Manipud Kadagiti Agbasbasa

Awanan Amma a Pampamilia Pagyamanan iti serye nga “Awanan Amma a Pampamilia​—Panangpasardeng iti Pannakaulitna”! (Pebrero 8, 2000) Nabayagen a nasakit ti nakemko iti pannakidiborsiok agingga a kayatko payen nga ilaban nga interamente a siak la koman ti mangaywan iti balasangko. Ngem impaamiris kaniak dagitoy nga artikulo a no mabalbalin, masapul a taginayonen ti balasangko ti nasayaat a relasion iti amana. Saan a solusion ti panangilaban iti panangaywan.

L. D., Guam

Kas agsolsolo nga ina, kanayon nga ikagkagumaak a padakkelen ti barok maitunos kadagiti prinsipio ti Biblia. Ti dati nga asawak ket maysa kadagiti dineskribiryo a “kurang ti atension nga ipakpakitana”; awan interesna iti barona. Nupay kasta, insurok ti barok nga ayaten ken raemenna ti amana, kas insingasing ti artikuloyo. Makaparegta unay a maammuan nga umiso ti ar-aramidek.

R. S., Brazil

Nagdiborsio dagiti dadakkelko idi lima ti tawenko. Awan a pulos ti impakita ni tatangko nga interesna kadagiti annakna. No dadduma, mariknak a nasaysayaat la koman a diak naam-ammo ni tatangko ngem ti sagabaek ti kinaawan interesna. Agyamanak ken Jehova ta ubingak pay idi nakipagadalak iti Biblia kadagiti Saksi ni Jehova. Ti pannakaammok kadagiti kinapudno nga isursuro ti Biblia ti nakatulong kaniak a mangdaer iti pannakabaybay-a ken sakit ti nakemko.

C. B., Puerto Rico

Dandani pito a tawenen a sisiak a mangpadpadakkel iti tallo a babbarok, ket no dadduma, nakarigrigat dayta. Kas pagarigan, addada panawen a nagrigat nga isuro dagiti babbarok. Nupay kasta, ay-ayatek unay ida, ket agyamanak ken Jehova ta addada iti biagko. Nabiit pay a nabautisaran ti inauna, isu a makagunggona amin a panagreggetko. Dagiti artikulo a kas kadagitoy ti mangparparegta kaniak nga agtultuloy. Masansan a basaek dagitoy.

N. B., Canada

Pimmanaw ni tatangko idi innem ti tawenko. Agtawenakon iti 21, ket ita la a maam-amirisko ti epekto dayta kaniak. Mabutengak idi a makiasawa di la ket ta panawannakto met ni lakayko. Mariknak met nga awan ti aniaman a maipaayko iti maysa a lalaki, tangay diak ammo no kasano ti agbiag iti gagangay a pamilia. Nupay kasta, liniwliwanak unay daytoy nga artikulo. Impaawatna a kabaelak ti agbalin a natimbeng, matalek, naayat nga asawa iti masakbayan.

E.V.W., Estados Unidos

Parikut iti Pannakigayyem Nabayagen a kayatkayo a suratan, ngem diak pulos idi naaramidan. Kabasbasak ti artikulo nga “Agimtuod Dagiti Agtutubo . . . Apay a Sinairnak ti Gayyemko?” (Pebrero 22, 2000) Nakaro idi ti problemak iti nasinged a gayyemko, ket nasakit idi ti nakemko kenkuana. Dimteng daytoy nga artikulo iti umiso a tiempo.

C. V., Italia

Sinairnak ti maysa kadagiti gagayyemko. Tinulongannak ti artikulo a mangtarus a tangay imperpektotayo amin, no dadduma, makapagpipinnasakittayo. Inaramidko ti imbaga ti artikulo ket nasolbarmi a dua dagiti bambanag.

N. T., Trinidad

Agtawenak iti 18 ken addaanak iti dua a nasinged a gagayyem. In-inauna nga amang kaniak ti maysa, ken dua a tawen nga ub-ubing ti maysa. Bueno, nabiit pay nga adda problemak iti ub-ubing a gayyemko. Dimteng daytoy nga artikulo iti umiso a tiempo. Impalagip kadakami ti Colosas 3:13 a mamin-adu a pakawanennatayo ni Jehova isu a rumbeng nga agpinnakawankami. Ti maudi a parapo ti nakatulong kaniak a mangtarus iti panangpakawan. Gapuna, kayat ti tunggal maysa kadakami ti agbalin a kas iti gayyem a nadeskribir iti Proverbio 18:24​—a “nasingsinged ngem iti maysa a kabsat”!

W. C., Estados Unidos