Panangmatmat iti Lubong
“Idi awan pay ti kompiuter, dandani imposible [kadagiti botanist] a siraraken ti amin a literatura sakbay a panagananda dagiti baro a kita ti mula a madiskobreda, isu nga umad-adu ti madobdoble a nagan.” Naammuanen nga iti minilion a nailista a nagan, di kumurang nga 477,601 ti agkakaarngi.—SCIENCE, U.S.A.
“Kadagiti Tsino, 6% laeng ti mangibagbaga a naragsakda.” Iti maysa a surbey, patien ti agarup 39% a ti “kinabaknang” ti “kangrunaan a banag a makaapektar iti kinaragsak.” —CHINA DAILY, CHINA.
‘Naimbestigar ti kinaagpayso ti bilang dagiti krimen iti intero a Russia. Naduktalan a “nagadu ti saan nga agpayso” kadagita a bilang.’ Dagiti ahensia a mangipatpatungpal iti linteg ket naakusaran iti panangpadasda a “mangkalub iti agpayso a kasasaad ti krimen” ken iti panangipakaammoda iti ad-adu a bilang dagiti nasolbarda a krimen.—RIA NOVOSTI, RUSSIA.
“Maysa iti kada tallo nga estudiante iti [Berlin a] kabesera ti Germany ti mangibilang iti trabaho a nainaig iti seks [a pakairamanan ti prostitusion ken makagargari a panagsala] kas panguartaan tapno masuportaran ti panageskuelada.” —REUTERS NEWS SERVICE, GERMANY.
Panagpapintas Sakbay ti Panaganak
Ap-apektaran ti social media ti pamay-an dagiti inna a mangipakaammo a nagpasngaydan. Telegrama idi ti us-usaren dagiti lolada, ngem “Internet ti us-usarenen dagiti kabbaro nga inna a mangipakaammo iti naragsak a damag,” kinuna ti ABC nga estasion ti TV idiay America. Ti pakaammo ket masansan a napakuyogan kadagiti retrato ti agina kalpasan unay ti panaganak. Gapu iti dayta, dagiti babbai ita a maseknan unay iti langada ket agpappapintasen sakbay nga aganakda. Karaman kadagita ti panagpa-facial, manicure, ken pedicure. “Adda pay ketdi hairdresser nga ikuyog ti dadduma iti ospital,” kuna ti damag. Apay? Tapno napintas ti langada bayat ti panaganakda, sigun ken ni Toni Golen a medical director iti seksion a paganakan idiay Beth Israel Deaconess Medical Center iti Boston.
No Kanayon nga Aktiboka, Nasalun-atka
Sigun kadagiti managsirarak, ti nabayag a di panagkutikuti iti pagtrabahuan, eskuelaan, wenno iti sango ti TV ket adda pakainaiganna kadagiti agpaut a sakit. Kuna ti Vancouver Sun: “No nakatugawka, dagus a bumuntog ti panagandar ti lipoprotein lipase, ti enzyme a tumulong kadagiti masel a mangala iti taba iti dara ken mangtunaw iti dayta.” Innayon pay ti diario a tapno kanayon a nasalun-attayo, ‘saan laeng a ti ehersisio a kanayon a mangpapartak iti pitik ti puso ti kasapulantayo. Masapul a regular nga agaramidtayo kadagiti aktibidad a nalag-an agingga iti kalkalainganna tapno agtultuloy nga agandar ti metabolismotayo.’