Lubong nga Awanan Relihion—Nasaysayaat Ngata?

AR-ARAPAAPEN dagiti baro nga ateista ti lubong nga awanan relihion—awan dagiti suicide bomber, awan ti gubat gapu iti relihion, ken awan dagiti naagum a klero wenno ebanghelisador iti TV a mangib-ibus iti kuarta dagiti pasurotda. Kayatmo met kadi ti kasta?

Sakbay a sumungbatka, isaludsodmo iti bagim, ‘Adda kadi pammaneknek a sumayaat ti kasasaad ti lubong no amin a tao ket ateista?’ Usigem: Agarup 1.5 a milion a taga-Cambodia ti natay idi inkagumaan ti Khmer Rouge nga ipasdek ti Marxist a gobierno—turay a di mamati iti kaadda ti Dios. Idiay met USSR, a nangitandudo iti ateismo, ti panagturay ni Joseph Stalin ket nagresulta iti ipapatay ti pinullo a milion a tattao. Dagita a kinadakes ket saan met ketdi a direkta a maigapu iti ateismo, ngem ipakita dagita a ti panagturay ti ateismo dina garantisaran ti panagari ti talna ken panagkaykaysa.

Adu ti umanamong a ti relihion ti makagapu iti nakaro a panagsagaba. Ngem basol kadi dayta ti Dios? Saan! No kasano a saan a mapabasol ti agar-aramid iti kotse no adda mapasamak nga aksidente gapu ta ti drayber ket agus-usar iti selpon bayat nga agmanmaneho. Adu ti makagapu iti panagsagaba dagiti tattao. Malaksid iti patpatienda, adda pay naun-uneg a makagapu. Tukoyen dayta ti Biblia kas ti natawid a kinaimperpekto. “Amin nagbasol ken agkurang iti dayag ti Dios.” (Roma 3:23) Daytoy a pagannayasan nga agbasol ti mangpatanor iti kinatangsit, kinamanagimbubukodan, tarigagay a mangaramid iti kaykayat, ken kinaranggas. (Genesis 8:21) Dayta pay ti makagapu nga agikalintegan dagiti tattao ken kaykayatda a patien dagiti mangkonsintir iti kinadakes. (Roma 1:24-27) Umiso ti kinuna ni Jesu-Kristo: “Rummuar manipud puso dagiti nadangkes a panagrasrason, panangpapatay, pannakikamalala, pannakiabig, panagtakaw, ulbod a pammaneknek, panagtabbaaw.”—Mateo 15:19.

Dakkel a Nagdumaan

Iti daytoy a punto, nasken a makita ti nagdumaan ti palso a panagdayaw ken ti pudno a panagdayaw—daydiay makaay-ayo iti Dios. Ti pudno a panagdayaw matulonganna dagiti tattao a mangiwaksi kadagiti dakes a pagannayasan. Iparegtana ti managsakripisio nga ayat, talna, kinamanangngaasi, kinaimbag, kinaalumamay, panagteppel, kinasungdo ken kinamatalek iti asawa, agraman panagraem iti sabsabali. (Galacia 5:22, 23) Iti kasumbangirna, ti palso a relihion pagustuanna ti kayat ti kaaduan—‘gagatelenna ti lapayag dagiti tattao,’ kas kuna ti Biblia—babaen ti panangkonsintirna iti dadduma kadagiti dakes a banag a kinondenar ni Jesus.—2 Timoteo 4:3.

Saan ngata a kasta met la ti ibunga ti ateismo—pannakariro no ania ti umiso ken di umiso? No ditay mamati iti Dios, ditay marikna a manungsungbattayo iti autoridadna, ken “awan dagiti nainkalintegan a prinsipio a nasken a surotentayo,” kuna ti propesor iti abogasia a ni Phillip Johnson. No kasta, makaammon ti tunggal tao a mangaramid iti kaykayatna. Sigurado a dayta a kapanunotan ti makagapu a magustuan ti dadduma a tattao ti ateismo.—Salmo 14:1.

Nupay kasta, saan nga ipalubos ti Dios nga agtultuloy ti ateistiko wenno narelihiosuan a kinaulbod ken dagidiay mangisaksaknap iti dayta.a Inkarina: “Dagiti napalungdo [nadalus iti moral ken mangan-annurot iti narelihiosuan a kinapudno] isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.” (Proverbio 2:21, 22) Ti resulta dayta ket talna ken kinaragsak iti intero a lubong—banag a saan a kabaelan nga iyeg ti asinoman a tao, ken aniaman a pilosopia wenno institusion ti tao.—Isaias 11:9.

[Footnote]

[Kahon iti panid 6]

TI PANANGMATMAT TI DIOS KADAGITI NARELIHIOSUAN A KINARANGGAS

Ti daga a naited iti nagkauna nga Israel ket dati a pagnanaedan dagiti Canaanita, nadangkes a tattao nga agidatdaton iti ubbing ken agar-aramid iti seksual nga imoralidad—agraman panagdenna dagiti agkapamilia wenno asideg nga agkabagian, agpada a lallaki; ken pannakinaig ti tao iti animal. (Levitico 18:2-27) Kuna ti libro nga Archaeology and the Old Testament, natakuatan iti panagkabakab “kadagiti sementerio iti aglawlaw dagiti pagano nga altar ti ginabsuon a dapo ken tedtedda a tultulang dagiti maladaga, a mangipasimudaag nga adu idi ti agidatdaton iti ubbing.” Agdaydayaw idi dagiti Canaanita kadagiti didiosenda babaen ti imoral a seksual nga aramid ken ti panangidatonda iti inauna nga anakda kadagita met la a didiosenda, sigun iti Halley’s Bible Handbook. Innayonna: “Pakasdaawan dagiti arkeologo a nagkabakab kadagiti rebba dagiti siudad ti Canaan no apay a saan a nasapsapa a dinadael ida ti Dios.”

Ti panangdadael ti Dios kadagiti Canaanita ket nabileg a palagip kadatayo ita a dina ipalubos nga agtultuloy latta a mausar ti naganna iti panagaramid dagiti tattao iti kinadakes. Kuna ti Aramid 17:31: “Nangituding [ti Dios] iti aldaw nga iti dayta panggepna nga ukomen ti mapagnaedan a daga buyogen ti kinalinteg.”

[Dagiti Ladawan iti panid 7]

Dagiti addaan ken awanan iti relihion ket agpada a nakaaramid kadagiti nakaro a kinadakes

Dagiti relihion sinuportaranda ni Hitler

Bangabanga dagiti biktima ti Khmer Rouge idiay Cambodia

[Credit Line]

AP Photo