Itantandudo Kadi ti Relihion ti Talna?

IBILBILANG ti dadduma a ti Church of the Holy Sepulchre idiay Jerusalem ti “kasasantuan” a simbaan iti Kakristianuan. Ngem nagbalin metten a simbolo ti narelihiosuan a panagririri ken panaggiginnura. Nabayagen a patpatienda a dayta ti “nakaitaneman ken nakapagungaran ni Kristo.” Nupay kasta, daytoy maibilbilang a nasantuan a disso ket pakapaspasamakan met ti adu a naranggas a komprontasion. Nagkikinnabil dagiti monghe ken papadi ti innem a nagduduma a “Nakristianuan” a denominasion maipapan kadagiti kalinteganda nga agusar iti simbaan. Kimmaro ti rinnisiris iti napalabas a tawtawen. Kasapulan payen a bumallaet dagiti polis nga armado iti riple tapno temporario a kontrolenda ti simbaan.

Napnuan Kinaranggas a Pakasaritaan

Dagiti pasamak iti Church of the Holy Sepulchre ket paset ti nabayagen a pakasaritaan ti panagpipinnatay ken panangibukbok iti dara gapu iti kasta unay a kinarelihioso. Kas panangusig kadagiti nabiit pay a rinnupak iti nadumaduma a paset ti lubong, kuna ti libro a Violence in God’s Name: “Manipud Indonesia agingga iti Northern Ireland, Makintengnga a Daya agingga iti Kashmir, India agingga iti Nigeria, pagpagilian iti Balkan agingga iti Sri Lanka, ikalkalintegan dagiti Budista, Hindu, Judio, Kristiano, Muslim ken Sikh ti panagusarda iti kinaranggas tapno masalakniban ti bukodda a relihion ken pagimbagan.”

Kaskasdi a talna ken panagkaykaysa ti kangrunaan a doktrina ti kaaduan a relihion. Iti adun a tawen, sipapasnek nga itantandudo ti relihion dagiti di agimbubukodan a prinsipio a kas iti panagayat iti kaarruba ken kinasagrado ti biag. Saan kadi a rumbeng laeng nga usaren ti relihion ti nabileg nga impluensiana tapno maitandudo ti talna? Dayta a saludsod ket nasayaat nga usigen dagiti napasnek a managdaydayaw.