Daga nga Awanan Kadagiti Naimula a Bomba

SIASINO ti makasolbar iti parikut maipapan kadagiti bomba a naimula iti daga? Kas nakitatayon, ti panangikagumaan ti tao saanna a naan-anay a maikkat ti guranggura, kinapanatiko, ken kinaagum. Nupay kasta, mabigbig dagiti agad-adal iti Biblia a maipaay ti Namarsua ti manayon a solusion. Ngem kasano nga aramidenna dayta?

Panangipasdek iti Natalna a Kagimongan

Dagiti tattao ti aggugubat, saan a dagiti armas. Ngarud, no kayattay nga adda talna, masapul a mapukaw ti gura a mamagsisina kadagiti puli, tribu, ken grupo dagiti nasion. Ikari ti Dios nga aramidenna daytoy babaen ti Pagarianna, nga isu ti naisuro nga ikararag ti minilion iti intero a lubong.​—Mateo 6:9, 10.

Saritaen ti Biblia ni Jehova a kas “ti Dios a mangipaay iti talna.” (Roma 15:33) Ti ituktukon ti Dios a talna ket saan a naibatay kadagiti panangiparit ken tulagan, ken saan met a maipuon iti panagbuteng iti pammales ti nagadut’ armasna a kabusor a nasion. Maisupadi ketdi, ti aggapu iti Dios a talna ramanenna ti panangbalbaliw iti panagpampanunot ken kababalin ti tattao iti padada a tao.

Sursuruanto ni Jehova a Dios dagiti naemma kadagiti natalna a dalanna. (Salmo 25:9) Ikari ti Saona, ti Biblia, nga addanto tiempo nga amin dagidiay sibibiag “tattaodanto a nasursuruan ni Jehova, ket dakkelto ti talna dagiti annakmo.” (Isaias 54:13) Iti limitado a pamay-an, mapaspasamaken daytoy. Iti intero a lubong, nalatak dagiti Saksi ni Jehova a mangitantandudo iti talna uray pay kadagiti tattao a nagduduma ti nagtaudanda. Dagiti tattao a nasursuruan kadagiti natan-ok a prinsipio ti Biblia ikagumaanda ti agkaykaysa nga agbiag aniaman dagiti isyu a mabalin a mamagsisina kadakuada. Ti intero a panangmatmatda iti pananggura ket agbalin a panagayat gapu iti panagadalda iti Biblia.​—Juan 13:34, 35; 1 Corinto 13:4-8.

Malaksid iti panagadal, ti panagtitinnulong ti intero a lubong ti nabayagen a maibilbilang a solusion iti pannakapukaw dagiti armas. Kas pagarigan, irekomendar ti International Committee of the Red Cross nga agkaykaysa ti “internasional a komunidad” a mangitandudo iti pannakalapped ken pannakarisut ti pangta dagiti bomba a naimula iti daga.

Ikari ni Jehova a saan la a dayta ti aramidenna. Impadto ni propeta Daniel: “Mangipasdekto ti Dios ti langit iti maysa a pagarian a saanto a pulos maiyeg iti pannakadadael. . . . Rumekennanto ken pagpatinggaenna amin dagitoy [adda ita] a pagarian, ket dayta a mismo agtalinaedto agingga iti tiempo a di nakedngan.”​—Daniel 2:44, NW.

Ibanagto ti Pagarian ti Dios ti di kabaelan ti tao nga aramiden. Kas pagarigan, naimpadtuan a kunaen ti Salmo 46:9: “Pasardengenna [ni Jehova] dagiti gubgubat inggana iti ungto ti daga; rungrungdoenna ti bai ti pana, ket gupdenna a maminpinsan ti gayang; puuranna dagiti luglugan iti apuy.” Mangpataudto ti Pagarian ti Dios ti kasasaad a pudpudno a pangsagrapan ti tao iti pannakikappia iti Namarsua kenkuana ken iti padana a tao.​—Isaias 2:4; Sofonias 3:9; Apocalipsis 21:3, 4; 22:2.

Maliwliwa ni Augusto, a nadakamat iti introduksion ti artikulo a sinaruno daytoy, iti daytoy a mensahe ti Biblia. Tultulongan dagiti Saksi ni Jehova a dadakkelna tapno isut’ maaddaan iti pammati iti nakaskasdaaw a karkari ti Biblia. (Marcos 3:1-5) Siempre, masapul nga ibturanna pay laeng dagiti epekto ti panagbettak ti bomba a naimula iti daga a nangpukol kenkuana. Nupay kasta, in-inanamaen ni Augusto ti aldaw a matungpalton ti kari ti Dios a paraiso a daga. “Iti kasta,” impadto ni propeta Isaias, “maluktanton dagiti mata ti bulsek, ken . . . aglagtonto ti pilay a kas maysa nga ugsa.”​—Isaias 35:5, 6.

Iti dayta umay a Paraiso, saanton a mamagpeggad iti biag ken pakaigapuan ti pannakapukol dagiti bomba a naimula iti daga. Imbes ketdi, dagiti tattao nga agindeg iti amin a suli ti daga agnaeddanto a sitatalged. Kastoy ti panangdeskribir ni propeta Mikias: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada; ta ti mismo a ngiwat ni Jehova ti buyot sinaona dayta.”​—Mikias 4:4, NW.

Kayatmo kadi a maammuan ti ad-adu pay maipapan kadagiti kari ti Dios a nailanad iti Saona, ti Biblia? Makiumanka kadagiti Saksi ni Jehova iti lugarmo, wenno agsuratka iti maitutop a direksion a nailista iti panid 5 daytoy a magasin.

[Ladawan iti panid 8, 9]

Iti sidong ti Pagarian ti Dios, saanton a mamagpeggad dagiti bomba a naimula iti daga