Panangrespeto iti Panagduduma—Kasano a Makatulong ti Biblia?
“Ti panangrespeto iti panagduduma dagiti tattao ket agresulta iti talna.”—UNESCO Declaration of Principles on Tolerance, 1995.
No saantayo a respetuen ti panagduduma dagiti tattao, mangpataud dayta iti gura. Mabalin a kumaro dayta ket agresulta iti makapasakit a sasao, panangidumduma, ken kinaranggas.
Ngem saan nga agpapada ti opinion dagiti tattao no maipapan iti dayta. Adda dagiti mamati a no respetuem ti panagduduma dagiti tattao, anamongam ti amin nga ar-aramid ken ug-ugalida. Kapada met ti Biblia ti opinion ti dadduma. Uray no saanda nga anamongan ti kababalin ken patpatien ti sabsabali, respetuenda latta ti kalintegan dagita a tattao nga agpili.
Matulongannatayo kadi ti Biblia tapno maipakitatayo a resrespetuentayo ti panagduduma dagiti tattao ita?
Ti ibaga ti Biblia maipapan iti panangrespeto iti panagduduma
Ibaga ti Biblia a respetuentayo ti panagduduma dagiti tattao. Kunana: “Maammuan koma ti amin a tattao a nainkalintegankayo.” (Filipos 4:5) Parparegtaennatayo ti Biblia nga agbalin a nakonsiderar, nadayaw, ken patas. Ngem dina kayat a sawen dayta nga anamongan wenno tuladentayo ti kababalinda no di ket ipalpalubostayo laeng a pilienda ti kayatda.
Ngem ibaga ti Biblia no ania ti estandarte ti Dios maipapan iti kababalin dagiti tattao. Kunana: “O tao, imbaga [ti Dios] kenka no ania ti naimbag.” (Mikias 6:8) Mabasatayo iti Biblia dagiti bilin ti Dios a makatulong kadagiti tattao tapno agbalinda a pudpudno a naragsak.—Isaias 48:17, 18.
Saannatayo nga inikkan ti Dios iti kalintegan a mangukom iti sabsabali. Kuna ti Biblia, “Maymaysa ti nangted iti linteg ken Ukom . . . Asinoka a mangukom iti kaarrubam?” (Santiago 4:12) Ik-ikkannatayo ti Dios iti wayawaya nga agpili ket manungsungbattayo iti resulta dagita.—Deuteronomio 30:19.
Ti ibaga ti Biblia maipapan iti respeto
Kuna ti Biblia a ‘raementayo amin a kita ti tattao.’ (1 Pedro 2:17) Isu a dagidiay mangsursurot kadagiti estandarte ti Biblia raraemenda ti amin a tattao, aniaman ti patpatien wenno klase ti panagbiagda. (Lucas 6:31) Saanna a kayat a sawen daytoy nga anamonganda ti amin a patpatien wenno opinion ti dadduma wenno suportaranda ti amin a desisionda. Ngem imbes nga agbalinda nga awan respetona, ikagkagumaanda a tuladen ti panangtrato ni Jesus iti dadduma.
Kas pagarigan, adda babai a naam-ammo ni Jesus a sabali ti relihionna. Makikabkabbalay met daytoy a babai iti saanna nga asawa, ket siempre, saan nga anamongan ni Jesus ti kasta. Ngem narespeto latta ti pannakisaritana iti babai.—Juan 4:9, 17-24.
Kas ken Jesus, nakasagana dagiti Kristiano a mangilawlawag kadagiti patpatienda kadagidiay mayat a dumngeg, ngem aramidenda dayta nga addaan iti “nauneg a panagraem.” (1 Pedro 3:15) Ibilbilin ti Biblia kadagiti Kristiano a saanda nga ipilit dagiti opinionda. Ibagana a dagiti pasurot ni Kristo ket “saan a kasapulan a makiapa . . . , no di ket masapul a naalumamay iti amin,” a pakairamanan dagiti naiduma ti patpatienna.—2 Timoteo 2:24.
No ania ti ibaga ti Biblia maipapan iti gura
Kuna ti Biblia: “Ikagumaanyo ti makikappia iti amin a tattao.” (Hebreo 12:14, Ti Baro a Naimbag a Damag Biblia) Dagidiay mayat a makikappia ikkatenda ti gura. Aramidenda ti kabaelanda a makikappia iti sabsabali ngem saanda a tallikudan dagiti patpatienda. (Mateo 5:9) Kinapudnona, iparparegta ti Biblia kadagiti Kristiano nga ayatenda dagiti kabusorda babaen ti siaasi a panangtratoda uray kadagiti saan a nasingpet kadakuada.—Mateo 5:44.
Agpayso nga ibaga ti Biblia a “kagura,” wenno “karimon,” ti Dios dagidiay mangipababa wenno mangdangran iti dadduma. (Proverbio 6:16-19) Ngem inusar ti Biblia ditoy ti sao a “gura” a mangdeskribir iti nakaro a pananggurana iti dakes nga aramid. Ipakita ti Biblia a sisasagana ti Dios a mangpakawan ken tumulong kadagiti tattao a mayat a mangbalbaliw iti kabibiagda ken mangsurot kadagiti estandartena.—Isaias 55:7.
Teksto iti Biblia maipapan iti respeto
Tito 3:2: ‘Agbalinkayo a nainkalintegan, a naalumamay iti amin a tattao.’
Ti nainkalintegan a tao ket kalmado latta uray sabali ti opinion ti dadduma, isu a maipakitana latta ti respeto kadakuada.
Mateo 7:12: “Aramidenyo ngarud kadagiti tattao ti amin a kayatyo nga aramidenda kadakayo.”
Apresiarentayo no narespeto ti panangtrato kadatayo ti dadduma ken ikonsiderarda ti opinion ken rikriknatayo. Tapno maammuam ti ad-adu pay no kasano nga iyaplikar daytoy a pamiliar a bilin ni Jesus, kitaem ti artikulo nga “Ania ti Golden Rule?”
Josue 24:15: “Pilienyo . . . ita no asino ti pagserbianyo.”
No respetuentayo ti kalintegan ti sabsabali nga agpili, tumultulongtayo tapno maadda ti talna.
Aramid 10:34: “Saan a mangidumduma ti Dios.”
Awan ti pabpaboran ti Dios gapu laeng iti kultura, sekso, nasion, puli, wenno klase ti panagbiag. Dagidiay mayat a mangtulad iti Dios respetuenda ti amin a tattao.
Habakuk 1:12, 13: “Saan a panuynoyan [ti Dios] ti kinadakes.”
Saan a konsintidor ti Dios. Saanna nga ipalubos nga agtultuloy iti agnanayon dagiti dakes a kababalin ken aramid. Tapno maammuam ti ad-adu pay, buyaem ti video nga Apay nga Ipalpalubos ti Dios ti Panagsagaba?
Roma 12:19: “Bay-anyo a ti pungtot ti Dios ti agibales; ta naisurat: ‘Kukuak ti pammales; siakto ti agibales,’ kuna ni Jehova.”a
Saan nga inikkan ni Jehova a Dios ti asinoman a tao iti kalintegan nga agibales. Siguraduenna a maipaay ti hustisia iti naikeddeng a tiempo. Tapno maammuam ti ad-adu pay, basaem ti artikulo nga “Addanto Pay Ngata Kinahustisia?”
a Jehova ti personal a nagan ti Dios. (Salmo 83:18) Kitaem ti artikulo nga “Asino ni Jehova?”