Maysa Laeng Kadi a Naimbag a Tao ni Jesus?

Sungbat ti Biblia

Ni Jesus ket saan laeng a maysa a naimbag a tao. Napaneknekan nga isu ti kadakkelan ti impluensiana a tao iti historia. Kitaem no ania ti kuna dagiti nalatak a historiador ken mannurat maipapan ken ni Jesus:

“Ni Jesus a taga-Nazaret . . . ti awan duadua a kalatakan iti intero a historia.”—H. G. Wells, Ingles a historiador.

“[Ni Jesus] ti addaan iti kadakkelan nga impluensia a nagbiag ditoy daga ken agtultuloy nga umad-adu ti maim-impluensiaanna.”—Kenneth Scott Latourette, Amerikano a historiador ken autor.

Ibaga ti Biblia no apay a dakdakkel ti impluensia ni Jesus no idilig iti siasinoman a naimbag a tao. Idi sinaludsod ni Jesus kadagiti kasingedan a pasurotna no siasino isuna iti panagkunada, siuumiso nga insungbat ti maysa kadakuada: “Sika ti Kristo, ti Anak ti sibibiag a Dios.”—Mateo 16:16.