MAZZAROT A KONSTELASION

Sigun iti Aramaiko a Targum, Mazzarot ti katupag ti maz·za·lohthʹ iti 2 Ar-ari 23:5, “konstelasion ti zodiak,” wenno “sangapulo ket dua a pagilasinan, wenno, konstelasion.” (NW; marhin ti KJ) Patien ti dadduma a daytoy a sao ket nagtaud iti ramut a sao a kaipapananna ti “bariksan,” ken ti Mazzarot tumukoy iti sirkulo ti zodiak. Ngem iti Job 38:32, pangmaymaysa a pronombre ti naaramat iti Hebreo iti sasao nga “iti naituding a tiempona,” idinto ta naaramat ti pangadu a porma iti 2 Ar-ari 23:5. No kasta, agparang a tumukoy ti Mazzarot iti espesipiko a konstelasion imbes a ti intero a zodiak, ngem di masigurado dayta iti agdama.

Iti Job 38:32 inyimtuod ni Jehova ken Job: “Mairuarmo aya ti Mazzarot a konstelasion iti naituding a tiempona? Ket no maipapan iti Ash a konstelasion a siaasibay ti annakna, maiturongmo aya ida?” Ngarud, aniaman ti tuktukoyen dagitoy a konstelasion, salsaludsoden ti Dios ken Job no kabaelanna a kontrolen dagiti makitana a bambanag iti law-ang ken no mairuarna ti maysa a grupo iti umiso a tiempo wenno maiturongna ti sabali pay a konstelasion iti naituding a dalanna iti law-ang.