Multiple Chemical Sensitivity​—Misterioso a Sakit

Nagsaad ti balay ni Pam iti daga a kabalbalayan a nalawlaw kadagiti bangkag a pagmulmulaan iti kapas. Dagiti eroplano kanayon a pugsitanda dagiti bangkag kadagiti herbisidio ken pestisidio; ket masaprian iti kemikal dagiti asideg a balay, agraman ti balay ni Pam.

NANGRUGIN dagiti nakaro a panagsakit ti ulo ken panagrurusok ni Pam, ket kimmapuy ti salun-atna. Idi agangay, dakesen ti epekto dagiti substansia a kasla awan pakainaiganda kadagiti pestisidio: bangbanglo, deodorant, losion ti bagi, pagdalus, pintura, baro nga alpombra, asuk ti sigarilio, pagpabanglo iti kuarto, ken dadduma pay a substansia. Mairaman kadagiti sintoma a marikrikna ni Pam dagiti kadawyan a maigapu iti karkarna a sakit a maawagan iti multiple chemical sensitivity (MCS).a

“No makalang-abak kadagiti inaldaw a maus-usar a kemikal, mariknak a nabannogak unay ket mariro, maul-ulaw, ken rurusokenak,” inlawlawag ni Pam iti Agriingkayo! “Umbal ti bagik, ket no dadduma aganangsabak, mataranta ket diakon mapengdan ti agsangit, nakaparpartak ti panagpitik ti pusok ken ti pulsok, ket umadun ti pluido iti barak. Nakaituggod pay daytoy iti pulmonia.”

Nupay agduduma dagiti sintoma ti MCS iti tunggal tao, dagitoy mabalin nga iramanna ti panagsakit ti ulo, nakaro a pannakabannog, naut-ot a masel, nasakit a susuop, eczema, ragatunok, dagiti kasla sintoma ti trangkaso, angkit, problema iti sinus, panagdanag, panagleddaang, narigat a makatandaan, di makaipamaysa, insomnia, saan a regular a panagpitik ti puso, panagbubussog, panagrurusok, panagsarwa, panagsakit ti tian, ken panagkissiw. Siempre, adu kadagitoy a sintoma ti maigapu iti dadduma pay a sakit.

MCS​—Kumarkaro a Parikut

Idiay Estados Unidos, iparangarang dagiti surbey iti nadumaduma a grupo ti populasion nga adda iti nagbaetan ti 15 ken 37 a porsiento ti populasion a sensitiboda unay wenno alergikda kadagiti gagangay a kemikal ken angot ti kemikal, kas iti ipugso ti tambutso ti lugan, asuk ti sigarilio, kaus-usar a pintura, baro nga alpombra, ken bangbanglo. Nupay kasta, 5 a porsiento laeng wenno basbassit pay, depende iti edad dagiti nasurbey, ti nagkuna a naeksamen nga addaanda iti MCS. Babbai ti agarup tallo a kakapat kadagitoy.

Kuna ti adu nga agsagsagaba iti MCS a dagiti pestisidio ken solvent ti makagapu iti kasasaadda. Gagangayen dagita a produkto iti aglawlaw, nangnangruna dagiti solvent. Dagiti solvent ket nalaka a sumngaw (nalaka nga agbawbaw) a substansia nga agwaras wenno mangrunaw iti sabsabali a substansia. Dagitoy ti ramen dagiti pintura, barnis, pigket, pestisidio, pagdalus.

Kadagiti sumaganad nga artikulo, usigentayo a naimbag ti MCS, salaysayentayo no ania a tulong ti magun-odan dagidiay agsagsagaba iti daytoy a kasasaad, ken kitaentayo no kasano a makapagtinnulong dagiti agsagsagaba ken di agsagsagaba tapno ad-adda a makaay-ayo ti biag para kadagidiay addaan iti MCS.

[Footnote]