Agkamkampania Dagiti Ateista
ADDA baro a grupo dagiti ateista (di mamati nga adda Dios). Dida kayat a bukbukodan ti pammatida isu nga agkamkampaniada a “sireregta ken sipipinget, ket determinadoda a mangkomberte kadagiti relihioso tapno dumasig kadakuada,” kuna ti kolumnista a ni Richard Bernstein. Puntiriaenda uray dagiti agnostiko (agduadua no adda Dios) ta dida kayat nga adda mabati a panagduadua. Para kadakuada, awan ti Dios. Agpatinggan iti dayta.
“Tiempon nga isardeng dagiti tattao ti panamatida iti relihion,” kuna ti premiado iti Nobel Prize a ni Steven Weinberg. “Dakami a sientista rumbeng nga aramidenmi ti amin a kabaelanmi a mangpakapuy iti impluensia ti relihion. Nalabit dayta ti kasayaatan a maitulongmi iti sibilisasion.” Ti maysa a pamay-an tapno maaramidda dayta ket babaen kadagiti publikasion. Kasla naballigi dayta yantangay nagadu ti gumatgatang iti dadduma a libro dagiti baro nga ateista.
Ti relihion ti maysa a makagapu no apay a naballigi ti kampania dagiti baro nga ateista. Nauma ngaminen dagiti tattao iti narelihiosuan a kinapanatiko, terorismo, ken panagbibinnusor iti lubong. Adda nalatak nga ateista a nagkuna a “ti relihion sabsabidonganna ti amin.” Karaman kano iti dayta a ‘sabidong’ ti kaaduan a narelihiosuan a pammati, saan la a dagiti pinapanatiko a kapanunotan. Sigun kadagiti baro nga ateista, dagiti kangrunaan a doktrina ket nasken a maibutaktak, matallikudan, ken masukatan iti nainsiriban a panagpampanunot a naibasar iti lohika ken kinapudno. Masapul a natured ken prangka dagiti tattao nga agsao maipapan iti “nagadu, minamaag, ken mangdadael-biag” nga impormasion iti Biblia ken Koran, insurat ti ateista a ni Sam Harris. “Saankamin nga agpalpalikaw pay . . . uray no masair dagiti relihioso a tattao.”
Nupay ti relihion ket um-umsien dagiti baro nga ateista, raraemenda met unay ti siensia. Kuna pay ti dadduma a mapaneknekan kano ti siensia nga awan ti Dios. Ngem agpayso kadi? Talaga kadi a mapaneknekanna? “Dumtengto ti tiempo,” kuna ni Harris, “nga addanto mangabak ken maabak iti daytoy nga argumento.”
Panagkunam, anianto a dasig ti mangabak? Bayat nga us-usigem daytoy, isaludsodmo iti bagim: ‘Talaga kadi a pagdaksak no mamatiak iti Namarsua? Nasaysayaat ngata ti lubong no amin a tao ket din mamati nga adda Dios?’ Ammuentayo ti ibagbaga ti dadduma a mararaem a sientista ken pilosopo no maipapan iti ateismo, relihion, ken siensia.