Ný dagskrá fyrir sérstaka mótsdaginn

Ítarlegar upplýsingar eru fáanlegar um það hvernig við getum haldið hinu bókstaflega hjarta hraustu og lifað lengur og betur. En ástand táknræna hjartans er enn mikilvægara. Stef sérstaka mótsdagsins árið 2003, „Þjónum Jehóva af öllu hjarta“, á því vel við. (1. Kron. 28:9) Hvað munum við læra á mótinu?

Farandhirðirinn flytur ræðuna „Hjálpum öðrum að þjóna Jehóva með fúsu geði“. Í viðtölum verður sagt frá gleðinni sem fylgir því að glæða áhuga fólks á sannleikanum og halda biblíunámskeið fyrir þá sem vilja þjóna Jehóva. Fulltrúi deildarskrifstofunnar flytur svo ræðuna „Varðveitum hjartað í hrjáðum heimi“ sem verður án efa hughreystandi og uppörvandi fyrir alla viðstadda. Árdegisdagskránni lýkur svo með skírnarræðunni.

Síðdegis verður flutt ræðan „Réttum öðrum hjálparhönd“. Í henni er athyglinni beint að því hvernig við getum aðstoðað aðra. Hvað geta foreldrar gert til að vernda hjörtu barna sinna gegn skaðlegum áhrifum og til að hjálpa þeim að nálægja sig Jehóva? Í ræðunni „Hjálpaðu börnunum að gleðjast yfir Jehóva“ verða gefnar gagnlegar leiðbeiningar um það.

Nýtum við okkur allar þær ráðstafanir sem Jehóva gerir til að hjálpa okkur að halda táknræna hjartanu hraustu og sterku? Fulltrúi deildarskrifstofunnar flytur lokaræðuna „Höldum áfram að þjóna Jehóva af öllu hjarta“. Í henni verður áhersla lögð á fjögur atriði sem nauðsynleg eru til að viðhalda andlegum styrk. Hversu mikinn tíma og orku notum við til að biðja, lesa í orði Guðs, prédika af kostgæfni og eiga samneyti við trúsystkini okkar? Getum við tekið framförum í einhverju af þessu?

Jehóva býður okkur: „Snú þú hjarta þínu að umvöndun og eyrum þínum að vísdómsorðum.“ (Orðskv. 23:12) Gerðu strax ráðstafanir til að vera viðstaddur og nýta þér þessa gagnlegu biblíufræðslu. Það mun hvetja þig til að halda áfram að þjóna Jehóva af öllu hjarta og með fúsu geði.