Notum smárit til að kynna bókina Mesta mikilmenni
1 Bókin Mesta mikilmenni sem lifað hefur beinir athygli lesandans að ævi Jesú Krists. Þannig hjálpar hún fólki að kynnast syni Guðs betur og dregur það til hans líkt og gerðist á fyrstu öld. (Jóh. 12:32) Í júnímánuði eru boðberar hvattir til að nota smárit til að vekja áhuga á bókinni Mesta mikilmenni sem lifað hefur. Það er góð leið til að kanna áhugann og ákveða hvort efni sé til að bjóða bókina í fyrstu heimsókn. Eftir því sem við á gætirðu reynt að nota eftirfarandi tillögur til að bjóða þessa bók.
2 Mun þessi heimur bjargast? Smárit eru góð hjálp við að hefja samræður. Þau auðvelda okkur að ná athygli fólks af því að þau fást við mikilvæg málefni sem snerta það persónulega.
Þú gætir til dæmis sagt eitthvað í líkingu við þetta:
◼ „Við höfum tekið eftir því að margir segjast vera áhyggjufullir út af . . . [nefndu nýafstaðinn atburð úr fréttum]. Það lítur út fyrir að heimsástandið versni með degi hverjum. Sumir efast jafnvel um að þessi heimur geti bjargast. Hvað finnst þér um það? [Leyfðu húsráðanda að svara. Flestir eru bjartsýnir.] Ég las dálítið uppörvandi í þessu smáriti sem mig langar til að sýna þér. [Réttu húsráðanda smáritið Mun þessi heimur bjargast? og haltu á öðru eins smáriti.] Taktu eftir hvernig Jesús spáði því . . .“ Lestu úr grein á bls. 4 eða 5 sem samsvarar þeim atburði sem þú minntist á í upphafsorðunum. Ef viðkomandi sýnir einlægan áhuga gætirðu sýnt honum bókina Mesta mikilmenni. Ef það er viðeigandi skaltu snúa þér að viðbótarupplýsingum um spádóma Jesú í kafla 111. Áður en þú ferð gætirðu útskýrt stuttlega hvernig starf okkar fer almennt fram um heim allan og hvernig það er fjármagnað. Gættu þess líka að varpa fram spurningu til að fjalla um næst þegar þú kemur.
3 Líf í friðsömum nýjum heimi: Hvað merkir líf í nýjum friðsömum heimi í þínum huga? Flestir sjá fyrir sér tignarlegar ár og friðsæla dali með fallegum dýrum sem lifa saman í sátt og samlyndi. Þeim sem hafa áhyggjur af núverandi heimsástandi getur fundist von um friðsaman nýjan heim mjög upplífgandi.
4 Ert þú tilbúinn að bjóða nágrönnum þínum, vinnufélögum og þeim sem þú hittir í starfinu hús úr húsi eitthvað upplífgandi og ánægjulegt?
Þú gætir notað smáritið „Líf í friðsömum nýjum heimi“ og sagt:
◼ „Heldurðu að fólk geti einhvern tíma búið saman í friði eins og myndin framan á þessu smáriti sýnir? [Gefðu kost á svari.] Sjáðu síðustu málsgreinina í fyrstu greininni á bls. 2. Þar er spurt: ‚En eru það aðeins draumórar að slík skilyrði geti einhvern tíma orðið á jörðinni?‘ [Lestu síðan næstu grein í smáritinu.] Þessi klausa um nýjan himin og nýja jörð er úr Biblíunni, úr 2. Pétursbréfi 3:13. Ef þú getur náð í biblíuna þína getum við lesið Sálm 104:5 til að fá nánari vitneskju um framtíð jarðarinnar.“ Þú gætir líka lesið versið úr biblíunni þinni. Ef viðkomandi sýnir áhuga skaltu beina umræðunum að kafla 133 í bókinni Mesta mikilmenni.
5 Þú gætir líka kynnt bókina beint með þessum hætti:
◼ „Hvað dettur þér í hug þegar þú hugsar um Jesú Krist? [Gefðu kost á svari.] Margir sagnfræðingar viðurkenna Jesú sem mesta mikilmenni sem lifað hefur. [Vitnaðu í dæmi úr inngangi bókarinnar Mesta mikilmenni.] Biblían bendir á að ævi Jesú sé fyrirmynd fyrir okkur til að líkja eftir.“ Lestu 1. Pétursbréf 2:21 og fyrstu greinina á síðustu blaðsíðu inngangsins í bókinni Mesta mikilmenni. Bjóddu bókina ef húsráðandann fýsir að læra um Jesú. Lestu Jóhannes 17:3 áður en þú ferð og spyrðu: „Hvernig getum við aflað okkur þessarar þekkingar sem leiðir til eilífs lífs?“ Gerðu ákveðnar ráðstafanir til að koma aftur og svara því.
6 Þegar þú kemur aftur til að útskýra hvernig eigi að afla sér lífgandi þekkingar geturðu sagt:
◼ „Ég lofaði að koma aftur og sýna þér hvernig við getum aflað okkur þekkingarinnar sem leiðir til eilífs lífs.“ Sýndu Þekkingarbókina og notaðu fyrsta kaflann til að sýna hvernig nám fer fram.
7 Alls konar hjartahreint fólk er að leita að sannleikanum um Guð og Krist. Við getum aðstoðað það í boðunarstarfi okkar. Við skulum því halda áfram að leggja ‚á oss erfiði og þreyta stríð, því að vér höfum fest von vora á lifanda Guði, sem er frelsari allra manna.‘ — 1. Tím. 4:10.