Nagusarda iti Purple Triangle
Ni Maud ket taga-France. Agtrabtrabaho iti maysa nga eskuelaan kas paraasistir kadagiti baldado nga ubbing bayat ti klaseda. Itay nabiit, ad-adalen ti klase ti maipapan iti Holocaust ken dagiti kampo konsentrasion dagiti Nazi. Dagiti balud kadagita a kampo ket masapul nga agisuot iti uniporme nga adda dekolor a retaso a lupot a naidait iti dayta. Ti kolor ken sukog ti retaso a naidait ti pakakitaan no apay a naibaludda.
Maipapan iti purple triangle iti uniporme ti dadduma a balud, kinuna ti maestro dagiti ubbing: “Siguro ti rason ket gapu ta bakla ken tomboyda.” Kalpasan ti klase, nakisarita ni Maud iti maestro ket inlawlawagna nga inusar dagiti Nazi ti purple triangle a pakailasinan dagiti Saksi ni Jehova.a Imbaga ni Maud a mangipakitanto iti sumagmamano nga impormasion maipapan iti dayta a topiko. Immanamong ti maestro ket kiniddawna ken Maud nga ibagana met dayta kadagiti estudiante.
Iti sabali a klase a kasta met laeng ti topikoda, nagusar ti sabali a maestra iti tsart a mangipakpakita iti nadumaduma a simbolo nga inusar idi dagiti balud. Husto ti tsart a mangipakita a ti purple triangle ti pakailasinan idi dagiti Saksi ni Jehova. Kalpasan ti klase, imbaga ni Maud nga ikkanna daytoy a maestra iti dadduma pay nga impormasion maipapan iti dayta a topiko. Immanamong ti maestra ket inyurnosna a makisarita ni Maud kadagiti estudiante.
Ipakpakita ni Maud dagiti publikasion nga inusarna
Nangisagana ni Maud iti 15-minuto a presentasion para iti umuna a klase, ngem idi mangrugi koman, imbaga ti maestra: “Maysa nga oras lattan.” Inrugi ni Maud ti presentasionna babaen ti panangipabuyana iti maysa a documentary video maipapan iti panangidadanes dagiti Nazi kadagiti Saksi ni Jehova. Idi ibagbagan ti video nga impanaw dagiti Nazi ti 800 nga ubbing nga annak dagiti Saksi, im-pause ni Maud ti video ken imbasana dagiti kapadasan ti tallo kadagita nga ubbing. Idi nalpasen ti video, inleppas ni Maud ti presentasionna babaen ti panangbasana iti pammakada a surat ti 19 anyos a Saksi a taga-Austria a ni Gerhard Steinacher idi 1940. Suratna dayta para kadagiti nagannakna sumagmamano nga oras sakbay a pinapatay dagiti Nazi.b
Kasta met laeng ti presentasion ni Maud iti maikadua a klase. Gapu iti kinatured ni Maud, sigsiguraduenen ti dua a titser a dakamatenda dagiti Saksi ni Jehova no isursuroda ti maipapan kadagiti biktima kadagiti kampo konsentrasion dagiti Nazi.
a Bayat ti Gubat Sangalubongan II, dagiti Saksi ni Jehova idiay Germany, a pagaammo met idi kas Bibelforscher (Estudiante ti Biblia), ket naibalud gapu ta saanda a kayat a suportaran dagiti Nazi.
b Ni Gerhard Steinacher ket nasentensiaan a matay gapu ta saanna a kayat ti agbalin a soldado iti armada ti Germany. Kunana iti pammakada a suratna: “Ubingak pay. Ti laeng kidkiddawek ket ikkannak koma ti Apo iti bileg tapno saanak a sumuko.” Napapatay ni Gerhard kabigatanna. Naisurat iti lapidana: “Pakaidayawan ti Dios ti ipapatayna.”