Negosio a Nabayagen ti Pakasaritaanna
Ti karpinteria ni John ti kasayaatan a naibangon ken kaaduan iti alikamen iti komunidadna. Pagpannakkel ken pagragsakanna dayta. Ngem maysa a rabii, adda napasamak nga uram. Iti sumagmamano la nga oras, dimmapon ti nagpintas a karpinteriana.
KASAKBAYANNA, napanunoten ni John ti gumatang iti fire-insurance babaen ti dadduma a pondo nga inusarna a nangibangon iti karpinteriana. Ngem pinampanunotna: ‘Nakaan-annadak met. Ket no awan a pulos ti uram, sayang laeng ti kuarta nga ibayadko iti insurance.’ Ngem napasamak ti uram. No adda koma insurance ti karpinteria ni John, posible unay a maibangonna koma manen dayta. Ngem gapu ta awanan iti insurance, dina maibangon.
Ania ti Insurance?
Ti insurance ket saan a puonan a namnamaen ti maysa a tao a makaisubli iti kuartana. Saan met a sugal dayta. Makipalaranan ti sugador, ngem ti insurance ket mangitukon iti pannalaknib maibusor kadagiti peligro a dati nga addan. Ti insurance ket maysa a pamay-an ti panangiranud iti peligro iti dadduma pay a tattao.
Nanipud pay idi unana, nagkaykaysan ti adu a tattao nga iranud ti dadduma a gamengda tapno matulongan dagiti tattao a napukawan. Agarup 3,500 a tawenen ti napalabas, binilin ni Moises ti nasion ti Israel a kanayon a mangibingayda iti produktoda “ti ganggannaet nga agnanaed ken ti awan amana nga ubing ken ti balo a babai.”—Deuteronomio 14:28, 29, NW.
Dagiti Namunganayan ti Insurance
Rinibu a tawenen nga adda ti insurance. Nairaman ti maysa a kita ti credit insurance iti Kodigo ni Hammurabi, maysa a pakagupgopan dagiti linteg ti Babilonia a maipagarup nga immun-una pay ngem ti Linteg ni Moises. Tapno masuportaran ti ekspedision ti panagnegosioda idi nagkauna a tiempo, immutang dagiti makinkukua kadagiti barko kadagiti mayat nga agipuonan. No madadael ti barko, saan a dagiti makinkukua ti agbayad kadagiti utangda. Tangay sitatalged a nagsubli ti adu a barko, ti interes nga imbayad ti adu a makinkukua ket umdasen a mangipaay iti seguridad dagiti nagpautang.
Gapu iti kastoy met laeng a kasasaad dagiti barko a timmaud idi agangay ti kalatakan iti lubong a mangipapaay iti insurance nga isu ti Lloyd’s of London. Idi 1688, tartarawidwidan ni Edward Lloyd ti maysa a kapeteria a kadawyan a paguummongan dagiti komersiante ken bankero idiay London tapno pagnunumuan ti maipapan iti negosioda. Dagiti managpuonan a nangitukon iti kontrata ti insurance kadagiti marino, insuratda dagiti naganda iti baba ti naikeddeng a gatad nga isublida no adda dakes a mapasamak, a kasukat ti naikeddeng a bayad, wenno premium. Dagitoy a nangitukon iti insurance ket naawagan nga underwriter. Kamaudiananna, idi 1769, ti Lloyd’s ti nagbalinen a pormal a grupo dagiti underwriter nga idi agangay ket rimmang-ay a nagbalin a kangrunaan nga aglaklako iti insurance a nainaig iti peligro iti nabigasion.
Ti Insurance iti Kaaldawantayo
Iti kaaldawantayo, no gumatang dagiti tattao ti insurance, iranranudda pay laeng ti pagpeligruanda. Adalen ti adu a moderno a kompania ti insurance dagiti impormasion a mangipakita iti kasansan dagiti napalabas a pukaw—kas pagarigan, dagiti pukaw gapu iti uram iti puesto—tapno padasenda nga ipakpakauna no ania ti kaaduan a mapukaw ti adu a klienteda iti masanguanan. Ti kompania ti insurance usarenna ti imbayad ti adu a kliente a manglitup iti napukaw dagiti kliente.
Kasapulam kadi ti insurance? No kasta, ania a kita ti insurance ti maitutop iti kasasaadmo? Ken addaanka man ti insurance wenno awan, ania dagiti pagannadam a makatulong kenka a mangtaming a sibaballigi kadagiti pagpeligruan iti biag?
[Ladawan iti panid 3]
Nangrugi iti maysa a kapeteria ti maysa kadagiti kalatakan iti lubong a mangipapaay iti insurance
[Credit Line]
Impaay ti Lloyd’s of London