Adda Met Laengen Solusion!

PANUNOTEM laengen ti lubong a sadiay tunggal ubing ket talaga a maipatpateg, talaga a maay-ayat, ken naparaburan iti nadungngo, naayat a nagannak a sipapasnek a tarigagayanda nga ipaay ti kasayaatan a panangiwanwan ken panangiturong iti anakda. Panunotem ti lubong a sadiay tunggal ubing ket agpadpada a nasalun-at ken nasimbeng ti panunotna, a sadiay awanen dagiti ubbing iti lansangan, ken din mapaidaman iti kinaubingda agsipud ta saanen a masapul a manggedda tapno adda pagbiagda!

Makaay-ayo? Siempre. Nakapapati? Kasta ti patien dagiti Saksi ni Jehova ken maigapu daytoy iti dua a rason.

Maipaay Dagiti Nagannak ti Paset ti Solusion

Awan duadua nga umanamongkayo a kabaelan dagiti nataengan a risuten​—no dadduma lapdan pay ketdi​—ti sumagmamano a problema ti ubbing. Siempre, maaramid daytoy no la ket ta situtulok dagiti adulto a mangaramid iti kasta. Wen, adda kadagiti nagannak ti maysa kadagiti solusion ti problema.

Kas pagarigan, dagiti nataengan a mangannurot iti balakad ti Biblia a “ti babai saan a sumina iti asawana . . . ket ti lalaki dina koma panawan ti asawana” awan annakda nga agsagaba ta nasinasina ti pamiliada gapu iti panagsina wenno diborsio.​—1 Corinto 7:10, 11.

Dagiti nataengan a situtulok a mangannurot iti balakad ti Biblia a ‘magnada koma a sitatakneng, saan a kadagiti naariwawa a panagragragsak ken panagbibinnartek,’ awan annakda nga agsagaba iti danag gapu ta mammartek wenno agdrogdroga ti nagannak kadakuada.​—Roma 13:13; Efeso 5:18.

Dagiti nataengan a situtulok a mangannurot iti balakad ti Biblia nga “adaywanyo ti pannakiabig” makatulongda a mangpabassit iti panagsagaba ti annakda a dumakkel a di maipatpateg, gapu ta posible a dimmakkelda iti pamilia nga agsolsolo ti nagannak.​—1 Tesalonica 4:3; Mateo 19:9.

Dagiti nataengan a situtulok a mangannurot iti balakad ti Biblia a, “Dikay rurruroden dagiti annakyo, tapno saan a maupay ti riknada,” ken “ayatenda dagiti annakda” awanto ti annakda nga agsagaba iti pisikal wenno mental a pannakariribuk gapu iti nadumaduma a kita ti pannakaabuso.​—Colosas 3:21; Tito 2:4.

Kas panggupgop, no situtulok ti amin a nataengan a mangannurot iti balakad ti Biblia nga inted ni Jesus nga, “Isuamin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada,” adda kadi minilion a di maipatpateg ken di madungdungngo nga annak?​—Mateo 7:12.

Makaparagsak ta adu a nataengan ti situtulok a mangaramid iti amin a nadakamaten. Ngem nakalkaldaang ta saan a situtulok ti amin. Dayta ti parikut. Ket uray kadagiti situtulok, matakuatanda a no dadduma, masansan a mapaay ti panangikagumaanda gapu iti kinaimperpekto ti tao ken dagiti banag a dida makontrol. Makaipaay laeng dagiti tattao iti paset ti solusion ti adu a problema ti ubbing, nabatad a dida maipaay ti naan-anay a solusion.

Mangipaay ti Nadibinuan a Gobierno iti Naan-anay a Solusion

Ti mannurat a ni John Ruskin a nadakamat iti immuna nga artikulo, talaga a patienna a “ti umuna a rebbengen ti Gobierno ket siertuenna a tunggal mayanak nga ubing ket maaddaan iti nasayaat a pagtaengan, kawes, taraon, ken edukasion, agingga nga agnakem.” Ngem inamin ni Ruskin, a “tapno [matungpal] daytoy masapul nga iturayan ti Gobierno ti tattao iti pamay-an a ditay pay maarapaap agingga ita.”

Ti laeng gobierno nga itantandudo ti Dios ti addaan iti naasi nga autoridad a dinakamat ni Ruskin. Ket naikari ti kasta a gobierno​—daydiay dinakamat ni Jesus iti Mateo 6:9, 10. Apaman a daytoy a gobierno nga imbangon ti Dios ket naan-anayen a mangituray iti ar-aramid ditoy daga, iturayannanton ti amin a tattao​—tapno mangipaay iti pagtaengan, kawes, taraon, ken edukasion kadagiti amin nga iturayanna, agraman dagiti ubbing. (Isaias 65:17-25) Ngem saan la a dayta ti aramiden daytoy perpekto a gobierno.

Ti Pagarian ti Dios isublinanto dagiti tattao iti kinaperpekto, tapno naan-anay a natimbeng ti panangpadakkelda kadagiti annakda. (Job 33:24-26) Mapadakkelto dagiti annak buyogen ti espiritu ti talna ken sapasap a panagkakabsat, ti naikeddeng a ragpaten ti UN Declaration of the Rights of the Child. (Salmo 46:8, 9) Dinton kasapulan ti International Year of the Child wenno ti Convention on the Rights of the Child.

Ti pannakaisubli ti naan-anay a salun-at dagiti nagannak ken baldado nga annak ket simple a trabaho para ken Kristo Jesus, ti Ari daytoy nailangitan a gobierno. Daytat’ patalgedan dagiti inaramidna a milagro a panangagas idi adda pay ditoy daga. (Lucas 6:17-19; Juan 5:3-9; 9:1-7) Kabaelannanto pay a pagungaren dagiti natay nga annak ken nagannak!​—Mateo 9:18-25.

Anian a rag-o a maammuan nga asidegen ti tiempo nga agtignay ti Dios maigapu kadagiti ubbing ditoy daga!

[Kahon/Dagiti Ladawan iti panid 12]

Tulong nga Agpaay Kadagiti Agtutubo

Interesado unay dagiti Saksi ni Jehova a tumulong kadagiti agtutubo a mangliklik kadagiti problema ken isuro kadakuada no kasano ti kasayaatan a panangdaer kadagiti problema a di maliklikan. Isu a bayat ti adu a tawen, nakaipablaakdan iti adu a katulongan a nairanta a mangipaay kadagiti kasapulan ti agtutubo​—manipud iti di pay ageskuela agingga kadagiti tin-edyer. Mairaman kadagitoy a publikasion ti libro a Ti Librok dagiti Estoria ti Biblia ken Dagiti Saludsod nga Iyimtuod ti Agtutubo​—Dagiti Sungbat nga Epektibo agraman ti video a napauluan Young People Ask​—How Can I Make Real Friends? Magun-odan dagitoy kadagiti Saksi ni Jehova nga agnanaed iti lugarmo wenno agsurat kadagiti agipabpablaak iti daytoy a magasin.

No maipapan kadagiti mismo nga annakda, ipakita dagiti Saksi ni Jehova nga ipatpateg ken ay-ayatenda ida babaen ti regular a pannakisarita kadakuada maipapan kadagiti problemada. Dagiti nagannak masansan nga usarenda ti nagsayaat a material a naiparang kadagiti nadakamat itay a katulongan iti panagadal a pangibasaran iti progresibo, regular a programa a panangsanay kadagiti agtutubo. Nalabit kayatmo a suroten ti kasta a pamay-an kadagiti annakmo.