Ti Planetatayo—Ania ti Masakbayanna?
“Nupay rinibu a tawen a nagamkanen ti tattao ‘dagiti aramid ti Dios’ kas iti layus ken tikag, sagsagabaenda ita dagiti nakarkaro nga amang nga ‘aramid ti tao’ a pakaigapuan dagiti natural a didigra,” kuna ti periodiko a Globe and Mail iti Canada. Nangiruar ti United Nations Environment Programme (UNEP) iti adut’ saklawenna a report a mangidagadag nga isardeng ti tattao dagiti aramid a mangdadael iti aglawlaw sakbay a naladawen. Kuna ti direktor ehekutibo ti UNEP a ni Klaus Toepfer: “Umdasen ti pannakaammotayo tapno makitatayo no kasano a ti aglawlaw ken dagiti agnanaed iti daytoy naisangsangayan nga asul a planeta ket maapektaran kadagiti aramiden wenno ditay aramiden agingga a dumteng ti 2032.”
Addan simmayaatan ti aglawlaw sipud idi naipasdek ti UNEP idi 1972. Kas naipadamag iti The Toronto Star, “nadaldalusen ti angin ken danum dagiti karayan idiay Europa ken Amianan nga America, ket ti panangkissay kadagiti maipugso a kemikal [iti atmospera] ti nanglunit iti naabutan idin nga ozone layer.” Kasta met, dagiti programa a mangtartarawidwid kadagiti kabakiran a kas kadagiti adda idiay Canada, Estados Unidos, Finland, ken Norway, “ipaspasiguradoda a maksayanen ti nalabes a panagtroso.” Nupay kasta, kuna ti report ti UNEP a no agtultuloy ti ekonomia ken lumawa dagiti siudad, makadangran daytoy kadagiti atap nga animal ken iti nadumaduma a sibibiag a parsua. Kinuna ti Globe: “Agarup kagudua kadagiti karayan iti lubong ti namulitan wenno kimmiddit. Nakaro ti kinakurang ti danum iti walopulo a pagilian a pagnanaedan ti 40 a porsiento a tattao iti lubong.”
Patien ni Toepfer nga “adda pagimbagan ti determinado a panagtignay.” Kinunana pay: “Masapultayo ti espesipiko a plano a maipatungpal . . . dagiti naikeddeng a kalat . . . ken kangrunaanna, ti nalawag a panggep.” Ngem ania ti inanamaen no saan nga agtignay dagiti pangulo ti lubong maipaay iti pagsayaatan ti planeta?
Namnamaem nga adda daydiay nangaramid iti “nalawag a panggep” ken “determinado nga agtignay” nga isu ni Jehova a Dios. Kinapudnona, nalawag nga inwaragawagna a makibiangto ket ‘dadaelenna dagidiay mangdaddadael iti daga.’ (Apocalipsis 11:18) Impasigurado met ti Dios kadatayo a maisublinto dagiti sistema ti ekolohia ti daga. Agsabongto dagiti desierto. (Isaias 35:1) Aglaplapusananto ti taraon. Saanton a mamulitan dagiti karayan. (Salmo 72:16; 98:8) Ipanamnama ti Dios a bendisionanna ti amin a sibibiag a banag ditoy daga.—Salmo 96:11, 12.
[Picture Credit Line iti panid 31]
Rinetrato ti NASA