Apay a Kalikaguman ti Dios Kadagiti Agdaydayaw Kenkuana a Makiasawada Laeng iti Kapammatianda?

▪ Ti Linteg nga inted ti Dios iti nasion ti Israel, iramanna daytoy a bilin maipapan iti tattao kadagiti nasion nga adda iti aglawlawda: “Dika mangbukel iti pannakiasawa nga aliansa kadakuada. Ti anakmo a babai dika ited iti anakna a lalaki, ket ti anakna a babai dika alaen a maipaay iti anakmo a lalaki.” (Deuteronomio 7:3, 4) Apay nga imbilinna dayta?

Umuna, agpaay a pagimbagan ti intero nga ilina. Ammo ngamin ni Jehova a kayat ni Satanas a mulitan ti ilina tapno agdayawda iti didiosen. Isu a kastoy ti impakdaarna mainaig kadagiti di manamati: “Pagbaw-ingennanto ti anakmo manipud isusurot kaniak, ket sigurado nga agserbidanto kadagiti sabali a didios.” Adu ti saklawen dayta a bilin. No ti nasion ti Israel agserbida kadagiti didiosen, mapukawda ti anamong ken pannalaknib ti Dios iti kasta nalakada laeng nga agbalin a biktima dagiti kabusorda. Kasano ngarud a mapataud ti nasion ti naikari a Mesias? Nalawag ti makagapu no apay a kayat ni Satanas nga allukoyen dagiti Israelita a makiasawa kadagiti saan nga agdaydayaw ken Jehova.

Maikadua, laglagipem a maseknan ti Dios kadagiti indibidual nga adipenna. Ammona a ti kinaragsak ken pagimbagan ti tunggal maysa ket agpannuray iti nasinged a relasionda iti Diosda. Adda kadi naimbag a rason tapno mamakdaar ni Jehova maipapan iti dakes nga impluensia ti di manamati nga asawa? Usigem ti kapadasan ti Ari Solomon. Ammona ti pakdaar ni Jehova maipapan kadagiti di manamati nga assawa a “pagannayasendanto ti pusoyo a sumurot iti didiosda.” Gapu ta naisangsangayan ti kinasiribna, nalabit impapanna a saan nga agaplikar kenkuana ti balakad ti Dios isu a dina impangag dayta. Ania ti resulta? “Ti pusona nagin-inut a pinagannayas dagiti assawana . . . a sumurot kadagiti sabali a didios.” Anian a nakalkaldaang! Napukaw ni Solomon ti anamong ni Jehova ket nabingaybingay ti ilina gapu ta saan a nagmatalek.​—1 Ar-ari 11:2-4, 9-13.

Mabalin nga irason ti dadduma a saan nga agaplikar dayta iti amin. Kas pagarigan, ti Israelita a ni Malon nangasawa iti Moabita a ni Ruth, ket nagbalin a mapagulidanan nga agdaydayaw ken Jehova. Ngem napeggad ti panangasawa kadagiti Moabita a babbai. Saan a nakomendaran ni Malon iti panangasawana iti Moabita a babai; nasapa a natay, nalabit sakbay pay a nagbalin ni Ruth nga agdaydayaw ken Jehova. Ni Kilion, a kabsat ni Malon, nangasawa iti Moabita a ni Orpa a nagtultuloy a nagdaydayaw iti ‘didiosna.’ Iti sabali a bangir, nabayagen nga agdaydayaw ni Ruth ken ni Jehova idi nagbalin nga asawa ni Boaz. Kinapudnona, imbilang dagiti Judio kas “naan-anay a proselita.” Ti panagasawa da Ruth ken Boaz ket bendision kadakuada a dua.​—Ruth 1:4, 5, 15-17; 4:13-17.

Nainkalintegan kadi nga irason a mabalintayo a salungasingen ti bilin ni Jehova a makiasawa laeng kadagiti kapammatian gapu iti panagasawa da Malon ken Ruth? Saan ngata a ti kasta a panangikalintegan arigna ibagbagatayo a nasayaat a pagsapulan ti panagsugal gapu ta nangabak ti maysa a sugador?

Iparparegta ti Biblia kadagiti Kristiano a makiasawada ‘laeng iti Apo.’ Mamakdaar maipapan iti ‘pannakaisangol kadagiti di manamati.’ Nairanta dayta a balakad kadagiti pudno a Kristiano nga agbirbirok iti pakiasawaanda. Kadagidiay addaanen iti assawa a di manamati, mangipaay ti Biblia iti makatulong a balakad no kasano nga agbalin a makagunggona ti narigat a kasasaadda. (1 Corinto 7:12-16, 39; 2 Corinto 6:14) Amin dagita a balakad ipakitada a ni Jehova a Dios, ti Namunganay iti panagasawa, kayatna a naragsak dagiti agdaydayaw kenkuana, adda man asawada wenno awan.