LEKSION 4
No Kasano ti Agbalin a Responsable
ANIA TI RAMANEN TI PANAGBALIN A RESPONSABLE?
Ti responsable a tao ket mapangnamnamaan. Aramidenna ti maipatrabaho ken ileppasna dagita iti naikeddeng a tiempo.
Uray limitado ti kabaelan ti bassit nga ubing, mabalinnan a sursuruen ti agbalin a responsable. “No 15 a bulanen ti ubing, mangrugin nga aramidenna ti ibaga ti nagannakna. No met 18 a bulannan, kayatnan a tuladen ti aniaman nga ar-aramidenda,” kuna ti libro a Parenting Without Borders. “Iti adu a kultura, nangruna no 5 agingga iti 7 ti tawenen dagiti ubbing, rugianen nga isuro dagiti nagannakda a tumulong kadagiti trabaho iti balay. Uray ubbingda pay, adu ti nasayaat a maaramidanda.”
APAY A NAPATEG TI KINARESPONSABLE?
Ti termino a “boomerang generation” deskribirenna dagiti agkabannuag a pimmanaw iti poder ti nagannakda tapno padasenda ti agbiag nga agsolsolo ngem nagsublida met laeng idi narigatanda. Mapasamak dayta no dadduma ta pulos a di nasursuruan dagiti agtutubo nga agiggem iti kuarta, agasikaso iti balay, wenno agbalin a responsable iti inaldaw.
Gapuna, nagsayaat a sanayem ti annakmo nga agbalin a responsable itan tapno ammoda ti aramidenda inton adultodan. “Dimo kayat a kanayon nga agdependeda kenka agingga nga agtawendan iti 18 sa palubosam idan nga agbiag a bukbukodda,” kuna ti libro a How to Raise an Adult.
NO KASANO NGA ISURO TI KINARESPONSABLE
Ikkam ida kadagiti trabahuenda iti balay.
PRINSIPIO TI BIBLIA: “Makagunggona ti tunggal kita ti napinget a panagtrabaho.”—Proverbio 14:23.
Kaykayat ti babassit nga ubbing ti tumulong iti ar-aramiden ti nagannakda. Gundawayam dayta a pagannayasanda. Ikkam ida kadagiti trabahuenda iti balay.
Saan a kayat nga aramiden ti dadduma a nagannak dayta. Gapu ta nabuntonan kanon dagiti ages-eskuela nga annakda kadagiti asaynment, apay a nayonanda pay laeng ti rigatda?
Ngem dagiti ubbing a mangar-aramid kadagiti trabaho ket ad-adda nga agballigi iti eskuelaan, ta no tumultulongda iti balay, masursuroda nga irugi ken ileppas ti aniaman a maipatrabaho kadakuada. Kuna pay ti libro a Parenting Without Borders, “a no ditay palubosan a tumulong dagiti annaktayo bayat a magagaran ken ubbingda pay, mabalin a panunotenda a saan a napateg ti tumulong . . . Ekspektarenda met a pagserbian ida ti dadduma.”
Kas naipakita iti dayta, ti panangaramid kadagiti trabaho ti mangsanay kadagiti ubbing nga agserbi imbes a pagserbian, tumulong imbes a ti la bagbagida ti pampanunotenda. No adda maipatrabaho kadagiti ubbing, mariknada nga adda napateg a lugarda iti pamilia ken responsabilidadda iti dayta.
Tulongam dagiti annakmo tapno matarusanda a manungsungbatda no agkamalida.
PRINSIPIO TI BIBLIA: “Denggem ti balakad ken awatem ti disiplina, tapno agbalinkanto a masirib.”—Proverbio 19:20.
No agkamali dagiti annakmo—kas pagarigan, no makaperdi iti saanna a kukua—saanmo a kaluban ti napasamak. Maakseptar dagiti ubbing ti epekto ti naaramidanda—iti daytoy a kaso, agpadispensar ken baka bayadanda pay ketdi ti naperdida.
No maawatan dagiti annak a manungsungbatda kadagiti kamalida, masursuroda ti
agbalin a napudno ken aminenda dagiti kamalida
saan nga agpabasol
saan nga agpambar
agpadispensar no kasapulan