes 3:1) No adu unay ti trabahom, ad-adda a kasapulan nga iwayaam ti makikadua iti asawam.
“Masansan a no nakaad-adu ti trabahomi, mangyeskediulkami iti panawen a makapagkaduakami a dakdakami laeng kas iti pangrabii wenno pannagna iti igid ti baybay.”—Deborah.
Isaludsodmo iti bagim: ‘Mangyes-eskediulak kadi iti panawen nga awan ti sabali nga asikasuek no di ti asawak? Kasta met kadi ti ibaga ti asawak?’
Iddepem ti gadyetmo. Kuna ti Biblia: ‘Siguraduenyo ti napatpateg a bambanag.’ (Filipos 1:10) Mabalinmo kadi nga iddepen sagpaminsan dagiti gadyetmo tapno saanka a maistorbo kadagiti teks wenno tawag manipud iti trabahom?
“Ikagkagumaak ti agsardeng nga agtrabaho iti inkeddengko nga oras. No madanon dayta nga oras, iddepek amin a notification iti selponko.”—Jeremy.
Isaludsodmo iti bagim: ‘Panagriknak kadi ket masapul a kanayon a makontaknak ti boss-ko wenno ti klientek no kasapulannak? Kasta met kadi ti ibaga ti asawak?’
Agbalinka a nainkalintegan. Kuna ti Biblia: “Maammuan koma ti amin a tattao a nainkalintegankayo.” (Filipos 4:5) Ti agpayso, adda dagiti panawen nga alaen ti trabahom ti orasmo a para iti asawam. Kas pagarigan, gapu iti kita ti trabaho ti asawam, masapul a makontak latta uray saan nga oras ti trabahona, isu nga agbalinka koma a nainkalintegan.
“Adda bassit a negosio ni lakayko ket masansan nga adda dagiti masapul nga asikasuenna uray nalpasen ti oras ti trabahona. Masuronak no dadduma, ngem okey laeng ta adu pay met ti panawenna para kaniak.”—Beverly.
Isaludsodmo iti bagim: ‘Maawatak kadi ti asawak no adu ti trabahona, a saan a nalabes ti kiddawek nga oras ken atensionna? Kasta met kadi ti ibaga ti asawak?’
Salsaludsod a pagsaritaan
Umuna, sungbatan ti tunggal maysa kadakayo dagitoy a saludsod. Kalpasanna, pagsaritaanyo a dua dagiti sungbatyo.
Nagreklamo kadin ti asawam ta agiyaw-awidka iti trabaho? No wen, adda kadi rasonna nga agreklamo?
Panagkunam, ania dagiti mabalinyo nga aramiden tapno ad-adda a balanse ti panawenyo iti trabaho ken iti dadduma pay a banag?
Panagkunam, kasla saan kadi a maibati ti asawam ti trabahona “iti pagtrabahuan”? No wen, adda kadi malagipmo a pagarigan?
Ania dagiti panagbalbaliw, no adda man, ti kayatmo nga aramiden ti asawam tapno agbalin nga ad-adda a balanse?