Manipud Kadagiti Agbasbasa

Uniberso Kayatko ti agyaman kadakayo gapu kadagiti makaisuro nga artikulo maipapan iti nakaskasdaaw nga unibersotayo, kas iti “Ania ti Masarakan iti Labes Dagiti Planeta?” (Hulio 22, 1999) ken “Nasarungkaran Manen ti Nalabaga a Planeta.” (Nobiembre 22, 1999) Talaga a makapainteresda ken pinarayrayda ti panangapresiarmi iti Namarsua kadatayo.

M.A.T., Italia

Glaucoma Binasak ti bennegyo a “Pakdaar iti Panagbulsek” iti “Panangmatmat iti Lubong.” (Nobiembre 22, 1999) Innem a tawenen ti napalabas idi naeksamen nga addaanak iti glaucoma. Mabalin a kas iti kinuna ti artikuloyo, awan ut-ot a marikna ti adu a tattao nga addaan iti glaucoma. Nupay kasta, nakaro ti panagpanaas dagiti matak ken pasaray agsakit ti ulok uray no inaldaw nga adda ipatedtedko kadagiti matak. Saan ngata a dadduma a makabasa iti artikuloyo ti mabalin nga agpanunotto a kanayon a saan a naut-ot ti glaucoma?

H. M., Japan

Saan a naan-anay nga inlawlawag ti ababa a bennegmi daytoy a nakaro a sakit. Mas detalyado ti artikulo a “Glaucoma​—Mannanakaw ti Panagkita!” iti Mayo 8, 1988 a ruar, ket inlawlawagna a talaga a makarikna iti ut-ot ti dadduma a pasiente.​—ED.

Kurang ti Bulanna a Maladaga Kayatko nga iyebkas ti napalaus a panagyamanko iti artikulo a “Nasursuromi ti Agpannuray iti Dios Kadagiti Napasaranmi a Rigat.” (Nobiembre 22, 1999) Maipapan dayta iti pamilia Major ken ti napintas nga anakda a ni JoAnn. Naeksamen ti adiek a babai nga addaan iti autismo idi dua ti tawenna. Nagrigat ti makibagay iti sakit ni adingko, ngem gapu iti kapadasan ti pamilia Major, naapresiarmi unay no kasano kapateg ti agpannuray ken Jehova, agpapan pay iti aniaman a mabalin a mapasaranmi iti biag.

M. C., Estados Unidos

Naipasngay ti anakmi idi 1992, a kas ken ni JoAnn. Ag-700 a gramo laeng ti timbangna idi naipasngay! Insingasing dagiti doktor a mayalisonan iti dara. Imbaga pay ketdi ti maysa a doktor a madangran ti utekna no saanmi a payalisonan. Ngem nagkararagkami ken Jehova ket nakapagtakderkami a sititibker. Ita, ages-eskuelan ken awan ti pakakitaan a nadangran ti utekna.

C. H., Japan

Maysaak nga asawa ken ina ti tallo nga annak. Gapu ta awan trabaho ni lakayko, awan pamastrekanmi ken awan health insurance-mi. Ngem ti pakasaritaan ni JoAnn ken ti pamiliana ti nakatulong kaniak a mangtaming a saggaysa kadagiti kasasaad iti biag iti kada aldaw. (Mateo 6:34) Pagyamanan iti panangipalagipyo kaniak a saanak nga agpannuray iti bagik no di ket agpannurayak ken Jehova tapno maaddaanak iti bileg a mangdaer.

K. A., Estados Unidos

Maikaduapulo a Siglo Nagsuratak maipapan iti serye a “Maika-20 a Siglo​—Tawtawen ti Dakkel a Panagbalbaliw.” (Disiembre 8, 1999) Nasdaawak iti nalawag nga impormasion nga imparangyo maipapan iti napasarantayo a narikut a panawen kabayatan ti maika-20 a siglo. Naawatak met no kasano a ti kinaranggas ti in-inut a mangdaddadael iti sangatauan. Kablaawankayo iti nagsayaat a trabahoyo.

W. G., Puerto Rico

Abokado Kabasbasak ti artikulo a “Ti Abokado​—Prutas a Pudno nga Adut’ Pakausaranna!” (Disiembre 22, 1999) Talaga nga adunto ti maragsakan iti dayta nga artikulo. Siam pay la a bulanko idi nangrugiak a mangan iti abokado. Idi tallon ti tawenko, nasursurok ti agaramid iti guacamole. Ita, sangapulon ti tawenko. Pampanunotek dagiti tattao a dida kayat ti mangan iti sibuyas, a paset ti resipe nga insingasing ti artikuloyo. Isu a para iti resipek a guacamole, agusarak iti abokado, tubbog ti kalamansi, asin, Tabasco, ken natadtad a bawang.

N. E., Estados Unidos

Pagyamanan iti singasingmo!​—ED.