SUHETO ITI AKKUB | POSIBLE A MAAWATAM TI BIBLIA
Apay a Nagpateg a Maawatam ti Biblia?
“Ti Biblia ket maysa a popular a libro ti relihion. Ngem libro dayta ti sabali a nasion ken saan a maibagay kadakami a Chinese.”—LIN, CHINA.
“Diakto pay maawatan dagiti nasantuan a libro ti relihionko a Hindu, isu a kasano koma a maawatak ti Santa Biblia?” —AMIT, INDIA.
“Raraemek ti Biblia ta nabayagen dayta, ken mangmangngegko a dayta ti libro a kaaduan ti nailakon a kopiana. Ngem awan pay pulos nakitak a Biblia.”—YUMIKO, JAPAN.
Iti intero a lubong, adu ti dakkel ti respetona iti Biblia. Ngem mabalin a bassit ti ammoda iti linaon ti Biblia. Sigurado a pudno dayta iti minilion a taga-Asia, ngem pudno met dayta uray iti adu a tattao nga aggigian kadagiti nasion nga adu ti adda Bibliana.
Ngem mabalin a maisaludsodmo, ‘Apay koma a paginteresak nga adalen ti Biblia?’ No maawatam ti mensahe daytoy a sagrado a libro, matulonganka a:
Maaddaan iti makapnek ken naragsak a biag
Mangsango kadagiti problema ti pamiliayo
Mangsango kadagiti pakadanagam
Mangpasayaat iti relasionmo iti sabsabali
Mangibadyet a naimbag iti kuartam
Alaentay a pagarigan ni Yoshiko a taga-Japan. Pinampanunotna no ania ti linaon ti Biblia isu a nagdesision a basaenna a mismo dayta. Ti resultana? Kinunana: “Gapu iti Biblia, addan direksion ti biagko ken addan nagsayaat a namnamak para iti masanguanan.” Innayonna: “Naragsak itan ti biagko.” Ni met Amit a naibaga itay ket nagdesision nga adalenna a mismo ti Biblia. “Kasla diak mamati,” kinunana. “Naglaon gayam ti Biblia kadagiti impormasion a makatulong iti amin.”
Gapu iti Biblia, dakkel ti nagbalbaliwan ti biag ti minilion a tattao. Apay a dimo adalen a mismo dayta ket kitaem no kasano a matulongannaka?