Kalmado Uray Nauyong Dagiti Padi

Ni Artur, a maysa a manangaywan iti sirkito idiay Armenia, ket bumisbisita iti maysa a kongregasion dagiti Saksi ni Jehova. Naammuanna a saanda pay a napadasan ti panangasaba iti publiko, a pakairamanan ti panangusar iti cart a pakaidispleyan dagiti literatura a naibatay iti Biblia. Tapno maiparegtana daytoy a pamay-an ti panangasaba, ni Artur ken ni Anna nga asawana ken ti sabali pay a Saksi a ni Jirayr ket nangikabil iti cart iti maysa a bassit nga ili. Nangpilida iti lugar nga adu ti aglabas a tao.

Dagus a naginteres dagiti lumablabas ket nangalada kadagiti literatura. Ngem di nagbayag, nadlaw met daytoy dagiti bumusbusor. Immasideg ti dua a padi ket bigla a kinugtaran ti maysa kadakuada ti cart. Kalpasanna, tinungpana ni Artur nga uray la natnag ti anteohosna. Inkagumaan da Artur, Anna, ken Jirayr a pagkalmaen dagiti padi ngem saanda ida a napasardeng. Binaddebaddekan dagiti padi ti cart sada inwarawara dagiti literatura. Pimmanawda kalpasan a pinagsasawan ken binutbutengda dagiti Saksi.

Napan da Artur, Anna, ken Jirayr iti presinto tapno ireportda ti napasamak. Kalpasan ti panangyestoriada iti napasamak, kinasabaanda iti apagbiit ti sumagmamano a polis ken ti dadduma pay nga agtrabtrabaho sadiay. Naipan dagiti tallo a Saksi iti opisina ti senior police officer. Idi damo, kayatna laeng a maammuan no ania ti reklamoda. Ngem idi naammuanna a saan a bimmales ni Artur idi natungpa uray no maskulado a lalaki, insardengnan ti agsaludsod maipapan iti reklamoda ket nagsaludsod maipapan kadagiti patpatien dagiti Saksi. Immabut iti uppat nga oras ti panagsasaritada! Nagustuan ti opisial dagiti nangngegna ket imbagana: “Nagmayat ti relihionyo! Kayatko dita!”

Kabigatanna, intuloy ni Artur ti panangasabana iti publiko. Immasideg ti maysa a lalaki a nakakita iti napasamak iti napalabas nga aldaw ket inapresiarna ni Artur ta kalmado laeng ken saan a bimmalbales. Imbagana pay a napukawen ti respetona kadagiti padi gapu iti dayta.

Karabiyanna, pinaayaban manen ti senior police officer ni Artur iti presinto. Ngem imbes a pagsaritaanda ti kaso, ad-adu pay ti insaludsodna maipapan iti Biblia. Nakiraman met ti dua pay a polis iti saritaanda.

Iti simmaganad nga aldaw, binisita manen ni Artur ti senior officer tapno mangipabuya iti dadduma kadagiti video-tayo a naibatay iti Biblia. Inayaban ti officer ti dadduma pay a polis tapno makipagbuyada met.

Gapu iti saan a nasayaat nga inaramid dagiti padi, adu a polis ti nakasabaan iti umuna a gundaway. Gapu iti dayta, nasayaaten ti panangmatmatda kadagiti Saksi ni Jehova.