1 | Kararag—“Ipalladawyo Kenkuana ti Amin a Pakadanaganyo”

TI KUNA TI BIBLIA: “Ipalladawyo [iti Dios] ti amin a pakadanaganyo ta ipatpategnakayo.”—1 PEDRO 5:7.

Ti Kaipapananna

Aw-awisennatayo ni Jehova a Dios a mangibaga kenkuana ti aniaman a pakadagsenan ti isip ken pusotayo. (Salmo 55:22) Mabalintayo nga ikararag ti aniaman a problematayo, kasanoman kadakkel wenno kabassit dayta. No importante dayta kadatayo, importante met dayta ken Jehova. Ti panagkararag kenkuana ket maysa a napateg a pamay-an tapno maaddaantayo iti talna ti panunot.—Filipos 4:6, 7.

No Kasano a Makatulong

No marigrigatantayo a manglaban iti problematayo iti mental a salun-at, mabalin a mariknatayo a kasla agmaymaysatayo. Saan a kanayon a naan-anay a maawatan ti dadduma a tao ti marikriknatayo. (Proverbio 14:10) No ibagatayo iti Dios ti amin a pakadanagantayo babaen ti kararag, mariknatayo a kanayon a dengdenggen ken maawatannatayo. Makitkitanatayo ni Jehova. Ammona ti saem a marikriknatayo ken dagiti pakarigatantayo, ket kayatna nga ikararagtayo kenkuana ti aniaman a mangpadpadagsen kadatayo.—2 Cronicas 6:29, 30.

No makisaritatayo ken Jehova iti kararag, bumileg ti panagtalektayo nga ipatpategnatayo. Mariknatayo ti kas iti narikna ti salmista a nangikararag: “Nakitam ti panagrigrigatko; ammom ti nakaro a panagladingitko.” (Salmo 31:7) Ammotayo a makitkita ni Jehova dagiti pakarigatantayo. Isu a kayatayo a sanguen dagiti arigna nasipnget a tiempo iti biagtayo. Ngem saanna la a basta maawatan dagita a pakarigatantayo. Liwliwaen ken pagin-awaennatayo pay babaen ti Biblia. Isuna laeng ti makaaramid iti dayta.

No Kasano a Makatulong ti Biblia—Julian

Ti Epekto Kaniak ti Nakaro a Panagdandanag

“Lablabanak ti panagdandanagko ken ti sakitko nga obsessive-compulsive disorder (OCD). Biglabigla lattan no kua a sumro ti panagdandanagko. Mayat ti riknak ita, ngem inton madamdama, perminto manen ti panagdandanagko a diak ammo ti rason. Ad-adda a madanaganak no adda kaduak a tattao. Probproblemaek unay no ania ti maibagada kaniak.

“Tultulongandak dagiti gagayyemko a makaammo iti situasionko. Aminek a mariknak no dadduma a saan a makatulong ti ibagbagada. Ngem ap-apresiarek ida ta ar-aramidenda ti amin a tumulong kaniak.

“No dadduma, gapu iti panagdandanagko ken iti sakitko nga OCD, marigatanak nga agkararag. Masapul nga ipamaysak ti panunotko tapno makapagpokusak a makisarita ken Jehova iti kararag. Nagalisto nga agbaliw ti pampanunotek isu a kaaduanna a maburiboranak. No diakon makontrol dagiti pampanunotek, diak metten mapagsusurot nga ibaga ken Jehova ti pampanunoten ken marikriknak.”

No Kasano a Matultulongannak ti Biblia

“Naammuak iti panagadalko iti Biblia a saan a kasapulan nga atiddog wenno adu a sasao ti usarentayo no agkararagtayo tapno awaten ti Dios dayta. No dadduma, no diak mayebkas ti marikriknak, ikararagko lattan: ‘Jehova, tulongannak koma.’ Uray no kasta laeng kasimple, mariknak a maawatannak ni Jehova ken itedna ti kasapulak iti dayta a tiempo. Malaksid iti panagkararag, nagpadoktorak met. Maragsakanak ta gapu kadagitoy nga inaramidko, simmayaat ti kasasaadko. Nagsayaat ti resulta ti panagpatulongko iti nailangitan nga Amak ken nariknak ti naayat a suportana.”