La Bambouseraie—Pimmudno nga Arapaap
BABAEN TI KORESPONSAL TI AGRIINGKAYO! IDIAY FRANCIA
AGARUP 150 a tawenen ti naglabas, iti abagatan ti Francia, ni Eugène Mazel, agang-angkat kadagiti rekado manipud Asia, impasdekna ti nagbalin a kadakkelan iti lubong a pagpalakayan iti kawayan, a naglaon iti agarup 200 a kita daytoy napartak a dumakkel ken adut’ usarna a runo. Sakbay ti 1855, adda dakkel a tubeng iti arapaap ni Mazel: Saan nga agbiag idi ti kawayan idiay Europa.
Napaay dagiti gandat nga agangkat iti daytoy a kawayan manipud Asia. Nupay talaga a nalagda ti kawayan iti nakaisigudanna a lugar (maanduran ti dadduma a kita ti kawayan ti nababa a temperatura nga agingga iti -24 degrees Celsius ken agbiag uray kadagiti lugar nga agarup 5,000 a metro ti kangatona), imposible a mataginayon a nabiag dagiti ramutna bayat ti nawatiwat a panagbiahe kadagiti kontinente. Nupay kasta, gapu iti itataud dagiti naparpartak a barko, sibaballigi a nayangkat idiay Inglatera ti sumagmamano a kawayan idi 1827 ket kalpasanna, idiay Francia. Nganngani idin a pumudno ti arapaap ni Mazel!
Simmaruno a karit ken ni Mazel ti panangbirok iti maitutop a lugar a pagpalakayan. Idi 1855, gimmatang iti agarup 34 nga ektaria a daga iti asideg ti Anduze, iti abagatan ti Francia, a nagunggonaan iti klima ti Mediteraneo ken addaan iti nadam-eg a daga. Nasken ti dakkel a trabaho a panangiturong iti danum manipud ti asideg a karayan. Ngem nagballigi dagiti panagregget ni Mazel.
Makapaladingit ta idi 1890, nalugi ni Mazel ket inlakona ti nagpateg a hardinna. Nupay kasta, makaparagsak ta intuloy ti dadduma ti rinugianna, isu nga iti kada tawen, adda itan ti agarup 350,000 a tattao a mangpaspasiar iti La Bambouseraie—ti pimmudno nga arapaap ni Mazel.
[Picture Credit Line iti panid 31]
Amin a ladawan: La Bambouseraie de Prafrance