Nakristianuan nga Ayat Kontra Bulkan
BABAEN TI KORESPONSAL TI AGRIINGKAYO! IDIAY CAMEROON
SIRURUNGSOT a bimtak ti maysa a higante itay napan a tawen iti pagilian ti Cameroon idiay Makinlaud nga Africa. Ti Mount Cameroon ket maysa a bulkan nga 4,070 a metro ti kangatona iti patas ti baybay. Daytoy a panagbettak—ti maikalima a panagbettak ti bulkan bayat ti maika-20 a siglo—ket naipadamag a kapigsaan ken kakaruan.
Nangrugi ti didigra idi Sabado ti malem, Marso 27, 1999. Impadamag dagiti nakasaksi iti ili ti Buea nga adda iti sakaanan ti bantay, a kasta unay ti pannakagunggon dagiti diding ken pader, balbalay, ken uray kaykayo. Agarup alas otso trenta iti simmaganad a rabii, napasamak ti kapigsaan ken kakaruan a panagdayyeg iti rehion. Narikna dayta uray ti 70 a kilometro ti kaadayona a Douala. Kastoy ti paulo ti damdamag iti Le Messager idi Martes, Marso 30, 1999: “Panagbettak ti Mount Cameroon—250,000 a Tattao ti Agngangabit a Mauram.” Kinunana pay: “Namin-50 a nagdayyeg ti daga iti dua nga aldaw; addan timmaud nga 4 a wangawangan; ginasut a balbalay ti nadadael; narba ti palasio ti presidente idiay Buea.”
Ag-80 a Saksi ni Jehova ti agnanaed idiay Buea. Nadadael ti adu a balbalay ken saanen a matarimaan, agraman ti maysa nga us-usarenda kas Kingdom Hall. Nupay kasta, awan ti natay kadakuada.
Agtigtignay ti Nakristianuan nga Ayat
Dagus a nagtignay ti Nakristianuan nga ayat tapno masupusopan ti dinadael daytoy narungsot a higante. Nadutokan ti maysa a komite ti saranay, inyurnos ti Bagi a Manarawidwid dagiti Saksi ni Jehova ti pannakaiwaras dagiti kasapulan unay a pondo, ket ginasut a Saksi ti boluntario ken siaayat a nangipaay iti tiempo, pigsa, ken kuartada.
Nagipatulod ti adu a kongregasion dagiti Saksi ni Jehova iti suplay a taraon. Nagdonar ti maysa a Saksi iti 1,000 a hollow block. Adda met nangyurnos iti pannakagatang ti galba a pagatep a nalaka ti presiona. Pinagna met ti maysa a kabsat ti 16 a kilometro tapno makagun-od iti tabla. Maysa nga agkabannuag a lalaki a nagurnong iti kuarta a pagsab-ongna koma kadagiti agbalinto a katuganganna ti nangitantan iti kasarna ket inusarna ti kuarta a pangtarimaan iti chain saw-na. Napan idiay bakir ket tallo a lawas a nagragadi iti umdas a tabla para iti intero a balay! Lima a kilometro a sinusuon dagiti napigsa, agkabannuag a Kristiano a kakabsat a lallaki dagiti tabla agingga iti ayan ti trak nga agbunag kadagita.
Abril 24 idi nangrugi ti panagbangon. Nagtataripnong ti 60 a boluntario iti lugar a nadidigra. Kadagiti simmaganad a ngudo ti lawas, immadu ti boluntario agingga iti kangatuan a bilang a 200. Immay ti tallo a Saksi nga addaan iti amin-tiempo a trabaho iti ngudo ti regular nga aldaw ti trabahoda, ket nagibangonda agingga iti pasado alas dose ti rabii. Adda Saksi a taga Douala a nagtrabaho iti sekular a panggedanna iti intero nga agsapa; kalpasanna nagmotorsiko iti 70 a kilometro ken nagtrabaho agingga iti tengnga ti rabii sakbay a nagawid. Nairingpas ti innem a balay iti kurang a dua a bulan. Kabayatanna, intultuloy ti Kongregasion ti Buea ti naggigimong iti pribado a balay, nupay agarup doble iti bilang dagiti miembro ti kongregasion ti timmabuno kadagiti gimong.
Bayat daytoy met la a tiempo, nagiwaras ti komite ti saranay iti nasurok nga 40,000 a tableta a pangdalus iti kontaminado a danum ken impayospitalda ti agarup sangapulo a tattao a nagsakit ti bara ken aangsanda gapu iti makasabidong a gas ken dapo nga impugso ti bulkan. Ania ti reaksion dagidiay a nakasaksi iti daytoy a Nakristianuan nga ayat?
Naitandudo ti Nakristianuan nga Ayat
Kalpasan ti panangpaliiwna iti maysa kadagiti balay nga imbangon dagiti kakabsat, kinuna ti maysa a lalaki a taga Provincial Delegation of Agriculture: “Ti balay a mismo ket dakkel a pangsaksi . . . , maysa a pakakitaan iti ayat.” Kinuna ti maysa a maestra: “Ita laeng a nakakitaak iti kasta iti biagko. . . .Talaga a daytoy ti pagilasinan ti pudno a Kinakristiano.”
Natignay met dagidiay nagunggonaan a mismo. Kastoy ti insurat ni Timothy, nga agtawen iti 65 ken masaksakit: “Kada kitaenmi ti baro a balaymi, makasangitkami gapu iti rag-o. Kanayon nga agyamankami ken Jehova iti inaramidna kadakami.” Kimmurapay ti maysa a balo a saan a maysa kadagiti Saksi ni Jehova agraman ti uppat nga annakna idi narba ti balayda. Kalpasanna, ti materiales a pagatepna ket tinakaw dagidiay natangdanan a tumulong kenkuana. Tinulongan dagiti Saksi a boluntario. Kinunana: “Diak ammo no kasanok nga iyebkas ti panagyamanko. Napalalo ti ragsakko.” Kinuna ni Elizabeth nga asawa ti maysa a Kristiano a panglakayen: “Maragsakanak ta adda ayat iti organisasion ni Jehova. Ipakitana nga agserserbitayo iti sibibiag a Dios.”
Napigsa ti panagbettak ti bulkan, ngem dina napukaw ti Nakristianuan nga ayat daytoy a panagkakabsat. Kas iti naipaltiing nga insurat ni apostol Pablo, “ti ayat saan a pulos aggibus.”—1 Corinto 13:8.
[Dagiti ladawan iti panid 16]
Adu ti dinadael dagiti kasla karayan nga ayus ti narunaw a lava
[Ladawan iti panid 17]
Sigagaget a nagtrabaho dagiti boluntario tapno mabangon manen dagiti nadadael a balbalay
[Ladawan iti panid 16, 17]
Mount Cameroon