Pasdek a Dati a Pagtataudan ti Koriente Mangisilsilnag Itan iti Naespirituan a Lawag

BABAEN ITI MANNURAT TI AGRIINGKAYO! IDIAY ITALIA

◼ Idi rugrugi ti dekada 1900, kasla uong a nagtubo ti adu nga industria iti kabambantayan ti Pistoia, Italia. Tapno maibiahe dagiti di pay naproseso a materiales ken dagiti nalpasen a produkto, naaramid ti tren a paandaren ti koriente. Nangrugi a nausar dayta idi Hunio 21, 1926. Ti rilesna nga agarup 15 a kilometro a riles ket lumasat iti katurturodan ken kabambantayan.

Ti tren ket papaandaren ti koriente manipud iti pasdek a mangsupsuplay iti dayta (makinngato a ladawan). Ngem di nagbayag, bimmassit ti maibibiahe a produkto isu a simmardeng ti biahe ti tren idi 1965. Ngem ania ti napasamak kadagiti pasdek a naibangon iti igid ti riles? Dadduma kadagitoy ti nabaybay-an ken adda met dagiti nagbalin a paglakuan iti arak ken estasion dagiti bus.

Natarimaan ti pasdek a dati a pagtataudan ti koriente. Idi 1997, ginatang dayta ti San Marcello Pistoiese Association of Jehovah’s Witnesses sada pinagbalin a maysa kadagiti naidumduma a Kingdom Hall idiay Tuscany (makimbaba a ladawan). Dagiti miembro ti kongregasion nga aggigimong iti dayta a pasdek ket okupadoda nga ‘agsilsilnag kas silsilaw’ iti nadumaduma a lugar iti daytoy a kabambantayan, a mangikaskasaba iti naimbag a damag ti Pagarian ti Dios. (Filipos 2:15; Mateo 24:14) Wen, ti pasdek a dati a pagtataudan ti koriente ket mangisilsilnag itan iti naespirituan a lawag.—Mateo 5:14-16; 28:19, 20.